Ramil Həsənov: “Azərbaycanda gənclər təşkilatlarının yaranmasına və fəaliyyətinə yetərincə münbit şərait yaradılıb”

Yeni Azərbaycan Partiyasının Gənclər Birliyinin sədri, Türkdilli Ölkələrin Parlament Assambleyasının baş katibi Ramil Həsənovun SİA-ya müsahibəsi

- Ramil müəllim, Azərbaycanda 2 Fevral Gənclər Günü kimi qeyd olunur. Bu günün əhəmiyyətini necə dəyərləndirirsiniz?

- Bu tarix gənclərin həyatında olduqca önəmlidir. Ümummilli liderimiz Heydər Əliyev tərəfindən Azərbaycan gənclərinə bəxş edilən 2 Fevral Gənclər Gününü 14 ildir ki, qeyd edirik. Bu 14 il ərzində Azərbaycan dövləti, onun həm daxili, həm də xarici siyasəti inkişaf etdikcə, gənclərə diqqət və qayğı artıb, onlar dəstədən kənarda qalmayıblar. Arxaya dönüb baxdıqda, görə bilərik ki, gənclər bu illər ərzində şəxsi həyatlarında, təhsildə, müxtəlif sferalarda yetərincə uğurlar və nailiyyətlər əldə ediblər. Bunların hər biri üçün Azərbaycan dövlətinə və onun rəhbərliyinə borcluyuq ki, onların yaratmış olduğu şərait nəticəsində, gənclik uğurla davam edən siyasətin tərkib hissəsinə çevrilib.

YAP Gənclər Birliyi 1995-ci ildən fəaliyyət göstərir. 1996-cı ildə gənclər forumu keçiriləndən sonra 2 fevralın gənclər günü kimi qeyd edilməsi ilə bağlı sərəncamın imzalanması məqsədilə ümumilli lider Heydər Əliyevə müraciət edən gənclər təşkilatları arasında YAP Gənclər Birliyi xüsusi yer tuturdu.

Gənclər günü ilə bağlı YAP Gənclər Birliyinin müxtəlif yerli, şəhər və rayon təşkilatlarında bir neçə gündür ki, müxtəlif səpkili konfranslar, seminarlar, dəyirmi masalar keçirilir. Əlamətdar gün münasibəti ilə bu dövrlər ərzində fərqlənmiş gənclərə yerli rayon təşkilatları tərəfindən mükafatlar, həvəsləndirici diplomlar təqdim olunub. YAP Gənclər Birliyi fevralın 2-də partiyanın mərkəzi aparatında gənclər günü ilə bağlı tədbir keçirəcək. Burada partiyanın İcra katibi, onun müavinləri, birliyinin idarə heyəti və üzvləri iştirak edəcək.

- Bu gün gənclərin ölkənin ictimai-siyasi həyatındakı rolunu necə qiymətləndirirsiniz?

- Azərbaycanda ölkənin gənclər sferasında yetərincə aktiv gənclər və gənclər təşkilatları var. Onların sayı günü-gündən artmaqdadır. Bu da onu göstərir ki, Azərbaycanda hökuməti, müvafiq donor təşkilatlar tərəfindən QHT-lərə, Azərbaycanın gənclər təşkilatlarının yaranmasına və fəaliyyətinə yetərincə münbit şərait yaradılıb. Belə bir şərait yaranmasaydı, gənclər aktiv fəaliyyət göstərə bilməzdilər. Ancaq yadımızdan çıxarmayaq ki, hər şey dövlətdən və hökumət strukturlarından asılı deyil. Çox şey insanların özlərindən, xüsusilə, gənclərdən asılıdır. Gənclərə yaradılan şəraitlə, onların özlərinin istək və arzuları mütənasiblik təşkil etməlidir. Əgər gənc yaradılan şəraitdən maksimum faydalanmırsa, burada dövlət strukturlarını deyil, gəncin özünün düşünməsi vacibdir ki, nə üçün lazımı şəraitdən yararlana bilmir.

Yəni, bu gün Azərbaycanda yetərincə geniş imkanlar açılıb. Dövlət tərəfindən QHT-lərə Dövlət Dəstəyi Şurası yaradılıb və fəaliyyət göstərir. Bunlardan gənclər maksimum şəkildə faydalana bilərlər, necə ki, bir çoxları faydalanır. Eyni zamanda, gənclər təşkilatlarının həyata keçirdikləri bir çox layihələrə Azərbaycanın müvafiq strukturları onların daxili işinə müdaxilə etmədən hərtərəfli köməkliklər göstərirlər. Azərbaycanın gənclər təşkilatları ölkəmizi beynəlxalq arenada da yüksək səviyyədə təmsil edirlər. Lakin arada müəyyən passiv təbəqə var ki, onlar aktiv təbəqəyə baxıb örnək götürməli və bu istiqamətdə fəaliyyət göstərməlidir.

Bu gün Azərbaycanda dövlətin yaratmış olduğu şəraitlə müqayisədə gənclər təşkilatlarının yetərincə aktivliyi hiss olunmur. Sadəcə, 2 və ya 3 gənclər təşkilatı var ki, onlar çox aktivdirlər. Digərləri isə, sadəcə olaraq, bayramdan-bayrama üzə çıxırlar. Bu da yetərli deyil, çünki hökumət hərtərəfli şərait yaradıb, yetər ki, gənclərdə istək, həvəs olsun ki, bu imkandan kifayət qədər səmərəli istifadə edə bilsinlər.

- Bəzi gənclər təşkilatları niyə yaradılan şəraitdən layiqincə istifadə etmirlər?

- Bunun səbəbini insanların özlərində axtarmaq lazımdır. Çünki hər bir insan ayrıca bir fərddir və hər fərdin özünün daxili düşüncəsi, ətraf aləmə baxış tərzi var. Təşkilatlar yaranırlar, sonra isə fəaliyyət göstərmirlər və yaxud ildə 2-3 dəfə görünürlər. Bunun müxtəlif səbəbləri var. Kənardan baxan şəxs kimi, görürəm ki, təşkilatların inkişafı üçün ölkənin müvafiq strukturları yetərincə şərait yaradıb. İndi gənclər bu şəraitdən öz biliyi, bacarığı ilə yararlana bilirsə, irəliyə doğru gedə bilir. Gənclər üçün də ona görə şərait yaradılır ki, onlar inkişaf etsin, güclənsin. Gənclik Azərbaycanın gələcəkdəki inkişaf tempində öz layiqli yerini tapsın. Dövlət bununla bağlı bütün imkanları verir. Gənclərin özündən asılıdır ki, savadlarını, biliklərini artırsınlar, QHT-lərlə müxtəlif layihələr həyata keçirməklə həm ətraf, həm də beynəlxalq aləmdə özlərini tanıda bilsinlər. Bilirsiniz ki, BMT tərəfindən 2011-ci ilə qədər gənclər ili elan olunub. Bunu da bizim gənclər diqqətdə saxlamalı və bundan müsbət şəkildə istifadə etməlidirlər.

- Bu gün YAP-da gənclər hansı səviyyədə təmsil olunur?

- Bu gün YAP-ın sıralarında 190 mindən çox gənc var. Bu, böyük bir qrup, insan ordusudur. Onların içərisində də aktivlər, müəyyən passivlər var. Bu, belə də olmalıdır. Çünki dünyanın heç bir yerində böyük təşkilatlarda üzvlərin hamısı aktiv olmaq imkanına sahib deyil. Bu normal və demokratik dəyərlərə cavab verən standartdır. Ancaq YAP Gənclər Birliyi, hər zaman olduğu kimi, həm prezident, həm də parlament, həm bu il keçirilən bələdiyyə seçkilərində İcra Katibliyinin qarşıya qoyduğu məqsəd və vəzifəyə uyğun olaraq partiyanın siyasətinin hərtərəfli dəstəklənməsində yaxından köməklik edib. Bu istiqamətdə işimizi davam etdiririk. Partiya rəhbərliyinin gənclərə göstərmiş olduğu böyük etimadın nəticəsidir ki, bizim bir çox gənclərimiz bələdiyyə seçkilərində həm Bakının mərkəz rayonlarında, həm respublikanın bir çox rayonlarında namizəd kimi iştirak edib və seçiliblər. Bu partiya rəhbərliyi tərəfindən gənclərə göstərilən diqqət və qayğının bariz nümunəsidir. Bu il qarşıdan parlament seçkiləri gəlir. Bu seçkilərdə də, hər zaman olduğu kimi, YAP Gənclər Birliyi partiya rəhbərliyinin qarşıya qoyduğu məqsəd və vəzifələrin hər birinin öhdəsindən müasir standartlar və metodalarla gəlmək üçün var gücünü əsirgəməyəcək. Seçkilərdə gənclər bütün qüvvəsi, biliyi və savadı ilə iştirak edəcək.

- Azərbaycan gəncləri beynəlxalq arenada iştirak edərək, ölkəmizin dünya səviyyəsində təmsil olunmasında fəallıq göstərə bilirlərmi?

- Biz fəxr edə bilərik ki, Azərbaycan gəncliyi beynəlxalq arenada, təşkilatlarda çox aktiv, bacarıqlı, ləyaqətli şəkildə ölkəmizi təmsil edir. Qazaxıstan, Qırğızıstan və Türkiyədə yetərincə gənclər ordusu var. Amma mən fəxrlə qeyd edə bilərəm ki, aktiv və bacarıqlı gənclərimizin ölkəmizi beynəlxalq arenada təmsil etməsi yetərincə yüksəkdir və bu bizim tərəfimizdən də yüksək qiymətləndirilir.

- Ramil müəllim, beynəlxalq hüquq normalarına əsasən, Azərbaycan hökuməti ilə Türkdilli Ölkələrin PA Arasında Assmbleyanın Baş Katibliyinin Bakıda yerləşməsi haqda müqavilə imzalanmalı idi. Bu istiqamətdə görülən işlər nə vəziyyətdədir?

- Hazırda müqavilə imzalanmaq üzrədir. Türkdilli Ölkələrin Parlament Assambleyası Katibliyi və Azərbaycan Respublikası Xarici İşlər Nazirliyi arasında danışıqlar davam edir. Bu, bir texniki proseduradır. Heç bir problem yoxdur, sadəcə, texniki proseduraya görə maddələr üzərində hər iki tərəfin razılaşmaları aparılır. Bu razılaşmalar yaxın vaxtlarda başa çatdıqdan sonra rəsmi cavabımızı yazılı şəkildə XİN-ə göndərəcəyik. Bundan sonra Xarici İşlər Nazirliyi prosedura uyğun olaraq, Azərbaycan Parlamentinə ratifikasiya üçün göndərməlidir. Bundan sonra qanun Azərbaycan Rrespublikasının Qanunverciliyinə uyğun olaraq qüvvəyə minəcək və Türkdilli Ölkələrin PA Katibliyi hüquqi fəaliyyətinə başlayacaq. Biz artıq fəaliyyətimizi yanvarın 15-dən başlamışıq. Azərbaycan Respublikası Milli Məclisinin yaratmış olduğu şərait və dəstək sahəsində hər hansı bir problemimiz yoxdur. Katiblik öz fəaliyyətini illik proqramına uyğun olaraq qurub və davam etdirir.

- Yaxın vaxtlarda Türkdilli Ölkələrin Parlament Assambleyası ilə bağlı hansı işlərin görülməsi və yaxud görüşlərin keçirilməsi nəzərdə tutulub?

- Türkdilli Ölkələrin Parlament Assambleyası beynəlxalq təşkilatdır və Avropa Şurası Parlament Assambleyasının kiçik bir variantıdır. Hazırda oktyabr ayında Qazaxıstanın paytaxtı Astanada keçiriləcək assambleyanın növbəti plenar sessiyasına hazırlıq prosesi gedir. Assambleyanın daimi- humanitar, beynəlxalq əlaqələr və qanunvericilik, hüquq və iqtisadiyyat komitələri fəaliyyət göstərəcək. Bu komitələrin yaradılması, komitə sədrlərinin, onların müavinlərinin seçilməsi tədbirləri, assambleyanın hazırlıq iclasının həyata keçirilməsi ilə bağlı bütün prosedur qaydalaları bizim tərəfimizdən aparılır. Həmçinin, bir neçə irimiqyaslı layihələr üzərində iş gedir. Bunlardan biri 4 ölkənin parlamentlərinin müvafiq orqanları arasında təcrübə mübadiləsinin keçirilməsidir. 4 türk dövlətinin parlamentinin yaratmış olduğu qurum olaraq bunların arasında koordinativ rol həyata keçirəcək. Həmçinin, dünya türkdilli ölkələrin parlamentarilərin I qurultayının Antalyada keçirilməsi nəzərə tutulur. Bununla bağlı razılıq prosesi gedir və nəticələr barədə mətbuata məlumatlar verəcəyik.

Ramil Həsənov

Səs.- 2010.- 2 fevral.- S. 6.