Heydər Əliyev Fondu və Polşa səfirliyinin maliyyə dəstəyi ilə Samuxda yeni məktəb binası tikilmişdir

 

Samux rayonunun ucqar kəndi olan Sarıqamışda Heydər Əliyev Fondunun və Polşa səfirliyinin maliyyə dəstəyi ilə müasir tələblərə cavab verən yeni məktəb binası tikilib istifadəyə verilmişdir.

Yeni məktəb binasının açılışı mərasimində iştirak etmək üçün rayona gələn Polşanın ölkəmizdəki səfiri Kşiştof Krayevski və Heydər Əliyev Fondunun icraçı katibi Anar Ələkbərov rayonda ulu öndər Heydər Əliyevin adını daşıyan parkda ucaldılmış nəhəng abidə önünə tər çiçək dəstələri qoymuşlar.

Açılış mərasimində çıxış edən Heydər Əliyev Fondunun icraçı katibi Anar Ələkbərov demişdir ki, bu il fəaliyyətə başlamasının beş ili tamam olacaq Heydər Əliyev Fondunun maliyyə vəsaiti ilə Samuxda inşa edilən bu məktəb sayca 238-ci məktəbdir və bu kompaniya gələcəkdə də uğurla davam etdiriləcəkdir.

Mərasimə məktəbyaşlı oğlu ilə qoşulan Polşa Respublikasının ölkəmizdəki səfiri Kşiştof Krayevski öz çıxışında yeni məktəb binasının inşasına maliyyə dəstəyi göstərdiklərindən məmnunluq duyduğunu ifadə etmişdir.

Samux Rayon İcra Hakimiyyətinin başçısı Vilyam Hacıyev tədbirdə çıxış edərək rayonda yeni məktəb binasının tikintisi üçün maliyyə dəstəyi göstərmiş Heydər Əliyev Fondunun rəhbərliyinə, şəxsən Mehriban xanım Əliyevaya və Polşa səfirliyinə rayon sakinləri adından səmimi minnətdarlığını bildirmişdir. O, yeni məktəb binasının tikintisini xalqlarımız arasında son vaxtlar yüksək sürətlə inkişaf edən dostluq və əməkdaşlığa yeni töhfə kimi qiymətləndirmiş və bunun hər iki ölkə başçısı arasındakı səmimi dostluq münasibətlərinin nəticəsi olduğunu xüsusi vurğulamışdır.

Natiq son vaxtlar respublikamızın regionlarındakı keyfiyyət dəyişikliklərinin Samuxda da geniş əks-səda tapdığını bildirmiş və respublika Prezidenti möhtərəm İlham Əliyevin Samuxa səfərinin doğurduğu yüksək işgüzarlıq əhval-ruhiyyəsinin rayon zəhmətkeşləri ilə görüşü zamanı verdiyi tövsiyə və tapşırıqların uğurla yerinə yetirilməsinə böyük təkan verdiyini məmnunluq hissi ilə ifadə etmişdir.

Sonra məktəbin açılışını bildirən qırmızı lent kəsilmiş, qonaqlar yeni təhsil ocağında yaradılmış şəraitlə tanış olmuşlar.

İstilik sistemi ilə təchiz edilmiş məktəb 200 yerlikdir. Buradakı 15 sinif otağında uşaqların yüksək tədris və tərbiyəsi üçün hər cür şərait yaradılmışdır. Kompüter otağı və kitabxana ən müasir avadanlıqlarla təchiz edilmişdir.

Açılış mərasimində məktəbli skripkaçıların ifa etdiyi klassik Polşa musiqisi qonaqlar tərəfindən səmimi qarşılanmışdır.

Polşa səfirliyi və Heydər Əliyev Fondu tərəfindən yeni məktəbə hədiyyələr təqdim olunmuşdur.

 

 

Y.TANRIVERDİYEV

 

Respublika.- 2009.- 31 yanvar.- S .5.