"Ümummilli liderimiz Heydər Əliyev və müasir Azərbaycan"

YAP Xızı rayon təşkilatının keçirdiyi tədbir ulu öndər Heydər Əliyevin doğum günün 87-ci ildönümünə həsr edildi

Ümummilli liderimiz Heydər Əliyevin anadan olmasının 87-ci ildönümü münasibətilə respublikamızın bütün regionlarında geniş tədbirlər keçirilir. YAP Xızı rayon təşkilatının qərargahında "Ümummilli liderimiz Heydər Əliyev və müasir Azərbaycan" mövzusunda keçirilən tədbir də bu silsilədəndir.

YAP Xızı rayon təşkilatının sədri Fərrux Haqverdiyev gündəlikdə duran məsələlər barədə məlumat verdi: "10 may tarixi hər bir Azərbaycan vətəndaşının qəlbində bayram kimi qeyd olunur. Bu günlər, ümumiyyətlə, müstəqil Azərbaycan tarixinin ən şanlı günlərindən biridir. Ulu öndər Heydər Əliyev görkəmli dövlət xadimi, ümummilli lider kimi bütün millət tərəfindən tərəddüdsüz qəbul edilən, hələ sağlığında əfsanələşən, ürəklərdə özünə əbədi heykəl ucaldan bir şəxsiyyətdir. Ümummilli liderimiz Heydər Əliyevin Azərbaycana rəhbərlik etdiyi dövrlərdə, o cümlədən, müstəqil Azərbaycanın Prezidenti kimi fəaliyyət göstərdiyi 10 il ərzində həmişə xalqımızın milli maraqlarını dəqiq müəyyən etdiyini, ictimai, siyasi, iqtisadi, mədəni və digər sahələrdə qazanılan böyük uğurların memarı olduğunu görmək çətin deyil".

Yeni Azərbaycan Partiyasının memarı olan Heydər Əliyevin yaratdığı partiyanın ətrafında yüz minlərlə insanların birləşdiyini qeyd edən rayon təşkilatının sədri F.Haqverdiyev onu da bildirdi ki, bu gün xalq fəxr edir ki, Azərbaycana İlham Əliyev kimi böyük siyasətçi lider rəhbərlik edir: "Xalq şəxsiyyətlər ətrafında birləşir və ona inanır. Ölkəmiz ağır şəraitdə olarkən Azərbəycanın böyük şəxsiyyəti, ümummilli liderimiz Heydər Əliyevə üz tutdu. Çünki Azərbaycanı düşdüyü bu çətin vəziyyətdən ancaq və ancaq Heydər Əliyev siyasəti qurtara bilərdi. Xalqımızın taleyində həlledici rol oynayan ulu öndər Heydər Əliyev, bütün ömrünü doğma vətənin xoşbəxtliyinə həsr etməklə, Azərbaycana sonsuz məhəbbət bəsləyirdi. İllər, qərinələr keçsə də, ümummilli liderimiz Heydər Əliyevə xalqımızın sevgisi sonsuz olacaq. Nə qədər müstəqil Azərbaycan var, qədirbilən xalqımız var, Heydər Əliyevin də adı, ideyaları, siyasəti yaşayacaqdır. Çünki Heydər Əliyev şəxsiyyəti hələ zaman-zaman öyrənilməmiş bir dünyadır. Bu dahi insanın həyatının, siyasi fəaliyyətinin, vətəni və xalqı qarşısındakı misilsiz xidmətlərinin daha dərindən öyrənilməsinə ciddi ehtiyac vardır və zaman keçdikcə bu barədə cild-cild kitablar yazılacaqdır."

YAP Xızı rayon təşkilatının sədri cari ilin payızında keçiriləcək parlament seçkilərinə də ciddi hazırlıq işlərinin aparıldığını söylədi. Qeyd edərək vurğuladı ki, qarşıdakı parlament seçkilərində də ölkəmizin aparıcı siyasi qüvvəsi olan YAP-ın reallaşdırmaq istədiyi bütün ideyalar vətəndaş mövqeyinə və tam demokratik prinsiplərə uyğun gələcəkdir. Partiyanın İcra Katibliyinin tapşırıq və tövsiyələrinə uyğun olaraq Xızı rayon təşkilatında da müvafiq işlər görülməkdədir. İnanırıq ki, qarşıdakı parlament seçkilərini də geridə buraxdığımız digər seçki prosesləri kimi, yüksək seçki fəallığı və demokratik dəyərlərə yeni bir töhfə kimi yekunlaşacaq.

Tədbirdə çıxış edən YAP Xızı rayon təşkilatının şura üzvləri Oqtay Abdullayev, Abbas Allahyarov və başqaları çıxış edərək, bildirdilər ki, bu gün rayonun bütün kəndlərində, idarə və müəssisələrində, ulu öndər Heydər Əliyevin anadan olmasının 87 illiyi qeyd olunur. Çıxış edənlər ulu öndər Heydər Əliyevin vətən, xalq qarşısındakı misilsiz və uzaqgörən siyasətindən danışdılar. Qeyd etdilər ki, ulu öndərin özündən sonra Azərbaycana, eləcə də, artıq böyük qüvvəyə çevrilən və öz ətrafında 500 min həmfikiri birləşdirən Yeni Azərbaycan Partiyasına ölkə Prezidenti İlham Əliyevin rəhbərlik etməsindən iftixar duyurlar. Görüşün sonunda Yeni Azərbaycan Partiyasına qəbul olunan bir qrup gəncə partiyaya üzvlük vəsiqələri təqdim olundu.

RƏFİQƏ KAMALQIZI

Səs.- 2010.- 23 aprel.- S. 5.