“Ekologiya ili"ndə hər kəs öz töhfəsini verməlidir"

Gədəbəydə kütləvi ağacəkmə kampaniyasına başlandı

Ölkə Prezidentinin 2010-cu ili "Ekologiya ili" elan etməsinə cavab olaraq, respublikamızın bütün bölgələrində olduğu kimi, Gədəbəy rayon icra hakimiyyəti ilə YAP Gədəbəy rayon təşkilatının birgə təşəbbüsü ilə ağacəkmə kampaniyasına start verilib.

"Ekologiya ili"ndə hər kəs öz töhfəsini verməlidir" şüarı altında keçirilən ilk tədbirdə rayonun bütün kəndlərində fəaliyyət göstərən idarə, müəssisə və təşkilatların aktivləri iştirak ediblər. YAP Gədəbəy rayon təşkilatının sədri Ramazan Muradov bildirib ki, Azərbaycanda ekologiya ili, yaşıl dünya üçündür: "Çünki görüləcək tədbirlərin əksəriyyəti Azərbaycanda ekoloji durumun saflaşdırılması ilə bağlıdır. Ümumiyyətlə, dünyada gedən narahatçılıq prosesinə Azərbaycanın böyük töhfə verməsini nəzərdə tutur".

R.Muradov onu da söylədi ki, əhalinin həyat səviyyəsinin yüksəldilməsi ilə yanaşı, təbii ehtiyatlardan səmərəli istifadə və ekoloji tarazlığın qorunması dövlətin daim diqqət mərkəzindədir. Ölkə Prezidenti İlham Əliyevin təşəbbüsü və göstərişləri ilə son illər bu istiqamətdə bir sıra dövlət proqramları hazırlanıb, təbiətin mühafizəsi, onun sağlamlaşdırılması üçün əməli işlər görülübdür. Rayonun bütün kəndlərində olduğu kimi, həmin gün Dəyəqarabulaq kəndində də canlanma var. Belə ki, yüzlərlə insanın iştirak etdiyi bu tədbirdə kəndarası yolların kənarlarına və yeni tikilmiş məktəb binasının ətrafına minlərlə ağac əkilibdir. Ağacəkmə kampaniyası hal-hazırda davam edir, Rayon üzrə 50 minə qədər ağac əkilməsi planlaşdırılıbdır. Çünki rayon əhalisi yaxşı başa düşür ki, əkilən hər bir ağacın ekoloji baxımdan böyük əhəmiyyəti vardır. Odur ki, hər bir rayon sakini ekoloji vəziyyətin daha da yaxşılaşdırılmasına öz töhfəsini verməyə çalışır".

RƏFİQƏ HÜSEYNOVA

Səs.- 2010.- 6 aprel.- S. 10.