ADPU-nun pedaqoji fakültəsinin yaranmasının 50 illiyinə həsr olunmuş tədbir keçirildi

Misir Mərdanov: "Azərbaycanın bugünkü həyatına görə müəllimə borcluyuq."

Dünən Azərbaycan Dövlət Pedaqoji Universitetinin pedaqoji fakültəsinin yaranmasının 50 illiyinə həsr olunmuş tədbir keçirildi. Yubiley tədbirindən öncə ADPU-nun kollektivi türkiyəli qonaqlarla birgə Fəxri Xiyabanda ulu öndər Heydər Əliyevin məzarını ziyarət edərək, Onun məzarı önünə əklil qoydu.

Universitetin akt zalında keçirilən yubiley tədbirində Azərbaycan Respublikasının təhsil naziri Misir Mərdanov və nazirliyin nümayəndələri, respublikamızın ali və orta ixtisas təhsili müəssisələrinin, elmi-tədqiqat institutlarının rəhbərliyi və təmsilçiləri, fakültənin məzunları olmuş orta məktəb müəllimləri, habelə, Türkiyənin Yüksək Öyrətim Kurulunun (YÖK) məsul şəxsləri və Hacəttəpə Universitetinin əməkdaşları, İranın Azərbaycandakı səfiri də iştirak edirdilər.

Tədbiri giriş sözü ilə AMEA-nın müxbir üzvü, əməkdar elm xadimi, fizika-riyaziyyat elmləri doktoru, professor Yusif Məmmədov açaraq bildirdi ki, belə bir gün təhsil işçiləri üçün əsil bayramdır. Ümumilli lider Heydər Əliyevin Azərbaycan təhsilinə sovet dönəmində, eləcə də, müstəqillik illərində diqqət yetirdiyini bildirən rektor müasir dövrdə Azərbaycan təhsilinin nailiyyətlərinə nəzər saldı.

Y.Məmmədov ADPU-nun ən böyük fakültələrindən biri sayılan pedaqoji fakültənin 1958-1959-cu tədris ilindən ibtidai təhsilin pedaqogikası və metodikası adı ilə fəaliyyətə başladığını bildirdi. Rektor fakültənin yarandığı vaxtdan indiyədək 15 minə yaxın məzunu olduğunu bildirərək, fəaliyyət göstərdiyi müddət ərzində fakültədə tədris işinin yüksək səviyyədə qurulmasını, tələbələrin yüksək ixtisaslı müəllim kadrları kimi hazırlanmasını, onların mənəvi-estetik tərbiyəsinə və ləyaqətli vətəndaş kimi formalaşmasına həmişə ciddi diqqət yetirildiyini diqqətə çatdırdı.

Fakültədə pedaqoji təhsilin müasir nəzəri-praktik məsələlərini araşdıran "Pedaqoji təhsilin problemləri" elmi-tədqiqat laboratoriyası yaradılmışdır. Eyni zamanda, fakültədə elmi-tədqiqat və elmi-metodik işlərin planlaşdırılması, dərslik və dərs vəsaitlərinin, proqramların yazılması üçün səmərəli əməli fəaliyyət həyata keçirilir. Fakültədə pedaqoji kadr hazırlığına yüksək səviyyədə diqqət yetirilir və pedaqoji kadr hazırlığında mühüm rol oynayan pedaqoji təcrübənin səmərəli keçirilməsi həmişə diqqət mərkəzində saxlanılır:"Fakültədə 5 kafedra fəaliyyət göstərir. Hazırda fakültədə 1122 nəfər tələbə təhsil alır. Onların təhsil-tərbiyəsi ilə 10 nəfər elmlər doktoru, professor, 40 nəfər elmlər namizədi, dosent və 50 nəfər müəllim məşğul olur. Fakültədə 91 nəfər magistrant təhsil alır. 2008-2009-cu tədris ilindən fakültədə təhsil kredit sistemi əsasında aparılır."

Pedaqoji fakültə Gəncə Dövlət Universitetinin və Azərbaycan Müəllimlər İnstitutunun müvafiq fakültələri ilə sıx əməkdaşlıq edir. Fakültənin əməkdaşları universitetin elmi-pedaqoji və ictimai-mədəni həyatında da yaxından iştirak edirlər.

Yubiley mərasimində çıxış edən pedaqoji fakültənin dekanı Fərrux Rüstəmov bu illər ərzində fakültəyə göstərilən diqqət nəticəsində saysız müəllimlər ordusunun yetişdiyini bildirdi. O, Azərbaycan Prezidenti İlham Əliyev cənablarının təhsillə bağlı söylədiyi ifadəni xatırlatdı:"Təhsil nazirliyinin aydın konsepsiyası, strategiyası vardır." Cəmiyyətin ahəngdar inkişafında maddi sərvətlərin insan kapitalına çevrilməsində təhsilin rolu olduğunu qeyd edən dekan 1921-ci ildən fəaliyyətdə olan fakültənin nailiyyətlərinə nəzər saldı. İlk olaraq qeyd etdi ki, 1921-ci ildə Nəriman Nərimanovun dekreti əsasında yaradılan institut zəngin yol keçmişdir. Elmi-pedaqoji kadrların hazırlanmasında bu fakültənin öz payı olduğunu qeyd edən Fərrux Rüstəmov hələ ötən əsrin 50-ci illərində SSRİ Pedaqoji Akademiyasının göstərişi əsasında belə bir fakültənin yaradılmasının nəzərdə tutulduğunu bildirdi. Belə ki, SSRİ məkanı üçün xarakterik olan fikir mövcudluğu pedaqoji kadr hazırlığına məhz tələb olunan səviyyədə addımlar atmağı tələb edirdi. Aparılan təcrübələr göstərmişdir ki, ibtidai təhsilin nəticələri tam şəkildə özünü doğrultmamış və ibtidai təhsil sistemində müasiryönlü kadrların tələbatına ehtiyac vardır. 1958-1959-cu illərdə fakültənin təməli qoyulmuşdur:" 200 mindən artıq Ermənistanda, yarım milyon Gürcüstanda yaşayan azərbaycanlılara pedaqoji kadr potensialı tələb olunurdu. Bu fakültənin bir çox dekanları onun inkişafına təkan vermişlər. Belə ki, Azərbaycanın Makarenkosu adlandırılan Mərdan Mərdanov, akademik Mehdi Mehdizadə və başqaları bu fakültəyə rəhbərlik etmişlər. 1921-ci ildə fakültədə mövcud olan ənənələr qorunub saxlanılır və yeniləri buraya əlavə olunur. Pedaqoji fakültənin də fəaliyyətinin keyfiyyətcə yeni mərhələyə daxil olmasına əlverişli şərait yaradılmışdır. Belə ki, son illər bütün universitetdə olduğu kimi, pedaqoji fakültədə də tədrisin keyfiyyəti xeyli yüksəlmiş, təhsilin yeni texnologiyalar əsasında təşkilində ciddi uğurlar qazanılmışdır. Fakültədə 2009-cu ildən Təhsil Nazirliyinin layihəsi əsasında pilot fakültə kimi ibtidai sinif müəllimi ixtisası əsasında yeni təlim üsulları ilə "Təhsilin əsasları" fənni tədris edilir. Bunun üçün fakültədə müvafiq texnoloji avadanlıqlarla təchiz edilmiş "Təhsilin əsasları" adlı ixtisaslaşdırılmış auditoriya yaradılmışdır".

Tədbirdə çıxış edən təhsil naziri Misir Mərdanov 50 yaşını qeyd edən pedaqoji fakültənin bütün müəllim və tələbələrini təbrik etdi: "Azərbaycan cəmiyyətində müəllimə, təhsilə böyük ehtiram var. Müəllim sənəti müqəddəs bir peşədir. Ulu öndər Heydər Əliyev vaxtilə müəllimə yüksək qiymət vermiş, bu gün də İlham Əliyev cənabları tərəfindən bu peşə sahiblərinə diqqət yetirilir. Son illərdə pedaqoji universitetin həm Azərbaycanda, həm də beynəlxalq miqyasda nüfuzu artmaqdadır. Bu universitetdə təhsil almaq istəyində olanların sayı çoxalmışdır. Fakültənin 15 min məzunu yetişən nəsli tərbiyə edir. Odur ki, Azərbaycan təhsil sistemində bu fakültənin yeri xüsusidir. İnsan ömrünün son gününə qədər öyrəndiklərinin çoxunu mən deyərdim ki, məktəb bazasında alır, həm də tərbiyəsinin əsası bu məkanda qoyulur. Azərbaycanın bugünkü həyatına görə müəllimə borcluyuq. 50 yaşını qeyd edən fakültənin qarşısında isə məsuliyyətimiz daha böyükdür. Belə bir bayram əhval-ruhiyyəsində universitetin bir sıra müəllim heyəti təhsil ocağının təqdimatı ilə nazirlik tərəfindən bir sıra mükafatlara layiq görülmüşdür". Misir Mərdanov 50 illik yubiley münasibətilə universitetin bir sıra pedaqoji işçisini nazirlik tərəfindən hazırlanmış mükafatlarla təltif etdi. Azərbaycan pedaqoji elminin inkişafında səmərəli xidmətləri nəzərə alınaraq, universitetin pedaqoji fakültəsinin dekanı Fərrux Rüstəmov, dekan müavini Zahid Xəlilov qabaqcıl təhsil işçisi döş nişanı, Qədimova Jalə, Abdullayeva Zemfira, Təhsil Nazirliyinin fəxri fərmanı ilə və başqaları isə bu və ya digər mükafatlarla təltif olundular.

Nəzakət ƏLƏDDİNQIZI

Səs.- 2010.- 23 aprel.- S. 6.