“Bakı gecələri - 2010” Estrada Mahnı Festivalının “Online” səsverməsi davam edir

Təşkilat Komitəsi tərəfindən seçilən 80 mahnı professional münsiflər heyəti tərəfindən qiymətləndirilib

Bildiyimiz kimi “Bakı gecələri - 2010” Estrada Mahnı Festivalı Azərbaycan Respublikası Mədəniyyət və Turizm Nazirliyi və Bakı Şəhər İcra Hakimiyyətinin dəstəyi və Bakı Şəhər Mədəniyyət və Turizm İdarəsinin təşkilatçılığı ilə keçirilir.

“Bakı gecələri - 2010” Estrada Mahnı Festivalının Təşkilat Komitəsindən aldığımız məlumata görə, festivalın başlıca məqsədi mahnı müəlliflərinin yaradıcılıq fəaliyyətini inkişaf etdirmək, estrada ifaçılarını dəstəkləmək, Azərbaycanı beynəlxalq müsabiqələrdə layiqincə təmsil edəcək estrada ifaçılarını yetişdirmək və estrada mahnı janrını inkişaf etdirməkdir. Xatırladaq ki, üç möhtəşəm konsert proqramından ibarət olan “Bakı gecələri - 2010” Estrada Mahnı Festivalının birinci konsert proqramı sentyabrın 13-də, ikincisi isə oktyabrın 11-də Azərbaycan Dövlət Musiqili Komediya Teatrında keçirildi.

“Bakı gecələri - 2010” Estrada Mahnı Festivalının üçüncü konsert proqramı isə noyabr ayının 15-də Azərbaycan Dövlət Musiqili Komediya Teatrında reallaşdı. Qeyd edək ki, üçüncü konsert proqramında Manana, İzzət Bağırov, Elariz Məmmədoğlu, Nadir Bayramlı, Rüfət Axundov, Nurlan Əzizbəyli, Günel Məhərrəmli və başqaları iştirak etdilər.

İlkin üç mərhələdə təqdim olunan mahnılar münsiflər heyəti tərəfindən qiymətləndirildikdən sonra yüksək bal toplamış əsərlər finala - 24 dekabr 2010-cu il tarixində Heydər Əliyev Sarayında keçiriləcək Qala-konsertə vəsiqə qazanıb. Finalda səslənən mahnılar müxtəlif nominasiyalar üzrə mükafatlar uğrunda mübarizə aparacaqlar. Qala-konsertdə iştirak edən müğənnilər “Bakı gecələri Estrada Mahnı Festivalının Laureatı” adına layiq görüləcəklər. Xatırladaq ki, 2008-ci ildən etibarən hər il keçirilən “Bakı gecələri” Estrada Mahnı Festivalı tamaşaçılar tərəfindən səbirsizliklə gözlənilir və böyük rəğbətlə qarşılanır. Bu il tamaşaçılar müxtəlif nominasiyalar üzrə qalibləri “online” səsvermə yolu ilə müəyyən etmək şansını əldə edəcəklər. Səsverməyə noyabrın 20-dən etibarən start verilib. Qeyd edək ki, mahnının yaradılmasında bir çox insanların zəhməti var. Çox vaxt elə olur ki, bəstəkar, şair, aranjimançı kölgədə qalır, müğənni mahnını ifa edir və bu mahnı ifaçının adına yazılır. Amma “Bakı gecələri” Estrada Mahnı Festivalında əsərlərin təkcə ifaçıları deyil, bütün yaradıcıları qiymətləndirilir. Bununla belə, hər bir bəstəkar yaradıcı əsərin kim tərəfindən ifa olunacağını özü müəyyən edir və festivala təqdim edir. Məhz bu cəhətdən “Bakı gecələri” bütün festivallardan fərqlənir.

İştirak etmək üçün “Bakı gecələri - 2010” Estrada Mahnı Festivalının Təşkilat Komitəsinə 100-ə yaxın mahnı təqdim olunmuşdu. 3 konsert proqramından ibarət seçim turunda Təşkilat Komitəsi tərəfindən seçilən 80 mahnı müğənnilərin ifasında təqdim olunub və professional münsiflər heyəti tərəfindən bəstələnmiş mahnıların sözlərinə, aranjimana, ifa tərzinə görə qiymətləndirilib. Heydər Əliyev Sarayında keçiriləcək Qala-konsertə vəsiqə qazanan mahnılar “Qran-Pri” və 4 nominasiya üzrə mükafatlar uğrunda mübarizə aparacaqlar. Səsvermə dekabr ayının 22-dək davam edəcəkdir.

Səs.- 2010.- 4 dekabr.- S. 12.