Azərbaycanda telefon şəbəkəsi tam elektronlaşdırılıb

Məhəmməd Məmmədov: "Qloballaşan dünyada Azərbaycan rabitəsi çətin və eyni zamanda, şərəfli yol keçərək müasir səviyyəyə çatıb"

“Rəqəmsal uçurum"un ləğvi ilə əlaqədar "Aztelekom" İstehsalat Birliyində tədbir keçirilib. Tədbir iştirakçıları ilk öncə birliyin foyesində qoyulmuş Ümummilli Liderimiz Heydər Əliyevin büstünün önünə tər çiçək dəstələri düzdülər. Tədbir rabitə və informasiya texnologiyaları naziri Əli Abbasovun təbrik məktubunun oxunması ilə başlandı. "Aztelekom"un İB-nin rəhbəri Məhəmməd Məmmədov Azərbaycan rabitəsinin böyük inkişaf yolu keçdiyini bildirdi: "Azərbaycanda informasiya cəmiyyəti quruculuğu dövlətin əsas prioritetlərindən biri kimi uğurla davam etdirilir.

Müasir texnologiyaların tətbiqi sahələrinin genişlənməsi bəşəriyyətin rifahı üçün vacib olan taleyüklü problemlərin həllində əhəmiyyətli rol oynayır. İnformasiya və kommunikasiya texnologiyalarının əhəmiyyətinin gündən-günə artdığı qloballaşan dünyada Azərbaycan rabitəsi çətin və eyni zamanda, şərəfli yol keçərək müasir səviyyəyə çatmışdır. Digər sahələrdə olduğu kimi, rabitə və informasiya texnologiyaları sahəsinin sürətli inkişafı və müasir dövrün tələblərinə uyğun qurulması da Ümummilli Liderimiz Heydər Əliyevin adı ilə bağlıdır. Ulu Öndər Heydər Əliyevin 2003-cü ilin 17 fevral tarixində imzaladığı "Azərbaycan Respublikasının inkişafı naminə informasiya-kommunikasiya texnologiyaları üzrə milli strategiya (2003-2012-ci illər)" 10 il müddətində müasir informasiya texnologiyalarının Azərbaycanda tətbiqi sahəsində prioritet vəzifələri müəyyənləşdirmişdir. Bu strategiyadan irəli gələn vəzifələr hazırda Prezident İlham Əliyevin rəhbərliyi ilə uğurla yerinə yetirilir".

M.Məmmədov onu da bildirdi ki, bu gün bu strategiya ölkə başçısı İlham Əliyev tərəfindən uğurla həyata keçirilir: "Azərbaycan Respublikasında rabitə və informasiya texnologiyalarının inkişafı üzrə 2005-2008-ci illər üçün Dövlət Proqramı" (Elektron Azərbaycan)" və Azərbaycan Respublikasında rabitə və informasiya texnologiyalarının inkişafı üzrə 2010-2012-ci illər üçün Dövlət Proqramı" (Elektron Azərbaycan)" təsdiq edilmişdir".

Birliyin rəhbəri onu da bildirdi ki, 2004-cü ildən indiyədək konsepsiyaya uyğun olaraq "Aztelekom" Azərbaycanın bütün bölgələrini telefon rabitəsi ilə təmin edib. 2008-ci ildə Azərbaycan MDB məkanında bütün yaşayış məntəqələrini telefonlaşdıran ilk dövlət olub.

M.Məmmədovun sözlərinə görə, 2008-2009-cu illərdə ölkənin 600-dən artıq kəndi elektronlaşdırılıb: "Hazırda isə bütün ölkə ərazisində telefon ATS-ləri rəqəmsallaşdırılıb. 2004-cü ildən indiyədək 700 mindən artıq nömrə tutumu istismara verilib. Hazırda köhnə avadanlıqlardan imtina olunub, müasir tipli avadanlıqlar quraşdırılıb. Hazırda bu göstərici 100 faiz artaraq 57 rayona çatıb. 2004-cü ilin əvvəlində "Aztelekom"un xidmət ərazisində genişzolaqlı internet istifadəçisi yox idisə, hazırda 20000-dən artıq belə abunəçi qeydiyyatdadır".

M.Məmmədov "Aztelekom"un gələn il ərzində investisiya yatırımlarının həcmini artıracağını da söylədi: "Gələn il ərzində "Aztelekom" İstehsalat Birliyinin investisiya yatırımlarının həcmi 50 mln. manat təşkil edəcək. Bu il ərzində investisiya yatırımlarının həcmi 46 mln. manat olub ki, bunun da 20 mln. manatı kredit şəklində cəlb olunan investisiyaların payına düşüb. Qalan investisiyalar (26 mln. manat) isə daxili imkanlar hesabına həyata keçirilib. "Aztelekom" gələn il, həmçinin, beynəlxalq danışıq tariflərini azaltmaq niyyətindədir. Artıq bu istiqamətdə Tarif Şurasına da müraciət olunub. Həmçinin, regionlar üzrə də ölkədaxili danışıq tariflərinin azaldılması nəzərdə tutulub. Tariflərin azaldılması ilə biz qiymətlərdə balanslaşma aparırıq".

Tədbirdə çıxış edən "Aztelekom" İstehsalat Birliyinin maliyyə-iqtisad şöbəsinin müdiri Faiq Cəfərov bildirdi ki, bu layihənin uğurla başa çatması 2004-cü ildə Rabitə və İnformasiya Texnologiyaları Nazirliyinin yaranmasından sonra ardıcıl olaraq həyata keçirilmiş məqsədyönlü tədbirlərin məntiqi nəticəsidir.

F.Cəfərov çıxışında onu da söylədi ki, 2010-cu ildə 301 yeni ATS tikilib, 768 ATS rekonstruksiya olunaraq elektron ATS-lərlə əvəzlənib, 299 ATS-in tutumu genişləndirilib. Onun sözlərinə görə, 2010-cu ilin əvvəlində şəbəkə abunəçilərinin sayı 430846 olubsa, 2011-ci il yanvarın 1-nə 60 faiz artaraq 686000-ə çatacaq.

YAP-ın Yasamal rayon təşkilatının sədri Fikrət İsmayılov çıxış edərək "Aztelekom" İstehsalat Birliyinin kollektivini işlərində göstərdikləri yüksək göstəricilərə görə və 31 Dekabr - Dünya Azərbaycanlılarının Həmrəylik Günü münasibətilə təbrik etdi. F.İsmayılov bildirdi ki, yola salmağa hazırlaşdığımız 2010-cu ildə bütün sahələrdə olduğu kimi, rabitə sahəsində də böyük nailiyyətlər əldə olunub. YAP Yasamal rayon təşkilatının sədri rabitəçilərə bu yolda uğualar arzuladı.

RƏFİQƏ KAMALQIZI

Səs.- 2010.- 30 dekabr.- S. 14.