Bazar iqtisadiyyatının hərəkətverici qüvvəsi sahibkarlıqdır

Azərbaycanda sahibkarlığın güclənməsi üçün zəruri maliyyə təminatı yaradılıb

Dünyada maliyyə böhranının hökm sürdüyü vaxtda Azərbaycanda iqtisadi siyasət, ölkənin hərtərəfli inkişafına əsaslı zəmin yaratmışdır. Bu göstərici ölkədə ümumi daxili məhsulun (ÜDM) artım tempinin dünyada ən yüksək göstərici olması ilə izah edilir. Beynəlxalq təşkilatlar ölkədə inflyasiyanın səviyyəsinin kəskin surətdə aşağı düşdüyünü, yoxsulluq həddinin getdikcə azaldığını, sosial xərclərin artırıldığını müsbət meyil kimi qiymətləndirir. Azərbaycan hökumətinin qabaqlayıcı tədbirləri və dövlət başçısı tərəfindən həyata keçirilən irimiqyaslı islahatlar nəticəsində sosial-iqtisadi inkişaf dinamik surətdə inkişaf etməyə başlamışdır. İmzalanan fərman və sərəncamlar, qəbul edilən qərarlar, reallaşan dövlət proqramları sayəsində Azərbaycan iqtisadi artım göstəricisinə görə dünyada lider dövlət statusunu qoruyub saxlaya bilib. Ölkənin sosial-iqtisadi tərəqqisi, demokratik inkişafın davamlı xarakter daşıması, cəmiyyətdə ictimai-siyasi sabitliyin təmin olunması aparılan uğurlu siyasətin məntiqi nəticəsidir.

Azərbaycanda iqtisadiyyatın bütün sahələrinin sürətli inkişafı, o cümlədən, yerli və xarici investisiyaları cəlb etməklə rəqabət qabiliyyətli məhsul istehsal edən müəssisələrin yaradılması infrastrukturun yeniləşməsinə, yeni iş yerlərinin açılmasına imkan vermişdir. İqtisadi inkişafın keyfiyyətcə yeni mərhələsində sahibkarlığın güclənməsi üçün zəruri maliyyə təminatı yaradılmış, süni maneələrin aradan qaldırılması üçün mükəmməl qanunvericilik bazası formalaşdırılmış, fəaliyyətin bu növü ilə məşğul olanların hərtərəfli stimullaşdırılması məsələsi diqqət mərkəzinə çevrilmişdir. İnvestisiyaların təşviqi üçün respublikada daha münbit şərait yaratmaq, daxili və xarici sərmayəni stimullaşdıran səmərəli metodlardan istifadə etmək, xarici kapital qoyuluşunun başlıca istiqamətini regionların, qeyri-neft sektorunun inkişafına yönəltmək üçün kompleks tədbirlər həyata keçirilmişdir. Azərbaycan Prezidenti İlham Əliyev hesab edir ki, bazar mexanizminin hərəkətverici qüvvəsi hesab edilən sahibkarlığın inkişafı keçid iqtisadiyyatlı ölkələrin siyasi, sosial-iqtisadi sisteminin yenidən qurulmasında, sosialyönümlü problemlərin kompleks həllində mühüm rol oynayır.

Ölkə Prezidenti İlham Əliyev tərəfindən uğurla davam etdirilən ulu öndər Heydər Əliyevin iqtisadi strategiyası özəl sektor yeni inkişaf dönəminə qədəm qoymuş, sahibkarlığın inkişafına diqqət daha da artırılmışdir. Kiçik və orta sahibkarlığın güzəştli kreditlərlə maliyyələşdirilməsi, sahibkarların fəaliyyətinə yersiz müdaxilələrin qarşısının alınması, özəl sektorda inkişafa mane olan problemlərin həlli istiqamətində mühüm addımlar atılmışdır. Hökumət makroiqtisadi sabitliyin qorunması, istehsalın səviyyəsinin saxlanılması, pul-kredit siyasətinin gücləndirilməsi, sosial problemlərin həlli, əhalinin aztəminatlı təbəqəsinin müdafiəsi, sahibkarların işgüzar fəallığının stimullaşdırılması istiqamətlərində zəruri işlər görmüşdür. Həyata keçirilən qətiyyətli və səmərəli tədbirlər nəticəsində Azərbaycan iqtisadiyyatı öz dayanıqlığını nümayiş etdirmiş, qeyri-neft sektorunda şaxələndirmə əsasında iqtisadi artım əldə edilmişdir. Beynəlxalq Valyuta Fondu, Dünya Bankı, Avropa Yenidənqurma və İnkişaf Bankı da ölkəmizdə həyata keçirilən antiböhran tədbirlərini yüksək qiymətləndirir. Dünya Bankının "Doinq-Business" hesabatında Azərbaycan öz yüksək mövqeyini saxlayır. Dünya İqtisadi Forumu iqtisadiyyatın rəqabət qabiliyyətliliyinə görə, Azərbaycanı dünyada 51-ci yerə layiq görülməsi Müstəqil Dövlətlər Birliyi ölkələri arasında ən yüksək göstəricidir. "Standard&Poors" beynəlxalq reytinq agentliyinin isə respublikamızın reytinq proqnozunun "sabit" səviyyəsindən "müsbət" səviyyəyə yüksəldiyini bəyan edib.

Sahibkarlığın inkişafında maraqlı olan Azərbaycan dövləti hər il sahibkarlığın dəstəklənməsi məqsədi ilə böyük məbləğdə güzəştli kreditlərin verilməsi, aqrar sektora subsidiyaların ayrılması qeyri-neft sektorunun inkişafında çox mühüm rol oynayır. Ölkədə aidiyyəti üzrə görülmüş təxirəsalınmaz və adekvat tədbirlər nəticəsində makroiqtisadi sabitliyin qorunmasına nail olunmuşdur. Böhranın ölkə iqtisadiyyatına təsirinin yumşaldılması istiqamətində qanunvericilikdə edilən mühüm dəyişikliklər tənzimləmə imkanlarını daha da artırmışdır. Bununla real sektora hökumət zəmanəti ilə məqsədli kreditlərin verilməsi, kommersiya banklarına isə subordinasiyalı kreditlərin ayrılması mexanizmi yaradılmışdır.

2009-cu ildə Sahibkarlığa Kömək Milli Fondundan 2100 sahibkarlıq subyektinə 130 milyon manat güzəştli kredit verilmişdir. Fondun Qaydalarına edilən dəyişiklik nəticəsində güzəştli kreditlərin maksimum həddi 3 milyondan 5 milyon manata qaldırılmış, faiz dərəcəsi isə 7-dən 6-ya endirilmişdir. Bu rəqəm 2008-ci illə müqayisədə maliyyələşdirilmiş layihələrin sayının 2,6 dəfə, güzəştli kreditlərin məbləğinin isə 1,5 dəfə artması dövlət tərəfindən sahibkarlığa göstərilən qayğının real təzahürüdür. İstehlakçıların hüquqlarının qorunması məqsədilə aparılan yoxlamaların müasir standartlara uyğun olaraq tənzimlənməsi, aparılan yoxlamalar zamanı səlahiyyətlərindən sui-istifadə hallarının qarşısının alınması, şəffaflığın təmin edilməsi, həmin yoxlamalar zamanı alınan nəticələrə uyğun olaraq, istehlakçıların hüquqlarının effektiv müdafiəsini qanunla qoruyan Azərbaycan dövləti sahibkarlığın davamlı inkişafında maraqlı tərəf kimi iradə nümayiş etdirir. UAzərbaycan Respublikası regionlarının 2009-2013-cü illərdə sosial-iqtisadi inkişafı Dövlət ProqramıFnın icrasının birinci ilinin yekunları ilə bağlı bir müddət əvvəl Bakı Biznes Mərkəzində keçirilən konfrans respublikamızın qlobal böhrana baxmayaraq, bütün sahələrdə uğurla inkişaf etdiyini, makroiqtisadi göstəricilərə imza atdığını bir daha təsdiqləyir. Kifayət qədər səmərəli müzakirələrlə yaddaqalan konfransın yekunlarının təhlili eyni zamanda Azərbaycanda qeyri-neft sektoruna, sahibkarlığın inkişafına dövlət dəstəyinin sistemli, ardıcıl və davamlı xarakter daşıdığını göstərir.

ELŞAD HACIYEV

Səs.- 2010.- 6 avqust.- S. 9.