"Ulu öndər Heydər Əliyevi düşünərkən"

Bu mövzuda akademik Zərifə Əliyeva adına orta məktəbdə yazı müsabiqəsi keçirildi

Dünən akademik Zərifə Əliyeva adına orta məktəbdə "Ulu öndər Heydər Əliyevi düşünərkən" adlı yazı müsabiqəsi keçirildi. Müsabiqənin açılışında iştirak edən təhsil naziri Misir Mərdanov bildirdi ki, bu tədbir son illər, ənənəvi olaraq, təşkil olunur və hər ilin əvvəlindən orta məktəblərdə ulu öndər Heydər Əliyevin doğum gününə həsr edilən inşa yazı müsabiqələri keçirilir. Nazirin sözlərinə görə, ilk olaraq, bu müsabiqələr kəndlərdə, qəsəbələrdə keçirilir və sonra hər rayondan bir qalib seçilir. Müsabiqə, həmçinin, peşə məktəblərində də keçirilir. O da, qeyd edildi ki, bu müsabiqədə əsasən, yuxarı sinif şagirdləri iştirak edir.

M.Mərdanovun sözlərinə görə, bu müsabiqə ölkədə təşkil olunan ən kütləvi tədbirdir və burada təxminən yarım milyona yaxın şagird iştirak edir: "Hazırda həmin müsabiqənin son turu keçirilir və burada 96 şagird iştirak edir. İnşa yazılar bir neçə gün ərzində nazirlik tərəfindən müəyyən olunmuş ekspertlər tərəfindən qiymətləndiriləcək. Sonra şagirdlərin yazısı kitabça halında çap olunacaq. Son mərhələnin qalibləri may ayının əvvəlində elan ediləcək. Ötən il olduğu kimi, yekun mükafatlandırma tədbirinin "Gülüstan" sarayında təşkili nəzərdə tutulub ki, qaliblərə xüsusi mükafatlar, "tərifnamə"lər veriləcək".

Yazıların yoxlanma qaydasına gəldikdə isə nazir qeyd etdi ki, bu yazılar kodlaşdırılacaq və əllə yoxlanacaq. Çünki 96 yazını yoxlamaq üçün xüsusi proqram tərtib etməyə ehtiyac yoxdur. Bir yazını 3-4 nəfərdən ibarət ekspert oxuyacaq.

Tədbir zamanı bir sıra məsələlərə aydınlıq gətirən təhsil naziri M.Mərdanov məktəblərin pedaqoji kadr təminatı ilə bağlı mövcud vəziyyətlə əlaqədar bildirdi ki, bu sahədə növbəti proqram hazırlanıb və hökumət tərəfindən təsdiq edilib: "Ötən 5 il ərzində, demək olar ki, bu məsələni həll etmişik. Ucqar rayonlarda ciddi müəllim çatışmazlığı olan çox az sayda məktəblər var. Ona görə də, biz hökumət tərəfindən təsdiq edilən həmin proqramı təqdim etdik. Yəqin ki, üzümüzə gələn yaydan o proqramın növbəti ildə həyata keçirilməsinə başlayacağıq. Bu sahədə hazırda dəqiq rəqəm demək çətindir və 6-7 il öncə, bu rəqəm 7 min idi. Bunun 80 faizi yerinə yetirilib və yerlərə göndərilmək üçün çox az sayda müəllim qalıb".

Məktəblilər arasında intihar hallarının olması ilə bağlı məsələyə münasibət bildirən nazir bu halların böyük təəssüf doğurduğunu bildirdi. Səbəblərin müxtəlif olduğunu deyən nazirin sözlərinə görə, bu, əsasən, sağlamlıq problemi ilə əlaqədardır: "Biz Səhiyyə Nazirliyi isə xüsusi ekspertlərin iştirakı ilə gələcəkdə belə halların qarşısının alınması üçün tədbirlər hazırlamışıq və çalışacağıq ki, gələcəkdə bu cür hallar olmasın. Əsasən, bu hallar uğursuz ailələrdən olan xəstə uşaqlarda baş verir".

Texnikumların fəaliyyətinə gəldikdə isə, nazir qeyd etdi ki, qarşıdan gələn 5 il müddəti üçün Dövlət Proqramı hazırlanıb və təsdiq edilib:"Artıq onlar kollec adlanır və biz həmin kolleclərin inkişaf proqramını həyata keçirəcəyik. Bu proqramda çox məsələlərin nəzərdə tutulduğunu deyən nazir qeyd etdi ki, buraya maddi-texniki bazanın möhkəmləndirilməsi, kadr təminatı, bütövlükdə, kollecdə təhsilin keyfiyyətinin artırılması nəzərdə tutulub ki, bu da uzun sürən bir prosesdir və nazirlik tərəfindən bunun həyata keçirilməsinə başlanacaq".

Orta məktəblərdə mərkəzləşmiş imtahanların keçirilməsi ilə əlaqədar məsələyə münasibət bildirən nazir bildirdi ki, vaxt bəllidir və bu iyun ayının əvvəlllərinə təsadüf edir: "Dörd dəfə keçiriləcək imtahanların dəqiq vaxtı mətbuatda öz əksini tapacaq. İlk olaraq sınaq yoxlama imtahanlarının nəticələrini biz müzakirə edirik, hansı məktəbdə, rayonlarda vəziyyətin necə olduğu, hansı səhvlərin, nöqsanların buraxıldığı araşdırılır. Düşünürəm ki, yekun buraxılış imtahanları daha yüksək səviyyədə keçiriləcək".

İmtahanların nəticələrinə gəldikdə isə, nazirin sözlərinə görə, nəticələr o baxımdan qane edir ki, ötən illə müqayisədə bu il mənimsəmə 10 faiz yüksək olub. Həmçinin, bu gün valideyinlər, imtahan verənlər bu işi daha yüksək dəyərləndirirlər və daha məsuliyyətlə yanaşırlar.Bu il gəlməyənlərin sayı ötənilkinə nisbətən azdır. Ancaq mövcud problemlər də var ki, onların üzərində iş gedir.

Tədbirdə çıxış edən YAP Sədrinin müavini, millət vəkili Əli Əhmədov Heydər Əliyevin doğum günü ilə bağlı yazı müsabiqəsinin keçirilməsinin ənənə halını aldığını deyərək, bildirdi ki, bu, ölkəmizdə keçirilən ulu öndərin anılması ilə əlaqədar ən kütləvi tədbirlərdən biridir: "Hesab edirəm ki, bu müsabiqənin keçirilməsinin böyük mənası var. Çünki orta məktəb şagirdləri, yeniyetmələr Heydər Əliyevin həyat və fəaliyyəti, Azərbaycanın müstəqilliyi qarşısında misilsiz xidmətləri ilə bağlı öz düşüncələrini yazırlar. Heydər Əliyevi dərk etmək istiqamətində cəhdlər edir, ulu öndərin kəlamlarını öyrənirlər. Beləliklə də, bu, həm Heydər Əliyevin zəngin irsini öyrənməklə yanaşı, həm də gənc nəsildə dövlətçilik təfəkkürünün formalaşmasına həlledici təsir göstərir. Bu müsabiqədə iştirak etməklə dövlət haqqında, dövlətçilik təfəkkürünün formalaşması ilə əlaqədar böyük bir məktəb keçmiş olurlar. YAP bu müsabiqələrin keçirilməsində yaxından iştirak edir və biz qərara almışıq ki, bu müsabiqənin qalibləri ali məktəblərə daxil olduqda partiya tərəfindən oxuduqları müddət ərzində ayda 50 manat məbləğində təqaüd alırlar. Artıq bu müsabiqənin qaliblərindən 11 nəfər ali məktəbə daxil olub və onlar YAP-ın təqaüdlərini alırlar ki, bu da bir stimuldur".

RƏFİQƏ KAMALQIZI

Səs.- 2010.- 21 aprel.- S. 4.