Yeniləşən Azərbaycana yeni məktəb"

 

Heydər Əliyev Fondu bu sahədə uğurlu layihələrini davam etdirir

 

Modernləşmə, müasirləşmə, dünyaya inteqrasiya, Azərbaycanın milli maraqlarının müdafiə edilməsi və digər bu kimi məqsədyönlü işlər Heydər Əliyev Fondunun üzərinə düşən vəzifələrdəndir. Bu qurum təhsilin, səhiyyənin, mədəniyyətin, incəsənətin, idmanın inkişafına xidmət edən konkret layihələrlə yanaşı, regional inkişaf tədbirlərinə də yaxından dəstək verir. Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə həyata keçirilən "Yeniləşən Azərbaycana yeni məktəb" layihəsi bu baxımdan cəmiyyətdə böyük əks-səda doğurmuşdur. Təhsilin ölkənin gələcəyi üçün olduqca əhəmiyyətli bir sahə olduğunu nəzərə alan Fondun rəhbəri bu istiqamətdə möhtəşəm tədbirlərə imza atmış, gənc nəslin formalaşmasına böyük töhfələr vermişdir. Fondun yaradılmasının beş illik yubileyində Prezident İlham Əliyevin qeyd etdiyi kimi, respublikada ilk məktəb tikintisi məhz bu Fondun xətti ilə geniş vüsət almışdır. Sonra həmin təşəbbüs dövlət tərəfindən əsas götürülərək bütün ölkə miqyasında həyata keçirilmişdir.

Bu gün müstəqil Azərbaycanda təhsil sistemində irimiqyaslı islahatlar prosesi artıq dönməz xarakter almış, Prezident İlham Əliyevin təhsil sisteminə diqqət və qayğısı sayəsində milli təhsil sisteminin aydın sabahını təmin edəcək İnkişaf Proqramları təsdiq olunaraq reallaşdırılmağa başlanmış, Azərbaycan təhsilinin davamlı inkişafına yönəlmiş əsaslı tədbirlər görülmüşdür. Bu tədbirlər içərisində təhsil müəssisələrinin maddi-texniki və tədris bazasının möhkəmləndirilməsi də prioritetlər sırasındadır. Ümummilli liderin dövlətçilik irsini öyrənən və təbliğ edən, irimiqyaslı proqramların həyata keçirilməsinə dəstək verən Heydər Əliyev Fondu genişmiqyaslı fəaliyyətə başladığı gündən xalqın mənəvi sərvətinin və milli mədəniyyətinin sadiq keşikçisinə çevrilərək, təhsilə də yardımı prioritet istiqamət elan edib. Heydər Əliyev Fondunun təhsillə bağlı qarşıya qoyduğu əsas məqsəd Azərbaycanda bu sahəni müasir dünyanın tələbləri səviyyəsində qurmaq, milli təhsil modelinin gerçəkləşdirilməsinə zəmin formalaşdırmaqdır.

Qeyd etmək lazımdır ki, 2004-cü il may ayının 10-da fəaliyyətə başlayan Heydər Əliyev Fondu ulu öndərin zəngin dövlətçilik irsinin bütün dünyada tanıdılması və təbliği istiqamətində ardıcıl iş aparmaqla yanaşı, cəmiyyətin hərtərəfli inkişafı üçün son dərəcə əhəmiyyətli olan bir sıra xeyirxah və nəcib layihələrin gerçəkləşməsində də yaxından iştirak edir, milyonlarla insanın inam və etimadını qazanır.

2005-ci ildən Fond tərəfindən həyata keçirilən "Yeniləşən Azərbaycana yeni məktəb" proqramı cəmiyyətdə böyük rezonans yaratdı. Çünki bu layihənin həyata keçirilməsi cəmiyyətin ən böyük uğuru və qiymətli qazancı idi. Heydər Əliyev Fondunun bu proqramı təhsilin səviyyəsinə birbaşa təsir edən problemlərin həllinə - tədris prosesinin günün tələbləri səviyyəsində qurulmasına imkan verən müasir məktəb binalarının inşasına istiqamətləndirildi. Bu sahədə real vəziyyəti qiymətləndirmək üçün Fondun prezidenti Mehriban xanım Əliyevanın təşəbbüsü ilə ölkədəki məktəb binalarının vəziyyəti öyrənilib. Monitorinqlər göstərib ki, bir çox məktəblərdəki şəraitin yarıtmaz vəziyyətdə olması təhsilin keyfiyyətinə təsir edən mühüm amildir. İctimai dəstəyi vacib hesab edən Heydər Əliyev Fondu cəmiyyətin ən müxtəlif təbəqələrinin diqqətini bu məsələyə yönəltmək məqsədi ilə 2005-ci ilin iyununda müvafiq qurumların, habelə, beynəlxalq təşkilatların iştirakı ilə "dəyirmi masa" keçirib. Proqramın həyata keçirilməsi məqsədi ilə 100, 200 və 240 şagird yerlik məktəb layihələri hazırlanıb. Layihənin həyata keçirilməsi ilə bağlı fondun prezidentinin cəmiyyətə ünvanladığı əməkdaşlıq çağırışı geniş əks-səda doğurub. Bu gün Azərbaycanın müxtəlif bölgələrində hətta ucqar dağ kəndlərində belə, məktəb tikintisi geniş vüsət alıb. "Yeniləşən Azərbaycana yeni məktəb" layihəsinin icrasının ən vacib məqamlardan biri onun paytaxtla yanaşı, regionlarda da icra olunması idi. Layihənin icrası nəticəsində ancaq ilk 4 ayda ölkədə Heydər Əliyev Fondunun təşəbbüsü ilə 132 yeni məktəb tikilərək istismara verildi. "Yeniləşən Azərbaycana yeni məktəb" proqramı çərçivəsində tikilən və infrastrukturu yerli tələbata və imkana uyğunlaşdırılan bu məktəblər müasir avadanlıq, istilik sistemi, zəngin kitabxana, əyani vəsait və kompüter avadanlığı ilə təchiz olunub.

Xüsusi qeyd etmək lazımdır ki, 2005-ci ildə ölkədə inşa edilmiş 49732 şagird yerlik 328 yeni məktəbdən 22060 şagird yerlik 132 məktəb, yəni məktəblərin 40 faizi bilavasitə Heydər Əliyev Fondunun təşəbbüsü ilə tikilmişdir. Heydər Əliyev Fondunun "Yeniləşən Azərbaycana yeni məktəb" Proqramı öz coğrafiyasına görə bütün ölkəni əhatə etmişdir. Ən əhəmiyyətlisi odur ki, on illərlə təmir edilməmiş, tam yararsız və qəza vəziyyətində olan, təlim-tərbiyə üçün heç bir şəraiti olmayan məktəblərin yerində müasir standartlara uyğun yeni binalar inşa edilmiş, keyfiyyətli avadanlıqlarla təmin olunmuş və şagirdlərin istifadəsinə verilmişdir.

Ümumiyyətlə, Fondun "Yeniləşən Azərbaycana yeni məktəb" layihəsi çərçivəsində bu illər ərzində 43770 şagird yerlik 226 yeni məktəb binası tikilmişdir. Bütövlükdə isə 2004-2008-ci illərdə 300-ə yaxın yeni məktəb, internat məktəbi, uşaq bağçası və körpələr evi inşa edilmiş, təmir olunmuş və texniki avadanlıqlarla təchiz edilərək uşaqların ixtiyarına verilmişdir. 2009-cu ildə isə 1600 yerlik 6 məktəb binası tikilmişdir. 40-dan çox təhsil ocağı, o cümlədən, xüsusi qayğıya ehtiyacı olan uşaqlar üçün 31 internat məktəbi əsaslı təmir olunub müasir avadanlıqlarla təchiz edilmişdir.

Fondun təhsillə bağlı həyata keçirdiyi proqramlar sırasında "Təhsilə dəstək" layihəsi - birbaşa tədrisin keyfiyyətinə təsir göstərən problemlərin həllinə - məktəblərin əyani vəsaitlə, şagirdlərin dərs ləvazimatı ilə təmin olunmasına yönəlib. Fond hər yeni tədris ilində silsilə aksiyalar keçirməklə bu sahədə bir sıra problemlərin aradan qaldırılmasına əhəmiyyətli töhfə verir. 2004-cü ildən başlayaraq Fond hər il qaçqın və məcburi köçkün ailələrindən olan 1-ci sinif şagirdlərinə məktəbli çantaları və dərs ləvazimatı paylayır. Artıq son bir neçə ildir bu proses ölkədəki bütün orta məktəbləri əhatə edir. 2008-2009-cu tədris ilində Fond tərəfindən ölkədə 130 min birinci sinif şagirdinə 16 adda ləvazimatla təmin edilən çanta paylanıb. Bununla yanaşı, Fondun hazırladığı 140 adda əyani vəsait də məktəblərə göndərilib.

Heydər Əliyev Fondu respublikadakı milli azlıqların təhsilinin inkişafına da diqqət göstərir. Fond "Təhsilə dəstək" proqramı çərçivəsində Qax rayonunun Qax-İngiloy kənd orta məktəbinin 1-2-ci sinif şagirdlərinə gürcü dilində nəşr edilən yeni dərsliklər və məktəb ləvazimatı təqdim edib. "Təhsilə dəstək" layihəsi məktəbəqədər uşaq tərbiyə müəssisələrinin yenidən qurulmasını da əhatə edir. Layihə çərçivəsində bölgələrdə və Bakı kəndlərində uşaq bağçaları əsaslı təmir olunaraq, müasir avadanlıqla təchiz edilib. Nərimanov rayonunda akademik Zərifə Əliyeva adına uşaq bağçası və Binə qəsəbəsindəki uşaq bağçaları yenidən qurulub və ən müasir standartlara uyğunlaşdırılıb. Heydər Əliyev Fondunun təhsilə qayğısının coğrafiyası getdikcə genişlənir. Artıq dünyada nüfuzlu qurum kimi tanınan Fond xeyriyyəçilik missiyasını bir necə ölkədə uğurla davam etdirir. Gürcüstanda yaşayan azərbaycanlıların təhsillə bağlı problemlərinin aradan qaldırılması üçün hər il dövlət xətti ilə yanaşı, Fond tərəfindən də böyük yardım edilməsini bu ölkədə yaşayan soydaşlarımız dərin minnətdarlıq hissi ilə qarşılayır. Moskvada fəaliyyət göstərən Azərbaycan məktəblərinə göstərilən müntəzəm qayğı xüsusilə qeyd olunmalıdır. Burada Fondun Rusiyadakı nümayəndəliyinin rəhbəri Leyla xanım Əliyevanın fəaliyyəti diqqəti cəlb edir. 2007-ci ildə Hollandiyanın paytaxtı Amsterdamda fəaliyyətə başlayan Azərbaycan məktəbi də Fondun diqqətindən kənarda qalmayıb, məktəbə kompyuter dəsti və dərs vəsaiti göndərilib.

Heydər Əliyev Fondunun 2005-ci ildən BMT-nin İnkişaf Proqramı ilə birgə həyata keçirdiyi görmə qabiliyyətini itirmiş və görmə qabiliyyəti zəif olan insanlar üçün informasiya-kommunikasiya texnologiyalarına çıxışın təmin edilməsi layihəsi də Azərbaycan ictimaiyyətində böyük maraqla qarşılandı. Layihə bu kateqoriyadan olan insanların həyata qoşulmasına, onların informasiya kommunikasiya vasitələri ilə bilik və məlumat əldə etmək imkanlarının genişləndirilməsinə, onların məşğulluğunun artırılmasına, ümumən bu insanların yaşayış tərzini yaxşılaşdırmağa xidmət etdi. Layihənin həyata keçirilməsi nəticəsində səsyazma studiyası yaradıldı. Studiya daxilində kitabxana quruldu. Bu da görmə qabiliyyətini itirən uşaqlara kitabları audiovariantda mənimsəmələri üçün unikal imkanlar açdı, onların brayl texnologiyasından istifadə imkanları asanlaşdırıldı.

Ulu öndərin adını daşıyan Fondun təhsillə bağlı ölkədə həyata keçirdiyi bu müdrik missiya əslində Prezident İlham Əliyevin hakimiyyəti dövründə təhsillə bağlı görülən işlərin məntiqi nəticəsdir. Çünki dövlət başçısı özü də Azərbaycanın xoşbəxt gələcəyinin təmin olunmasında təhsilin oynadığı rola inanır və bu istiqamətdə mühüm addımlar atır.

Bu gün bütün gücü ilə bu prosesə qoşulan Azərbaycanda həyata keçirilən təhsil islahatları ölkəmizin demokratik dayanışmaya, elmin və təhsilin dəyərlərinə sadiqliyini göstərir. Beləliklə, 170 min müəllimi, ümumilikdə, 300 min təhsil işçisi olan Azərbaycan indi qloballaşan dünyanın dəyərlərinə məhz təhsil və elm sayəsində qovuşur.

 

 

RƏFİQƏ KAMALQIZI

 

Səs.- 2010.- 13 avqust.- S. 6.