Yeni Azərbaycan Partiyası "Ekologiya ili" çərçivəsində ağac əkilmək kampaniyasında iştirak edib

YAP fəalları tərəfindən Binə hava limanı yaxınlığında üç hektar ərazidə 3 mindən artıq ağac əkildi

Aprelin 3-də Yeni Azərbaycan Partiyasının rəhbərliyinin, millət vəkillərinin, YAP-ın rayon təşkilatlarının fəalları "Ekologiya ili" çərçivəsində yaşıllaşdırma kampaniyasına uyğun olaraq Binə hava limanı yaxınlığında üç hektar ərazidə 3 mindən artıq müxtəlif növ ağac əkdilər. Ölkənin ən güclü siyasi təşkilatı olan Yeni Azərbaycan Partiyası tərəfindən davamlı şəkildə yaşıllaşdırma kampaniyalarının həyata keçirilməsi ətraf mühitin, təbii ehtiyatların qorunmasında mühüm amil kimi qiymətləndirilir. Artıq ənənə halını almış bu məsələdə YAP rəhbərliyi, partiyanın bütün rayon təşkilatlarının fəalları, millət vəkilləri də böyük fəallıq nümayiş etdirirlər. "Ekologiya ili" çərçivəsində YAP tərəfindən həyata keçirilən bu kampaniyanın həyata keçirilməsi də ölkədə yaşıllıq sahələrinin genişləndrilməsində və qorunmasında mühüm töhfədir. Ölkəmizin ümumi inkişaf konsepsiyasında ətraf mühitin mühafizəsi, insanların sağlam təbii mühitdə yaşaması və təbii sərvətlərdən düzgün istifadəsi mühüm yer tutur. Prezident İlham Əliyevin təşəbbüsü ilə cari ilin ölkədə "Ekologiya ili" elan edilməsində məqsəd məhz bu məsələlərin uğurlu həllini təmin etməkdir. Bu il fevralın 18-də ölkə başçısının yanında ekoloji problemlərə həsr olunmuş müşavirənin keçirilməsi də ən yüksək səviyyədə bu sahəyə qayğının təzahürüdür. Bütün bunların məntiqi davamı kimi, YAP rəhbərliyi tərəfindən bü cür yaşıllıqların salınması istiqamətində ardıcıl olaraq işlərin davam etdirilməsi də ölkənin aparıcı siyasi təşkilatının, hər bir sahədə olduğu kimi, ekoloji tarazlığın qorunmasında da mövqeyinin birmənalı olduğunu bir daha təsdiqləyir. Artıq bir neçə ildir ki, bir ənənəyə çevrilən YAP-ın ağacəkmə kampaniyası "Ekologiya ili" çərçivəsində də böyük əzmlə davam etdirilir. Binə hava limanı yaxınlığında üç hektar ərazidə 3 mindən artıq müxtəlif növ ağacların əkilməsi YAP-ın insanların sağlamlığına daima diqqət və qayğı ilə yanaşmasının bariz nümunəsi kimi qiymətləndirilir. Ölkəmizin hər bir sahəsində mövcud inkişafın təmin edilməsi ətraf mühitin və yaşıllıqların qorunmasını və onların daha da genişləndrilməsini zəruri edir. Bu baxımdan da, YAP tərəfindən, mütəmadi olaraq, bu cür kampaniyaların həyata keçirilməsi vətəndaşlar tərəfindən də böyük maraqla qarşılanır.

Tapdıq Qurbanlı

Səs.- 2010.- 6 aprel.- S. 3.