“Regionların sosial-iqtisadi Dövlət Proqramı"uğurla icra olunmaqdadır

Astara rayonunda Dövlət Proqramından irəli gələn işlər yüksək səviyyədə həyata keçirilir

Dünyada hökm sürən maliyyə böhranına baxmayaraq, ölkəmizin sosial-iqtisadi inkişafı öz axarı ilə davam edir, həyatın bütün sahələrində yüksək tərəqqi qeydə alınır. Bütün bu uğurlar onu sübut edir ki, ölkəmiz sürətli inkişaf yolundadır. Başqa sözlə, özünün daxili imkanlarına, zəngin neft-qaz sərvətlərinə əsaslanan Azərbaycan Respublikası artıq 15 ildən çoxdur ki, müstəqil iqtisadi siyasət yürüdür, qlobal enerji layihələrinin təşəbbüskarı və əsas iştirakçısı kimi regionda başlıca nüfuz sahibinə çevrilir.

2009-2013-cu illəri əhatə edən "Regionların sosial-iqtisadi inkişafı Dövlət Proqramı"nın icrasının birinci ilinin yekunları ilə əlaqədar Astara rayonunda geniş şura iclası keçirildi. Astara rayon icra hakimiyyətinin başçıs Mahir Quliyev bildirdi ki, az vaxt keçməsinə baxmayaraq, yola saldığımız il ərzində sənədin icrası ilə bağlı çox mühüm tədbirlər həyata keçirilib, regionların inkişafı ilə bağlı genişmiqyaslı işlər davam etdirilib, rayonlarda abadılıq, quruculuq, yenidənqurma işləri sürətləndirilib. Prezidenti İlham Əliyevin yürütdüyü sosial-iqtisadi islahatlar siyasəti nəticəsində bölgələrdə, o cümlədən, Astara rayonunun qəsəbə və kəndlərində də inkişaf yeni mərhələyə yüksəlib. Astara rayon icra başçısı M.Quliyev Dövlət Proqramına uyğun olaraq, rayonda görülən tədbirlər nəticəsində sakinlərin güzəranının xeyli yaxşılaşdığını, yeni iş yerlərinin açıldığını, böyük sənaye potensialının formalaşdığını söylədi:

- Artıq bir neçə ildir ki, ölkəmizin sosial-iqtisadi inkişafını müəyyən edən Dövlət Proqramı icra edilir. Bu proqram 2004-cü ildə qəbul edilmiş regionların sosial-iqtisadi inkişafı Dövlət Proqramının məntiqi davamıdır. Çox sevindirici haldır ki, 2009-cu ildə başlanmış növbəti proqram da uğurla icra edilir. Baxmayaraq ki, 2009-cu il bütün dünya üçün çox çətin, ağır il olub. Lakin Azərbaycan bütün bu çətin sınaqlardan şərəflə çıxı bildi. Belə ki, 2009-cu ildə iqtisadi artım 9,3 faiz, sənaye istehsalının artımı 8,6 faiz, inflyasiya isə 1,5 faiz olubdur.

Bu gün ən əsas bir faktı vurğulamaq dazımdır ki, ölkəmizdə son 5-6 il ərzində sahibkarlığın və regionların inkişafı ilə bağlı olan məsələlrin həlli daha geniş vüsət alıb. Azərbaycan dövləti bu sahədə də öz iradəsini göstərib. Sahibkarlar həm siyasi, həm də maddi tərəfdən dəstəklənir. Fermerlərə subsidiyalar onlara lazım olan avadanlığın, texnikanın güzəştli şərtlərlə, lizinq yolu ilə verilməsi, bütün bunlar kənd təsərrüfatını sahibkarlığı stimullaşdıran amillərdir.

Qeyd edim ki, 2004-2008-ci illər Dövlət Proqramı ilə əlaqədar respublikamızın bütün regionlarında, o cümlədən, Astara rayonunda da uğurlu olub. Son illər modul tipli elektrik stansiyası, qaz kompressor stansiyası, Astara yük terminalı, əlil və şəhid ailələri üçün 32 mənzilli yaşayış binası, 18 yeni orta məktəb binası, 4 mehmanxana tikilmiş, bir turizm-istirahət mərkəzi istifadəyə verilibdir. Rayonda 7 məktəb binası, bir çox mədəniyyət və tarixi abidələrin əsaslı təmir edilib, şəhərin küçə və meydanları, parkları abadlaşdırılıb, qəsəbə və kəndlərə gedən 29,6 km uzunluğunda yollar asfaltlaşdırılıbdır.

Astara şəhərinin mərkəzində ümummilli lider Heydər Əliyev adına prospekt, mədəniyyət və istirahət parkı salınmış, muzey yaradılmışdır. Hazırda rayonumuzda olimpiya idman kompleksi və Astara gömrük keçid məntəqəsinin tikintisi davam etdirilir.

Bu illər ərzində rayonun kənd təsərrüfatında da böyük canlanma olmuşdur, xüsusilə, Azərbaycan Respublikası Prezidentinin "Kənd təsərrüfatı istehsalçılarına dövlət dəstəyi haqqında" 23 yanvar 2007-ci il tarixli Sərəncamına əsasən, kənd təsərrüfatı istehsalçılarına məhsul istehsalı üçün istifadə etdikləri yanacağın, motor yağları və mineral gübrələrin orta hesabla 50 faizinin dövlət tərəfindən ödənilməsi kənd təsərrüfatı sahəsində çalışan hüquqi və fiziki şəxslərdə böyük ruh yüksəkliyi yaradıb, onların torpağa bağlılığını və həvəslə işləməsinə sövq edibdir. "Aqrolozinq" ASC-nin aqroservis filialı tərəfindən 67 nəfər kənd təsərrüfatı istehsalçılarına güzəştli qaydada 210 ton azot gübrəsi satılmışdır. Rayonda məhsul istehsalçılarının kənd təsərrüfatı texnikası ilə təmin olunması da diqqət mərkəzində olmuşdur. Bütün bunlar rayonda kənd təsərrüfatı məhsullarının artımına müsbət təsir göstərir. Bu gün Astarada geniş vüsət alan çayçılıq sahəsində də uğurlu işlər aparılır. Belə ki, çayçılıq sahəsində 120 ha sahədə aqrotexniki qulluq işləri aparılıb, çay kollarına mineral gübrələr verilibdir. 2009-cu ildə 263,1 ton yaşıl çay yarpağı tədarük olunub, emal müəssisələrinə təhvil verilib. Faraş tərəvəz istehsalından ötrü 2009-cu ildə əkin sahələrində əsasən, məhsul yığımı və təmizləmə işləri aparılıb, əkin sahələrini mövsümi yağan yağışların sel sularından qorumaq üçün kanallar lil və palçıqdan təmizlənibdir. Taxıl və dənli bitkilərin istehsalı ilə əlaqədar 2009-cu ildə kənd təsərrüfatı müəssisələri və əhali təsərrüfatlarında 1158,5 ha sahədə dənli və dənli paxlalı bitkilər əkini həyata keçirilibdir. 586,5 ha sahədə taxıl, o cümlədən, 235,5 ha sahədə çəltik əkilib, 2229,2 ton taxıl, o cümlədən, 1540,8 ton çəltik istehsal edilərək, ziyanverici və həşəratlara qarşı mübarizə tədbirləri həyata keçirilibdir. 2009-cu ildə sitrus və meyvə bağlarında 22564 ton meyvə tədarük olunubdur.

Sosial problemlərin həlli ilə bağlı rayonda ciddi işlər görülübdür. Belə ki, 2009-cu ildə 786 evə qaz xətti çəkilib, 1429 p/m müxtəlif diametrli qaz xətləri üzərində təmir-bərpa işləri aparılıb, əhali abunəçiləri üçün 786 ədəd məişət qaz sayğacı quraşdırılıb, 33 ədəd qaz tənzimləyici şkaf təmir edilərək işlək vəziyyətə gətirilibdir.

2010-cu ilin yanvar-fevral aylarında Pensər və Kakalos kəndlərində 9 km-lik müxtəlif diametrli, orta təzyiqli qaz xətləri üzərində təmir-bərpa işləri aparılıb, 8 ədəd qaz tənzimləyici şkaf təmir olunaraq, 200 evə qaz sayğacı quraşdırılıbdır. Həmin əraziyə təbii qazın verilməsi bərpa edilibdir.

Pensər kənd 2 saylı orta məktəbi üçün 480 yerlik, Rinə kənd orta məktəbi üçün 360 yerlik, Pəlikəş kənd orta məktəbi üçün 240 yerlik, Marzəsəy və Qəcimardə kənd əsas məktəbləri üçün 180 yerlik, Vovada kənd ibtidai məktəbi üçün 80 yerlik yeni məktəb binaları tikilib istifadəyə verilibdir. 620 yerlik Kijəbə qəsəbə orta məktəbinin əsaslı təmiri başa çatdırılıb, məktəb inventar və avadanlıqlarla təmin edilibdir.

Bütün bu işlərlə yanaşı, rayon ictimaiyyətinin çoxsaylı müraciətlərini, arzu və təkliflərini nəzərə alaraq, 2010-cu ildə dövlət proqramı çərçivəsində əlil və şəhid ailələri üçün 16 mənzilli yaşayış binasının, Astara, Şahağac magistral yolunun tikintisi, su və kanalizasiya xətlərinin çəkilməsi nəzərdə tutulur.

Ümumiyyətlə, bütün bu işlər onu deməyə əsas verir ki, Astara rayon ictimaiyyəti ümummilli liderimiz Heydər Əliyevin ideyalarını uğurla həyata keçirən ölkə Prezidenti İlham Əliyevin daxili və xarici siyasət xəttini - birmənalı olaraq, dəstəkləyir və müdafiə edirlər.

RƏFİQƏ KAMALQIZI

Səs.- 2010.- 28 aprel.- S. 11.