Sığorta-pensiya sistemində aparılan islahatlar yüksək qiymətləndirilir

Türkiyənin Azərbaycandakı fövqəladə və səlahiyyətli səfiri Hülusi Kılıç Dövlət Sosial Müdafiə Fondunda olub

DSMF-nin ictimaiyyətlə əlaqələr sektorundan aldığımız məlumata görə Türkiyənin Azərbaycandakı fövqəladə və səlahiyyətli səfiri Hülusi Kılıc, səfirliyin sosial müdafiə məsələləri üzrə müşaviri Mustafa Gür və ticarət müşaviri Qazi Bilgin ilə birlikdə Dövlət Sosial Müdafiə Fondunda olub. Qonağa fondun iş şəraiti ilə bağlı ətraflı məlumat verilib. DSMF sədri Səlim Müslümov diplomatı fondun mərkəzləşdirilmiş idarəetmə, fərdi uçotun avtomatlaşdırılması sistemləri, tədris otağı, sosial sığorta şəhadətnamələrinin çapı mərkəzi ilə yaxından tanış edib. S.Müslümov bildirib ki, müasir standartlara uyğun qurulmuş sığorta-pensiya sisteminin idarə olunmasını avtomaşlaşdırmaq üçün 6 il ərzində fondun maddi-texniki bazası tamamilə yenidən qurulmuş, 60-dan yuxarı yerli şöbənin yeni inzibati binası istifadəyə verilmiş, hər bir şöbə üçün lokal şəbəkə qurulmuş, avtomatlaşdırılmış iş yerləri yaradılmışdır. Hər bir işçi kompüterlə təmin olunmuşdur. S.Müslümov əlavə edib ki, aparılmış islahatların nəticəsində ölkəmizdə aztəminatlı əhalinin sosial müdafiəsi sahəsində yeni bir sistem formalaşdırılmışdır. 2003-2005-ci illərdə pilot və hazırlıq tədbirləri başa çatdırılmışdır. 2006-cı ildən sığorta-pensiya sistemi ilə dövlət sosial yardım sistemlərinin bir-birindən ayrılması və beynəlxalq standartlar əsasında fəaliyyət göstərməsi təmin edilmişdir. Köhnə pensiya sistemi ilə əhatə olunmuş şəxslərin pensiya təminatı yeni normalara uyğunlaşdırılmış və onların yeni sistemin iştirakçısına çevrilməsi təmin olunmuş, əvvəlki pensiya işləri mərkəzləşdirilmiş qaydada arxivləşdirilərək elektron uçotu qurulmuşdur. Sığorta-pensiya sistemində həyata keçirilən islahatların mühüm həlqəsi kimi 2004-cü ildən pensiya və müavinətlərin ödənişinin avtomatlaşdırılması işinə başlanılıb. Azərbaycanda əmək pensiyalarının plastik kartlarla ödənilməsi prosesi müvəffəqiyyətlə tətbiq olunmaqdadır. Hazırda ödənişdə olan pensiyaların 93 faizi, yəni 1 milyon 30 min nəfərin pensiyasının ödənişi plastik kartlarla həyata keçirilir. Qarşıda duran vəzifələrdən danışan S. Müslümov vurğulayıb ki, yaxın vaxtlarda pensiya təyinatının avtomatlaşdırılması, əhaliyə ödənişlərin avtomatlaşdırılmasının başa çatdırılması, fondun mərkəzi məlumat bazası ilə yerli şəbəkələrin birləşdirilməsi və korporativ idarəetmə sisteminin qurulması, fondda qeydiyyatda olan bütün pensiyaçı və sığortaolunanların özlərinə aid istənilən məlumatı internet sistemi vasitəsilə dərhal əldə edə bilməsi üçün 3 milyon şəxsi əhatə edəcək ümumi məlumat bazasının yaradılması nəzərdə tutulur. Prezident İlham Əliyev tərəfindən "2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı"nın təsdiq olunduğunu da nəzərə çatdıran S.Müslümov deyib ki, sənəd Azərbaycanda sığorta-pensiya sistemində həyata keçirilən islahatların növbəti mərhələsini müəyyənləşdirir. Dövlət Proqramı pensiya təminatında sığorta prinsiplərinin gücləndirilməsini və tədricən yığım komponetinin tətbiqinə keçidi nəzərdə tutmaqla, pensiya islahatlarının daha da dərinləşdirilməsini, aparılan islahatlar nəticəsində qurulmuş yeni sığorta-pensiya sisteminin dayanıqlı və dinamik inkişafına nail olunmasını, bu zəmində vətəndaşların pensiya təminatının daha da təkminləşdirilməsini özündə ehtiva edir.

Onu da qeyd edək ki, Azərbaycan Respublikasının və Türkiyə Cümhuriyyətinin hökumətləri arasında sosial müdafiə sahəsində əməkdaşlığı nəzərdə tutan saziş mövcuddur.

Türkiyə səfiri Azərbaycanın sığorta-pensiya sistemində həyata keçirilən islahatları yüksək qiymətləndirib və bu islahatların bir çox inkişaf etmiş ölkələr üçün belə örnək ola biləcəyini vurğulayıb.

Mustafa KAMAL,

Respublika.- 2009.- 31 yanvar.- S. 5.