Heydər Əliyev Fondunun dəstəyi ilə şəkərli diabetli uşaqlar üçün psixo-sosial reabilitasiya yay məktəbi təşkil olunub

Bu "Diabetli uşaqlara ən yüksək qayğı" layihəsi çərçivəsində humanitar tədbirlərin davamıdır

Ümummilli liderimiz Heydər Əliyevin adını daşıyan Heydər Əliyev Fondu bütün millətin gələcəyi olan uşaqların sağlamlığına daim diqqət yetirilməsinə yönəldilən ənənələrə əsaslanaraq, özünün başlıca vəzifələrindən biri olan uşaq evlərindəki, internatlardakı uşaqlara və yeniyetmələrə, kiçik yaşlı qaçqınlara və məcburi köçkünlərə mənəvi və maddi yardım göstərməkdir.

Uşaqların cəmiyyətimizin sağlam üzvü kimi böyümələri və təhsil almalarına, onların intellektual səviyyəsinin yüksəlməsində Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın xidmətləri müstəsnalıq təşkil edir.

Mehriban xanım Əliyevanın xeyirxah təşəbbüsü ilə həyata keçirilən "Diabetli uşaqlara ən yüksək qayğı" layihəsi cəmiyyətdə geniş əks-səda doğurmuş və valideynlər, diabetə mübtəla olmuş uşaqlar, eləcə də, beynəlxalq təşkilatlar tərəfindən razılıqla qarşılanmışdır. Layihə çərçivəsində respublikaya inyektor və çoxlu ucluq gətirilmişdir. Aksiya zamanı yeniyetmələrə, hamilə qadınlara, qlükemik indeksi 9 faizdən yuxarı olanlara üstünlük verməklə, imkansız, xəstəliyin ciddi fəsadları olan vətəndaş inyektor və ucluqla təmin edilmişlər. Səmərəli tibbi xidmətin təşkilini vacib hesab edən Heydər Əliyev Fondu 2004-cü ildən başlayaraq "Diabetli uşaqlara ən yüksək qayğı" layihəsi çərçivəsində hər il qeydiyyatda olan 14 yaşınadək pasiyentləri dərman preparatı və qələm-iynə ilə təmin etmişdir. Davamlı layihə ilə yanaşı, Fond beynəlxalq əməkdaşlıq çərçivəsində humanitar aksiyalar keçirərək şəkərli diabet xəstələr üçün əldə etdiyi dərman preparatlarını qaçqın, məcburi köçkün və aztəminatlı ailələrdən olan vətəndaşlara təqdim etmişdir. 2009-cu ilin "Uşaq ili" elan edilməsi ilə əlaqədar Bakı şəhərində yaşayan 276 uşaq şəhər 6 saylı klinik xəstəxanada müayinə edilərək keyfiyyətli insulin analoqu və qələm-iynə ilə təmin edilmişdir.

Heydər Əliyev Fondunun digər qeyri-hökumət qurumları ilə həyata keçirdiyi uğurlu layihələr bu sahədə Dövlət Proqramına xüsusi dəstək olaraq respublikada şəkərli diabet xəstələrin zəruri preparat və müayinələrlə təminatında dönüş yaranmasına kömək etmişdir, habelə, müxtəlif xəstəliklərə tutulan uşaqlara yardım göstərmişdir.

Bu nəcib layihələrin reallaşmasında əsas məqsəd ictimaiyyətin, milli və xarici şirkətlərin diqqətini uşaqların sağlamlığının qorunması, Azərbaycanın diabetli uşaqlarının problemlərinin həllində Beynəlxalq Diabet Federasiyasının iştirakını fəallaşdırmaq məsələlərinə yönəltməkdir.

Heydər Əliyev Fondunun həyata keçirdiyi "Diabetli uşaqlara ən yüksək qayğı" layihəsi çərçivəsində Lənkəran şəhərində şəkərli diabetli uşaqların psixo-sosial reablitasiyası məqsədilə təşkil edilmiş düşərgədə xüsusi qayğıya ehtiyacı olan və çətin şəraitdə yaşayan 25 şəkərli diabetli uşağa 4 həkim-diabetoloq, 5 tərbiyəçi-müəllim və 3 psixoloq xidmət göstərmişdir. Uşaqlar iki həftə ərzində Xəzər dənizi sahilində dincəlməklə yanaşı, Lənkəran, Astara və Lerik rayonlarının tarixi-mədəniyyət abidələri və görməli yerləri ilə tanış olmuş, idman yarışlarında, əyləncəli oyunlarda iştirak etmiş, həkimlər tərəfindən onlara tibbi və psixoloji yardımlar göstərilmişdir.

Heydər Əliyev Fondu tərəfindən artıq ənənə halını almış "Diabetli uşaqlara ən yüksək qayğı" layihəsi çərçivəsində humanitar tədbirlər davam etdirilməkdədir. "Diabetli uşaqlara ən yüksək qayğı" layihəsinin icrasına başlanandan sonra ictimaiyyətin, müvafiq dövlət qurumlarının, milli və xarici şirkətlərin, Beynəlxalq Diabet Federasiyasının Azərbaycanın diabetli uşaqlarının problemlərinin həllinə diqqəti xeyli artmışdır.

Heydər Əliyev Fondunun dəstəyi ilə artıq ikinci ildir ki, Azərbaycanda şəkərli diabetli uşaqlar üçün analoqu olmayan psixo-sosial reabilitasiya yay məktəbi təşkil olunur. Bu məqsədlə Gəncə şəhərində 15 gün fəaliyyət göstərəcək yay düşərgəsi valideyn himayəsindən məhrum olmuş uşaqlar, eləcə də, məcburi köçkün və qaçqın, tərkibində 2-3 nəfər şəkərli diabet olan ailələrdən seçilmiş 30 şəkərli diabetli uşaq üçün nəzərdə tutulur. Yay məktəbinin əsas məqsədi gələcəkdə özləri kimi digər uşaqlara ilkin tibbi və psixoloji dəstək verə biləcək gənc liderlərin hazırlanmasıdır.

Avqustun 23-dən başlayan proqrama maraqlı istirahətin təşkili ilə yanaşı, uşaqların psixo-sosial reabilitasiyasını təmin etməyə, yeniyetmələrdə özünəinam, özünümüdafiə, özünütəsdiq xüsusiyyətlərini inkişaf etdirməyə, öz həyatında və ətrafda baş verən hadisələrə tolerant münasibət bəsləmə üsullarını formalaşdırmağa xidmət edən məşğələlərin keçirilməsi daxildir. Bu məqsədlə endokrinoloq, psixoloq və digər mütəxəssislərdən ibarət işçi qrupu fərdi məsləhət və psixoterapiyadan istifadə edərək, uşaqlara müvafiq vərdişlərin aşılanmasını təmin edən davamlı treninqlər keçirəcəkdir.

İstirahət günlərində uşaqlar Gəncə şəhərinin tarixi-görməli yerləri ilə tanış olacaq, ingilis dili kurslarında iştirak edəcək, müxtəlif mövzularda inşa yazılar hazırlayacaq, müsabiqə, intellektual oyun və idman yarışlarında bilik və bacarıqlarını sınayacaqlar.

Nəzakət ƏLƏDDİNQIZI

Səs.- 2010.- 25 avqust.- S. 6.