Sağlam ekoloji mühit insan həyatı üçün əhəmiyyətli məsələdir

Hüseynqulu Bağırov: "Ekologiya ili" çərçivəsində görülən işlər çoxsahəlidir"

"Ekoloji sahəyə çox böyük diqqət göstərilir və bu da təbiidir. Bu, elə bir sahədir ki, buraya qoyulan vəsaiti, bəlkə də, Azərbaycan iqtisadiyyatı da, vətəndaşları da görmürlər. Amma bunu həm indiki nəsillər, həm də gələcək nəsillər görəcəklər. Çünki ekologiya məsələləri hər bir ölkə üçün, hər bir vətəndaş üçün vacib olmalıdır. Bu, insanların sağlamlığıdır.

Sağlam ekoloji mühit, sağlam hava, təmiz su- bütün bunlar insanın həyatı üçün ən əhəmiyyətli məsələlərdir." Dövlət başçısı İlham Əliyev bu məsələlərin həllinə diqqətin daha da artırılmasını qarşıya ən ümdə məqsəd kimi qoyur.

Dünən Yeni Azərbaycan Partiyasının mərkəzi qərargahında ənənəvi keçirilən mətbuat konfransında ekologiya və təbii sərvətlər naziri Hüseynqulu Bağırov son illər ekoloji problemlərin həlli istiqamətində görülən işlər, "Ekologiya ili" çərçivəsində həyata keçiriləcək tədbirlər və perspektivlər barədə ətraflı məlumat verdi. H.Bağırov bildirdi ki, ekoloji problemlərin həlli dövlət siyasətinin əsas tərkib hissəsi kimi daim diqqətdədir. Son illərdə görülən işlərin miqyası daha da genişlənib. İqtisadi, sosial, mədəni və digər sahələrin inkişafına, eləcə də, ətraf mühitin sağlamlaşdırılması, xalqımızın rifahının yaxşılaşdırılması naminə təbii sərvətlərdən istifadə məsələlərinə göstərilən diqqət və qayğı, həyata keçirilən ardıcıl tədbirlərin nəticəsində qazanılmış uğurlar əhalinin ekoloji şüurunda da müsbət dəyişikliklərə gətirib çıxarıb. Belə ki, ekoloji durumun yaxşılaşdırılmasına yönəldilmiş tədbirlər ölkə vətəndaşlarının fəal iştirakına zəmin yaradır.

H.Bağırov qeyd etdi ki, dövlət başçısı İlham Əliyev tərəfindən 2010-cu ilin "Ekologiya ili" elan olunması bu sahəyə diqqətin göstəricisidir. "Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün kompleks Tədbirlər Planı" mövcud problemlərin həllinə, xüsusilə, Bakı şəhəri və Abşeron yarımadasında ətraf mühitin yaxşılaşdırılması istiqamətində aparılan işlərə böyük təkan vermişdi. Bu istiqamətdə iri layihələr uğurla həyata keçirilmiş və hazırda davam etdirilir. Ətraf mühitə təsirlər iqtisadiyyatın müxtəlif sahələri ilə bağlıdır.

Nazir bildirdi ki, "Ekologiya ili" çərçivəsində görülən işlər sırasında əsas yeri yaşıllıqların artırılması tutur. "Atmosfer sərhəd tanımır" fikrini xüsusi qeyd edən ekologiya və təbii sərvətlər naziri vurğuladı ki, qlobal hadisələr də bunu təsdiq edir. Dəniz suyunun çirklənmədən qorunması, su ehtiyatlarına səmərəli yanaşılması da obyektiv olaraq, Yer kürəsində gərginləşmiş ətraf mühitinə müsbət təsir göstərən amillərdir. Qeyd olundu ki, bu il çərçivəsində tədbirlər silsiləsi çoxsahəli və çoxtərəflidir. "2010-2014-cü illər üçün əlavə Tədbirlər Planı hazırlanıb. Hazırda son tamamlanma işləri görülür. Müxtəlif nazirliklər bununla bağlı öz fikir və təkliflərini bildirəcəklər. Hazırda icra edilməyə hazır olan layihələr var. Elə layihələr də var ki, onlar mövsümü xarakter daşıdığı üçün maliyyəşdirilməsinə başlanılmadan hazırlıq işləri görülür. Bu, ilk növbədə, yaşıllaşdırma işləri ilə bağlıdır. Baxmayaraq ki, Azərbaycan az meşəli ölkədir, meşələrdən istifadənin qarşısını almaq üçün obyektiv və subyektiv çətinliklərə rastlaşırıq, lakin ölkəmizdə yaşıllaşdırma işləri geniş miqyas alıb."

H.Bağırov söylədi ki, meşələrin mühafizəsi, bərpası, yeni meşəliklərin salınması sahəsindəki göstəricilər gündən-günə artır: "Son 10 ildə meşə örtüyü 0,4 faiz artıb. Bu, beynəlxalq mənbələrdən də təsdiqini tapıb. Bunun müəyyənləşdirilməsinin ən etibarlı üsulu peyk aerofoto çəkilişlərin təhlilidir."

Nazir son illərdə paytaxt və respublikamızın bölgələrində həyata keçirilən yaşıllaşdırma işləri barədə ətraflı məlumat verdi. Qeyd etdi ki, Zığ-Heydər Əliyev adına Beynəlxalq Hava Limanı yolunun ətrafında xeyli sayda ting əkilib. Əzizbəyov dairəsi - Heydər Əliyev adına Beynəlxalq Hava Limanı yolu ətrafında yaşıllıqların salınması üçün torpaq işləri aparılmış, minlərlə ağac və kol əkilmiş, xeyli əraziyə yaşıl çəmən salınmışdır. Yaşıllaşdırılmış ərazilərin suvarılması üçün əlavə olaraq artezian quyusu qazılmış, suvarma şəbəkəsi yaradılmışdır: "Dövlət başçısı İlham Əliyevin Abşeron yarımadasında 3 milyon ağac əkilməsi ilə bağlı tapşırığının icrası ilə əlaqədar yaşıllaşdırılacaq ərazilər seçilmiş, həmin ərazilərdə, keçmiş Binə Ticarət Mərkəzinin ərazisi də daxil olmaqla, nazirliyin daxili imkanları hesabına torpaq işləri görülmüş, xeyli sayda ağaclar, xüsusilə, zeytun əkilmişdi. Bakı-Qazax, Bakı-Astara yolunun ətrafında da yaşıllıqlar salınmaqda və getdikcə daha da artırılmaqadır. Suvarma sistemi yaradılır".

H.Bağırov zooloji parkın yaradılması barədə də ətraflı məlumat verdi. Vurğuladı ki, bununla bağlı müxtəlif fikirlər səslənir. Məqsəd müasir tələblərə cavab verən parkın salınmasıdır.

Nazir Abşeron yarımadasında neft tullantıları və digər zərərli maddələrlə çirklənmiş torpaqların və göllərin bərpasının da əsas prioritet istiqamət seçildiyini söylədi. Göllərin və ətrafının təmizlənməsi, torpaqların rekultivasiyası hesabına ərazilərin reabilitasiyası nəzərdə tutulmuşdur: "Bununla bağlı hərtərəfli araşdırmalar aparılmış, müvafiq layihə təklifləri hazırlanmışdır. Bu işlərin, ilkin olaraq, Zığ gölündə görülməsinə başlanılıb. Nazirlər Kabinetinin cari ilin birinci rübünün sosial-iqtisadi inkişafının yekunlarına həsr olunmuş iclasında da dövlət başçısı İlham Əliyev bu məsələyə xüsusi diqqət yönəltdi. Bakı buxtasının təmizlənməsi işləri də bu il ciddi aparılmalıdır. Bakı buxtasına çirkab axıdan kanalizasiya xətlərində ciddi tədbirlər görülməli, təmizləyici qurğular tikilməlidir. Çünki Bakı buxtası Bakının əsas gözəlliklərindən biridir".

H.Bağırov onu da vurğuladı ki, digər prioritet istiqamət dəniz suyunun duzsuzlaşdırılması layihəsidir: "Bu, içməli su probleminin olmasından irəli gəlmir. Azərbaycanın lazımi miqdarda su ehtiyatları var. Onlara ehtiyatla, qayğı ilə yanaşılsa, ölkəmizin uzunmüddətli inkişafını təmin edəcək. Biz, sadəcə olaraq, çaylarımızı təmiz saxlamalıyıq. Yeraltı sularımızı çirklənmədən qorumalıyıq. Lakin bu sırada Xəzər dənizi kimi tükənməz su ehtiyatı olduğu üçün bu suyun da şirinləşdirilib istifadəsinə hazır olmalıyıq. Təsərrüfat ehtiyaclarını ödəmək üçün də su çox tələb olunur. Bunun üçün pilot layihələr həyata keçiriləcək. Bu prosesi sınaqdan keçirməklə, su ehtiyatı mənbələrindən biri kimi dəniz suyundan istifadə etmək texnologiyasına hazır ola bilərik. Zəruri olan qurğu üçün tender elan olunub."

Sonda ekologiya və təbii sərvətlər naziri media nümayəndələrini maraqlandıran sualları cavablandırdı.

RƏFİQƏ KAMALQIZI

Səs.- 2010.- 24 aprel.- S. 7.