Strateji inkişaf konsepsiyası

İlham Əliyev: "Strateji xəttimiz ondan ibarətdir ki, bütün şirkətlərimiz beynəlxalq səviyyəli şirkətlər kimi fəaliyyət göstərsinlər"

"Azərbaycanda bütövlükdə bu il də keçən ildəki kimi uğurlu iqtisadi inkişaf davam etmişdir. Baxmayaraq ki, keçən il maliyyə və iqtisadi böhran dünyada gedən proseslərə çox güclü təsir göstərmişdir. Azərbaycanda 2009-cu ildə iqtisadi inkişaf baxımından çox yüksək göstəricilər əldə olunmuşdur. 2010-cu ildə də bu müsbət meyillər davam etmişdir və iqtisadiyyatımızın bütün sahələrində inkişaf var. Bu rəqəmlər bir daha onu göstərir ki, Azərbaycanda iqtisadi islahatlar düzgün istiqamətdə aparılır"- Azərbaycan Prezidenti İlham Əliyevin dediyi bu sözlər Azərbaycanda real durumu daha yaxşı ifadə edir.

Qeyri-neft sektorunun yüksəliş dövrü

Dövlət Statistika Komitəsinin məlumatına görə, 2010-cu ilin 1-ci yarısında iqtisadi inkişaf 3,7 faiz təşkil edib. Nəzərə alsaq ki, keçən ilin iqtisadi inkişafının bazası çox yüksək idi, bu, çox yüksək göstəricidir. Ümumiyyətlə, bu gün Azərbaycanda iqtisadi inkişafın istiqamətləri çoxşaxəlidir və qeyri-neft sektorunun inkişafına üstünlük verilir. Yəni, neft-qaz sektorundan əldə edilmiş gəlirlər ölkənin ümumi inkişafına böyük təkan verir.

Ötən müddətdə sənaye potensialının inkişafında müsbət meyillər davam etmişdir. Neft sektorunda artım 2,4 faiz, qeyri-neft sektorunda isə 15,3 faiz olub. Qeyri-neft sektorunun 15 faizdən çox artması Azərbaycan iqtisadiyyatının çoxşaxəli iqtisadiyyat olduğunu göstərir. Altı ayda 25 milyon ton neft, 13 milyard kubmetr qaz hasil edilib.

Hökumət qarşısına qeyri-neft sektorunun inkişafına dəstəyi artırmağı prioritet vəzifə kimi qoyub. Azərbaycan Prezidenti bunu belə ifadə edir: "Bizim məqsədimiz neft amilindən uğurla istifadə edib Azərbaycanın bütün sahələrini inkişaf etdirməkdən ibarət olmuşdur və biz bu məqsədə çatmışıq. Biz növbəti illərdə bu meyilləri gücləndirməliyik. Elə etməliyik ki, uzun illər, onilliklər bundan sonra Azərbaycan iqtisadiyyatı neft amilindən öz asılılığını maksimum dərəcədə azaltsın".

Göründüyü kimi, Prezident İlham Əliyev hər zaman ölkə iqtisadiyyatında əsas prioritet olaraq qeyri-neft sektorunu göstərir və qeyd edir ki, güclü inkişaf etmiş və böyük gəlir gətirən neft-qaz sektorunun hesabına digər sektorların da inkişaf etdirilməsi siyasəti həyata keçirilməlidir".

Digər iqtisadi göstəricilər də ümumiyyətlə, müsbət mənzərədən xəbər verir. Son 6 ayda inflyasiya 4,9 faiz təşkil edib. Əhalinin pul gəlirləri isə 9 faiz artıb. Bu, onu göstərir ki, 2009-2010-cu illərin tarixdə böhranlı illər kimi qalacağına baxmayaraq, Azərbaycan vətəndaşlarının gəlirləri artır və inflyasiyanın templərini də qabaqlayır.

2009-cu ildə böhran ilinə baxmayaraq, beynəlxalq reytinq agentlikləri Azərbaycanın kredit reytinqini artırıblar. Bu, onu göstərir ki, ölkədə aparılan islahatlar çox uğurludur.

Böyük maliyyə ehtiyatları yaradılıb

Azərbaycanda artıq güclü maliyyə ehtiyatları yaradılıb. Uğurlu neft siyasəti nəticəsində bu gün Azərbaycan öz maliyyə imkanlarını genişləndirir. İlin əvvəlindən Azərbaycanın valyuta ehtiyatları kəskin artaraq 20 milyard dollardan 25 milyard dollara çatıb. Bu ehtiyatlar imkan verir ki, Azərbaycan iqtisadi sahədə istənilən məsələni, istənilən infrastruktur layihəsini təkbaşına həyata keçirə bilsin.

Prezident İlham Əliyevin dediyi kimi, bu, bir daha onu göstərir ki, Azərbaycanda neft-qaz sektorunda islahatların aparılması, şəffaflığın təmin olunması və şəffaflıqla bağlı bütün mütərəqqi təşəbbüslərə qoşulmağımız, belə böyük maliyyə ehtiyatının yaranmasına gətirib çıxarıb.

Dövlət başçısı hər zaman neft gəlirlərinin saxlanması və idarə olunmasında şəffaflığın vacibliyini önə çəkir. "Bu, Azərbaycan xalqının sərvətidir. Bildiyiniz kimi, neft fondunun gəlirləri və xərcləri haqqında mütəmadi qaydada ictimaiyyətə məlumat verilir. Bu, çox şəffaf qurumdur, neft gəlirlərinin uğurla idarə edilməsində və ədalətli bölünməsində Azərbaycan dünya miqyasında nümunə kimi göstərilir.

Əlbəttə ki, əldə edilmiş təcrübə və bu sahədə görülən işlər artıq bizə deməyə imkan verir ki, Azərbaycanın strateji valyuta ehtiyatları gələcəkdə də artacaqdır. Əlbəttə, bu valyuta ehtiyatları Azərbaycanın uğurlu inkişafını və müstəqil siyasətini təmin edəcəkdir. Çünki iqtisadi müstəqillik siyasi müstəqilliyin əsas amilidir"- cənab İlham Əliyev dövlətin güclü maliyyə ehtiyatlarına malik olmasının nə dərəcədə önəmli olduğunu vurğulayır .

Göründüyü kimi, ölkə başçısı strateji ehtiyatların səmərəli istifadəsi və gələcək nəsillərə çatdırılması işinin yüksək səviyyədə qurulmasını yüksək qiymətləndirir. Şübhə yoxdur ki, xalqın sərvətlərindən əldə olunmuş gəlirlərin şəffaf şəkildə xalqa çatdırılması insanlarımızın bugünkü və gələcək rihafına xidmət edəcək.

İqtisadiyyata sərmayə qoyuluşu artır

Ötən illərdə olduğu kimi, Azərbaycan 2010-cu ildə investisiyaların cəlb edilməsi sahəsində öz uğurlu siyasətini davam etdirib. Baxmayaraq ki, bütün maliyyə qurumları, beynəlxalq səviyyəli şirkətlər və ölkələr öz xərclərini kəskin şəkildə azaldırlar, Azərbaycana xaricdən gələn investisiyaların həcmi, prosesi davam edir. Bütövlükdə, ölkə iqtisadiyyatına 6 ayda 3,8 milyard dollar sərmayə qoyulub, bunun bir hissəsi xarici sərmayələrdir.

Azərbaycanda yaradılmış gözəl investisiya iqlimi ölkəmizə investisiyaların gətirilməsinə kömək göstərib. Azərbaycan adambaşına düşən birbaşa xarici sərmayənin həcminə görə bütün dövrlərdə bu bölgədə ən qabaqcıl yerlərdə olub.

Cənab Prezident müşavirədə dediyi kimi, bu gün maliyyə imkanlarımız, məhz xarici sərmayənin nəticəsində yaradılmış milli gəlir və valyuta ehtiyatlarımız, güclənmiş iqtisadiyyat imkan verir ki, biz daxili investisiyaların həcmini ildən-ilə artıraq. Qeyd edək ki, 3,8 milyard dollardan 3 milyard dolları daxili sərmayələrdir, həm dövlət proqramları çərçivəsində, eyni zamanda, Azərbaycan şirkətlərinin fəaliyyəti nəticəsində qoyulmuş vəsaitdir.

Son 6 ayın göstəriciləri arasında ən əhəmiyyətlisi məhz qeyri-neft sektorunun artmasıdır. Qeyri-neft sektorunun 15,3 faiz artması uğurlu iqtisadi siyasətimizin nəticəsidir.

Özəl sektorun kompleks inkişafı

Azərbaycanda bu gün özəl sektorda fəaliyyət göstərən şirkətlər güclənir. Azərbaycan dövləti onlara öz dəstəyini göstərir. Dövlət şirkətləri müasir sistemə keçirlər. Azərbaycan dövlət şirkətlərində müasir mühasibat, audit və idarəetmə sistemi tətbiq olunur.

Dövlət başçısı bununla bağlı deyir: "Biz bu prosesləri dəstəkləyirik və strateji xəttimiz ondan ibarətdir ki, dövlət nəzarətində olan bütün şirkətlər beynəlxalq səviyyəli şirkətlər kimi fəaliyyət göstərsinlər.

Onların dövlətə məxsus olduğu o demək deyil ki, onlar dövlət tərəfindən idarə olunmalıdır, yaxud da hansısa başqa yolla idarə olunmalıdır. Azərbaycanda bazar iqtisadiyyatı prinsipləri geniş tətbiq olunub və dövlət mülkiyyətində strateji əhəmiyyət daşıyan şirkətlər kommersiya şirkətləri kimi fəaliyyət göstərməlidirlər, beynəlxalq bazarlara çıxmalıdırlar və beynəlxalq bazarlarda investisiya layihələrini davam etdirməlidirlər".

Hər ölkədə fəaliyyət göstərən sahibkarlara 100 milyon manat vəsait güzəştli kredit şəklində verilir. Bunun nəticələri də özünü kiçik və orta sahibkarlığın inkişafında büruzə verir. Aqrar sektorda müşahidə olunan inkişaf və məhsul bolluğunun yaradılmasında dövlətin maddi dəstəyi önəmli rol oynayır.

Göründüyü kimi, ölkə başçısı özəl sektorun inkişafının və iqtisadiyyata qoyulan yerli sərmayənin önəmini ortaya qoyur. Məqsəd ölkə iqtisadiyyatını tarazlı və davamlı inkişafını təmin etməkdir.

Beləliklə, 2010-cu ilin birinci yarısı ölkənin bütün sahələrdə uğurlar əldə etməsi ilə müşayiət olunub, həm iqtisadi, həm sosial, həm də digər sahələrdə inkişaf tempi davam edib. Xarici siyasət və ordu quruculuğu sahəsində də böyük üstünlük əldə edilib. Qeyd edilənlər göstərir ki, ölkə Prezidenti cənab İlham Əliyevin başçılığı ilə Azərbaycan hökuməti uğurlu siyasi və iqtisadi islahatlar aparmaqla Azərbaycanın sürətli inkişafını davam etdirir. Dünya ölkələrinin böhrandan əziyyət çəkdiyi bir zamanda Azərbaycanın böyük uğurlar əldə etməsi məhz düşünülmüş siyasətin və strateji fəaliyyətin nəticəsidir.

Elçin Bayramlı

Səs.- 2010.- 5 avqust.- S. 2.