Beynəlxalq elmi konfransda Azərbaycan da təmsil olunub

Konfrans böyük türkmən şairi Molla Nəfəsin 200 illiyinə həsr edilib

Türkmənistanın Marı şəhərində "Molla Nəfəs və XIX əsr türkmən həyatı" adlı beynəlxalq elmi konfrans keçirilib. Böyük türkmən şairi Molla Nəfəsin 200 illiyi ilə bağlı baş tutan tədbirdə 25 ölkədən gəlmiş tarixçilər, şərqşünaslar və dilçi alimlər iştirak ediblər. Konfransda Azərbaycanı Bakı Dövlət Universitetinin müəllimi, filologiya elmləri doktoru Ramiz Əsgər, AMEA Folklor İnstitutunun əməkdaşı Əli Şamilov, AMEA Şərqşünaslıq İnstitutunun elmi işçisi, filologiya elmləri namizədi Elmira Fikrətqızı və Bakıdakı "Min bir mahnı" nəşriyyatının rəhbəri Rafiq Babayev təmsil ediblər.

Konfransda milli və dünya mədəniyyətinin inkişafında Molla Nəfəsin poetik irsi, şairin əsərlərinin dünyanın müxtəlif dillərinə tərcümə edilməsi, onun irsinin tədqiqi və digər məsələlər ətrafında müzakirələr aparılıb.

Türkmən xalqının övladı Molla Nəfəsin Azərbaycanda iki kitabı nəfis tərtibatla çap edilib. Bu kitabların istər tərtibatı, istərsə də, tərcümənin keyfiyyəti iştirakçıların diqqətini çəkib. Ramiz Əsgər Molla Nəfəsin şeirlərini Azərbaycan dilinə tərcümə edib.

Konfrans iştirakçıları Marı vilayətinin tarix-diyarşünaslıq muzeyinə, "Mərv" tarixi-mədəni qoruğuna getmiş, Marı şəhər Sərgilər Mərkəzində türkmən rəssamlarının əsərlərinə də baxıblar.

Zümrüd

Səs.- 2010.- 15 aprel.- S. 12.