Avropa və Asiya xalqları qədim mədəniyyətə malik Azərbaycanı yaxından tanımaq imkanı əldə ediblər

Fransada həyata keçən tədbirlər Azərbaycan Mədəniyyəti Günləri kimi də qəbul olunur

Bildiyimiz kimi, Parisdə keçirilən ənənəvi Beynəlxalq Kitab Sərgisi işini uğurla başa vurmuşdur. Qeyd edək ki, bu sərgi hər il Parisdə məhz mart ayında təşkil olunur və hər il dünyanın 35 ölkəsindən 1000-ə yaxın nəşriyyat evi həmin möhtəşəm tədbirdə iştirak edir. Bu il sərginin 30 illiyi ilə əlaqədar olaraq təşkilatçılar sərgiyə ənənəvi "Fəxri qonaq" qismində dünyanın 90 məşhur ədəbiyyat simasını, o cümlədən, Umberto Eko, Doris Lessinq, Pol Oster kimi dünya şöhrətli yazıçıları dəvət etmişdilər. Beynəlxalq Kitab Sərgisi təkcə nəşr məhsullarının deyil, eləcə də, dünya xalqlarının, mədəniyyətlərinin, mətbəx nümunələrinin nümayiş yeridir. Odur ki, sərgi müddətində minlərlə iştirakçı tanıtımdan böyük təəssüratlarla ayrılırdılar. Beynəlxalq tədbirin bir özəlliyi də ondan ibarət idi ki, təşkilat komitəsi sərgiyə 40 min uşağı dəvət etməklə yanaşı, onların hər birinə 7 avro məbləğində pul hədiyyəsi ilə mükafatlandırırdılar. Beləliklə, kiçik yaşlı iştirakçılar maraq dairələrində olan kitabları əldə etmək imkanı qazanırdılar. Məlum olduğu kimi sərgi-yarmarkaya ilk dəfə Azərbaycan Respublikası da qatılmışdır. Mədəniyyət və Turizm Nazirliyinin icarəyə götürdüyü stenddə ölkəmizdə işıq üzü görmüş 200-ə qədər kitab, jurnal, turizmə aid bələdçi kitablar və s. çap məhsulları uğurla nümayiş etdirilmişdir. Bununla yanaşı, stendimizdə YUNESKO-nun qeyri-maddi mədəni irs siyahısına daxil edilən Novruz bayramının atributları olan bayram şirniyyatları, həmçinin, milli kulinariya nümunələri sərgi iştirakçılarının böyük marağına səbəb olmuşdur. Müxtəlif ölkələrdən gələn insanlar stendimizə yaxınlaşıb, milli mətbəximizin ləziz şirniyyatlarından dadaraq, əsil zövq aldıqlarını dilə gətirirdilər. Stendimizdə "Festival de l'imaginaire" ("Təxəyyül") festivalına qatılmaq üçün Parisə gəlmiş Şirvan aşıqları və YUNESKO-nun Baş Qərargahında, eləcə də, Avropa Şurası qərargahında- Strasburq şəhərində Novruz bayramının təqdimat mərasimində iştirak etmək üçün Fransanın paytaxtında olan Qədim Musiqi Alətləri Ansamblının bir qrup üzvü uğurla çıxış etmişlər. Qeyd edək ki, bu çıxışlar musiqimizin sədalarını eşidib, qeyri-ixtiyari olaraq, stendimizə axışan insanların heyrətinə və səmimi alqışlarına səbəb olmuşdur. Sərgidə, həmçinin, Azərbaycanın Fransadakı səfiri Elçin Əmirbəyov, Fransa rəsmi dairələrinin nümayəndələri, Mərakeşin mədəniyyət naziri xanımı ilə və başqa dövlətlərin yüksək vəzifəli təmsilçiləri iştirak etmişdilər. Novruz bayramının YUNESKO-nun qeyri-maddi mədəni irs siyahısına daxil edilməsi və 2010-cu ilin YUNESKO tərəfindən mədəniyyətlərin yaxınlaşması ili elan olunması ilə əlaqədar TÜRKSOY-a üzv dövlətlərin elmi-yaradıcı nümayəndə heyətlərinin iştirakı ilə YUNESKO-nun Baş Qərargahında, Avropa Şurası qərargahında - Strasburq şəhərində Novruz bayramının təqdimat mərasimi də keçirilmişdir. TÜRKSOY təşkilatının təşəbbüsü ilə gerçəkləşən tədbirdə Azərbaycanla yanaşı, Türkiyə, Qazaxıstan, Qırğızıstan, Rusiya Federasiyasında və Moldovada yaşayan türkdilli xalqların incəsənət ustaları da konsert proqramı ilə çıxış etmişlər. Mərasimdə TÜRKSOY-un baş direktoru Düsen Kaseinov Novruz bayramının əhəmiyyətindən söhbət açmışdı. Tədbirdə Fransanın rəsmi nümayəndələri, Azərbaycan səfirliyinin və diasporunun təmsilçiləri və tələbələrimiz iştirak etmişlər. Bundan başqa, 30 mart tarixində Fransanın "Maison des cultures du monde" ("Dünya mədəniyyətləri evi") Assosiasiyasının təşkilatçılığı və Azərbaycan Respublikası Mədəniyyət və Turizm Nazirliyinin dəstəyi ilə Parisdə hər il keçirilən "Festival de l'imaginaire" ("Təxəyyül") festivalında YUNESKO-nun qeyri-maddi mədəni irs siyahısına daxil edilən aşıq sənətininin nümunələri AMEA-nın əməkdaşı Sənubər Bağırovanın rəhbərliyi altında Şirvan aşıqları tərəfindən iki günlük konsert proqramı ilə təqdim olundu. "Maison des cultures du monde" Assosiasiyasının konsert salonunda baş tutan konsertdə aşıqlarımız Azərbaycan folklor nümunələrini ifa etmiş, böyük rəğbətlə qarşılanmış və tamaşaçıların hərarətli alqışları ilə bir neçə dəfə təkrarən səhnəyə çağırılmışdılar. Fransada həyata keçən tədbirləri Azərbaycan Mədəniyyəti Günləri kimi də qəbul etmək olar. Çünki bir həftə ərzində fransızlarla yanaşı, Avropa və Asiya xalqlarının nümayəndələri qədim mədəniyyətə malik olan xalqımızı daha da yaxından tanıdı.

Zümrüd

Səs.- 2010.- 15 aprel.- S. 12.