“Azərbaycan iqtisadiyyatı möhkəm təməllər üzərində qurulub"

Müsahibimiz YAP Siyasi Şurasının üzvü, iqtisadçı-ekspert Aydın Hüseynovdur

- "Nabucco" layihəsinin tezliklə reallaşması mümkündürmü?

- "Nabucco" layihəsinin nə vaxt reallaşacağını söyləmək çətindir. Ancaq hesab edirəm ki, bu layihə mütləq reallaşacaq. Bir çox siyasi situatsiyalar da bunu deməyə əsas verir. Təbii ki, adıçəkilən layihənin reallaşmasının ölkəmiz üçün müsbət tərəfləri var. Bilirsiniz ki, ölkəmizin əsas böyük boru ixrac kəmərləri Bakı-Tbilisi-Ceyhan və Bakı-Novorossiysk neft xətləridir. Eyni zamanda, "Nabucco" layihəsinin də reallaşması ölkəmizin maraqlarına uyğundur. Məlumdur ki, dünyanın əksər ölkələri, o cümlədən, Avropa ölkələri respublikamızla əməkdaşlıq etməyə meyil göstərirlər. Çünki Azərbaycan stabil dövlətdir. Həmçinin, Azərbaycan iqtisadiyyatı möhkəm təməllər üzərində qurulub. Prezident İlham Əliyevin yürütdüyü siyasət ondan ibarətdir ki, respublikamız xarici ölkələr əməkdaşlığını genişləndirsin və Azərbaycan günü-gündən inkişaf etsin. Biz bu gün uğurlu nailiyyətləri görməkdəyik. Azərbaycan sürətlə inkişaf edir və əhalinin sosial müdafiəsi gücləndirilir. Bu gün dünya bazarında neftin qiyməti bahalaşmaqdadır. Təbii ki, bu da, öz növbəsində, neft ölkəsi olan Azərbaycan iqtisadiyyatına müsbət təsir göstərən amillərdəndir. Heç kəs respublikamızın iqtisadi inkişafını inkar edə bilməz. Beynəlxalq maliyyə qurumları da öz hesabatlarında Azərbaycanın inkişaf etdiyini qeyd edirlər. Çünki respublikamızda iqtisadi inkişafın əsasını Heydər Əliyev kimi böyük siyasətçi qoyub. Biz də hazırda bunun bəhrəsini görməkdəyik. Bir çox beynəlxalq və regional layihələr Azərbaycanın iştirakı olmadan həyata keçirilmir. Bu, həm ölkə rəhbərliyinin apardığı uğurlu siyasətdən, həm də ölkəmizin təbii sərvətlərlə zəngin olmasından irəli gəlir. Hesab edirəm ki, "Nabucco" layihəsinin də reallaşması Azərbaycanla Avropa ölkələrinin əməkdaşlığını daha da genişləndirəcək.

- Regionların sosial-iqtisadi inkişafı ilə bağlı görülən işlər barəsində nə deyə bilərsiniz?

- İlk öncə, onu qeyd edim ki, "Regionların sosial-iqtisadi inkişafı ilə bağlı qəbul olunan I Dövlət Proqramı" uğurla həyata keçirildi. Bunun nəticəsində regionlarda yeni iş yerləri yaradıldı, infrastruktur bərpa edildi. Məlumdur ki, bir ərazini iqtisadi cəhəddən inkişaf etdirmək üçün həmin ərazinin infrastrukuru bərpa olunmalıdı. Yəni bura yol və kommunal sahələri aid etmək olar. II Dövlət Proqramı da uğurla icra edilməkdədir. Ölkə başçısı İlham Əliyevin qeyd etdiyi kimi, "Bütün sosial- iqtisadi göstəricilərimiz yüksək səviyyədədir". 2009-2013 illəri əhatə edən İkinci Proqramın icrası nəticəsində dövlət büdcəsinin gəlirləri artacaq və respublikamızda iqtisadi inkişaf daha da sürətlənəcək. Bu gün respublikamızda 800 mindən artıq yeni iş yeri yaradılıb ki, bunun da böyük əksəriyyəti regionların payına düşür. Dövlət Statistika Komitəsinin məlumatına görə, cari ilin əvvəlindən respublikamızda müxtəlif ticarət və sosial müəsissələr tikilib istifadəyə verilib. Bakıda "Dalğa Plaza" İş Mərkəzi, Naxçıvanda avtomobil zavodu, Gəncə şəhərində "Ramada Plaza", Göyçay və Ağdaşda olimpiya-idman kompleksləri, Qəbələdə "Gilan" piano zavodu, "Qafqaz Resort" mehmanxanası, "Fitnes" sağlamlıq mərkəzi, Avtovağzal binası tikilib istifadəyə verilib. Yəni bütün bunlar onu göstərir ki, Abşeron yarımadası da daxil olmaqla, ölkəmizin bütün regionları sürətlə inkişaf etməkdədir. Sevindirici haldır ki, Prezident cənab İlham Əliyev bölgələrdə görülən işlərlə şəxsən yaxından tanış olur. Ümumiyyətlə, onu qeyd etməliyəm ki, regionların inkişaf etdirilməsi həm əhalinin məşğulluq probleminə, həm də qeyri-neft sektorunun inkişafına müsbət təsir edir. Bütün bunlar iqtisadiyyatımızın inkişafını daha da sürətləndirir.

- Prezident İlham Əliyev bir müddət öncə "Azərbaycan Respublikasında 2010-2104-cü illərdə turizmin inkişafına dair Dövlət Proqramı"nı təsdiq edib. Bu, ölkəmizdə turizmin inkişafına nə kimi təsir göstərəcək?

- Bir çox ölkələr turizmdən böyük gəlir əldə edirlər. Yəni əksər ölkələrin dövlət büdcəsi, əsasən, turizm sahəsindən gələn gəlirlər hesabına formalaşır. Bizim ölkəmizin də böyük turizm potensialı mövcuddur. Turizmin inkişafı ilə bağlı qəbul edilən və 2003-2005-ci illəri əhadə edən I Dövlət Proqramı uğurla həyata keçirildi. İndiyə qədər 8 regionda turizm informasiya mərkəzləri yaradılıb. Turizm potensiallı regionlarda yeni turizm obyektləri yaradılıb. Ötən il ölkəmizə 1,4 milyondan çox xarici turist səfər edib. Bu, həm ölkə rəhbərliyinin diqqət və qayğısı nəticəsində turizm sektorunun inkişaf etməsi, həm də respublikamızın təbii-coğrafi şəraiti ilə əlaqədardır. Məlumdur ki, bizim, eyni zamanda, Xəzərsahili ərazilərimiz də turizm üçün əlverişli sahələrdəndir. Həmçinin, Azərbaycanın Naftalan kimi müalicəvi bölgələri də var. Bu da, öz növbəsində, respublikada turizmin inkişafına təsir göstərən amillərdən hesab olunur. Qeyd etməliyəm ki, turizm sahəsinin inkişaf etdirilməsi ölkə iqtisadiyyatına bir sıra müsbət təsirlər göstərəcək: regionların inkişaf etməsi və əhalinin işsizlik probleminin həll edilməsi, qeyri-neft sektorunun inkişafı və s. Ümid edirəm ki, turizmin inkişafı ilə bağlı qəbul edilmiş II Dövlət Proqramı da uğurla icra olunacaq.

- İqtisadçı-ekspert olaraq, aqrar sektorun inkişafı sizi qane edirmi?

- Azərbaycanda aqrar sektor dotasiya ilə işləyən sahədir. Etiraf etməliyik ki, ölkə rəhbərliyinin qayğısı nəticəsində respublikamızda kənd təsərrüfatı inkişaf etməkdədir. Bu gün, demək olar ki, əksər ərzaq məhsulları ilə ölkəmiz özünü təmin edə bilir. Nəinki təmin edir, həm də bizim kənd təsərrüfatı məhsullarımız xaricə ixrac olunur. Qeyd edim ki, bizim torpaqlarımızda mineral gübrədən az istifadə edilir. Bunun nəticəsidir ki, Azərbaycanın kənd təsərrüfatı məhsulları ekoloji baxımdan yüksək qiymətləndirilir. Aqrar sektor iqtisadiyyatda aparıcı sahələrdən hesab olunur. Lakin bu sahəyə düşünülmədən sərmayə qoymaq olmaz. Bu ayın 1-nə olan statistik məlumata görə, ölkəmizdə 7 min tondan çox tərəvəz toplanıb. Kənd təsərrüfatının ümumi məhsulu 1.5 faiz, o cümlədən, bitkiçilik məhsulları istehsalı 10,1 faiz, heyvandarlıq məhsulları istehsalı 1,2 faiz artıb. Təbii ki, bütün bunlar Azərbaycanda aqrar sektorun inkişafına göstərilən diqqət və qayğıdan irəli gəlir.

- Beynəlxalq maliyyə böhranı ölkəmizə təsirsiz ötüşdü. Yaxın gələcəkdə adıçəkilən böhran ölkəmizə təsir göstərə bilərmi?

- Əvvəla, onu qeyd edim ki, dünyanın özündə sabitləşmə prosesi gedir. Maliyyə böhranın qarşısı adıçəkilən böhrandan zərər çəkmiş ölkələr tərəfindən alınmaqdadır. Lakin sevindirici haldır ki, bir çox ölkələr ziyan çəksələr də, Azərbaycan iqtisadiyyatı maliyyə böhranından zərər çəkmədir. Bu da ölkə başçısı İlham Əliyevin apardığı düzgün, elmə əsaslanmış iqtisadi siyasətindən irəli gəlir. Bu gün ölkəmizdə ümumi daxili məhsul 5,4 dəfə artıb. Qeyr-neft sektorunda əlavə dəyər istehsalı 4,3 faiz artıb, həmçinin, orta hesabla ölkənin hər bir sakini üzrə ÜDM istehsalı 4,2 faiz artaraq 1074,5 manata bərabər olub. Bu da, onu göstərir ki, dünyada hələ də maliyyə böhranının mövcud olmasına baxmayaraq, Azərbaycan iqtisadiyyatı hərtərəfli inkişaf edir.

ANAR MƏCİDZADƏ

Səs.- 2010.- 28 aprel.- S. 9.