Regionların Sosial-İqtisadi İnkişafı Dövlət Proqramı uğurla icra edilməkdədir

Musa Quliyev: "Bunun nəticəsində çox böyük infrasturuktur layihələri həyata keçirilir"

Azərbaycan öz iqtisadi və hərbi potensialına görə, regionda lider ölkəyə çevrilib. Ulu öndər Heydər Əliyev tərəfindən əsası qoyulan düzgün, məqsədyönlü siyasət və bu siyasətin tərkib hissəsi olan iqtisadi siyasət öz müsbət nəticəsini verməkdədir. Ümummilli lider Heydər Əlievin qeyd etdiyi kimi, "iqtisadiyyatı güclü olan ölkəyə hər şeyə qadirdir".

Prezident İlham Əliyevin rəhbərliyi ilə respublikamız güclü, qüdrətli bir dövlətə çevrilib. Artıq ölkəmizin valyuta ehtiyatları 20,4 milyard təşkil edir. Bu da, onu göstərir ki, beynəlxalq maliyyə böhranı hətta superdövlətlərin iqtisadiyyatını iflic etdiyi halda, respublikamız öz inkişaf tempindən geri qalmamış, əksinə, daha da inkişaf etmişdir. Məhz bütün bunların nəticəsidir ki, dünya ölkələri Azərbaycanla əməkdaşlıq etməyə maraq göstərirlər. Ölkə başçısının uğurlu siyasəti nəticəsində son 6 il ərzində respublikamızda 840 mindən artıq yeni iş yeri yaradılıb.Ötən il ərzində ümumi daxili məhsul 9,3 faiz, sənaye istehsalı isə 8,6 faiz artıb. Həmçinin, Azərbaycanın valyuta ehtiyatları 20 milyard dolları ötüb və eləcə də milli valyutamız dəyərdən düşməyib.Özəl sektor inkişaf etdirilmiş və bunun da nəticəsində ÜDM-də özəl sektorun payı 85 faiz təşkil edib. Eyni zamanda, "Regionların sosial-iqtisadi inkişafı Dövlət Proqramı (2009-2013)" uğurla icra edilməkdədir. Məsələyə münasibətini öyrəndiyimiz Milli Məclisin deputatı Musa Quliyev qeyd etdi ki, regionların sosial-iqtisadi inkişafı nəticəsində bölgələrdə işsizlik problemi öz həllini tapmışdır. Millət vəkili onu da qeyd etdi ki, son illər iqtisadiyyatımızın inkişafı nəticəsində əhalinin sosial müdafiəsi də gücləndirilib:

- Bildiyiniz kimi, ölkə başçısı İlham Əliyev tərəfindən regionların sosial-iqtisadi inkişafı ilə bağlı iki Dövlət Proqramı qəbul edilib. Beləki 2004-cü ilin fevralın 11-də Regionların Sosial-İqtisadi İnkişafına dair I Dövlət Proqramının qəbulu ilə bu işlərin əsası qoyuldu. Hazırda 2009-2013-cü illəri əhatə edən dövlət proqramı həyata keçirilir. Bu proqramın icra edilməsi bütün Azərbaycanın simasının müsbət mənada dəyişməsinə gətirib çıxardı. Ölkəmizin şəhərləri, kəndləri, ümumiyyətlə, bütün bölgələri abadlaşdı. Həmçinin, bu proqramlar çərçivəsində çox böyük infrasturuktur layihələri həyata keçirildi. Regionların təbii resurslarından səmərəli istifadə edilməsi üçün uğurlu işlər görüldü. Bütün bunların arxasında böyük işlər durur ki, bu, insanların sosial rifahının yaxşılaşmasına yönələn layihələrdir. Regionların iqlim xüsusiyyətlərinə, təbii şəraitinə uyğun olaraq, regionların inkişafı uğurla həyata keçirilir. Regionların sosial-iqtisadi inkişafının nəticəsi olaraq, bölgələrdə yeni iş yerləri, sosial obyektlər yaradılıb. Həmçinin, kənd təsərrüfatının müxtəlif sahələri inkişaf etdirilib. Emal sənayesinin rayonlar səviyyəsində qurulması, turizm sahəsinin sürətlə inkişaf etdirilməsi bütün bu işlərin bariz nümunəsidir. Bildiyiniz kimi, ötən il Prezident İlham Əliyev kurortların inkişafı ilə bağlı sərəncam imzalayıb və 2016-cı ilə qədər Dövlət Proramı hazırlanacaq ki, bunun da nəticəsində ölkəmiz kurort ölkəsinə çevriləcək. Bundan əlavə, Naxçıvandakı "Duzlaq" sanatoriyasının inkişafı və s. sahələrin inkişaf etdirilməsi, bütövlükdə, regionların inkişafına səbəb olacaq amillərdir. Regionların sosial-iqtisadi inkişafı sahəsində əldə edilən uğurların nəticəsidir ki, son illərdə Azərbaycanın regionlarında əhalinin demokrafik prosesləri də dəyişib. 2000-ci illərin əvvəllərində insanlar işləmək üçün kəndlərdən şəhərlərə, o cümlədən, xarici ölkələrə üz tuturdular. İndi isə, insanlar kəndlərinə qayıdırlar və iş üçün xaricə gedənlərin də sayı azalıb. Məsələn, Gəncədə əhalinin sayı son ildə 30% artıb. Bu misalları biz Azərbaycanın bütün rayonları ilə bağlı çəkə bilərik. Bu, bölgələrin sosial-iqtisadi inkişafının nəticəsidir. Regionların sosial-iqtisadi inkişafı ilə bağlı qəbul edilmiş II Dövlət Proqramının tərkib hissəsi olaraq, kəndlərimiz də inkişaf etdirilir. İndi artıq biz kəndlərin abadlaşmasından, kəndlərimizdə emal müəssisələrinin yaradılmasından söhbət edə bilərik. Onu da qeyd edim ki, artıq bölgələrdə kənd təsərrüfatı məhsullarının saxlanılması məqsədi ilə saxlama kameraları quraşdırılıb.

Cənab Prezidentimizin çox mühüm sərəncamlarından biri də azərbaycanlı gənclərin xaricdə təhsil alması ilə bağlıdır. Ölkə başçısı İlham Əliyev hər zaman qeyd edib ki, bizim əsas məqsədimiz neft kapitalını insan kapitalına çevirməkdir. Neftdən gələn gəlirlərin qeyri-neft sektorunun inkişafına yönəldilməsi ölkə rəhbərliyinin qarşıya qoyduğu əsas məsələlərdəndir. Bu il biz bunun nəticələrini görməkdəyik. Ölkəmizdə hər il ümumi daxili məhsulun həcmi artır. Ekspertlərin, beynəlxalq qurumların proqnozlarına görə, 2010-cu ildə Azərbaycanda ÜDM artımı 7 faizdən çox olacaq və bu da, ümumilikdə, Avropa iqtisadiyyatının inkişaf göstəricisindən 2-3 dəfə artıq deməkdir. Həmçinin, qeyd etmək lazımdır ki, son illər ərzində qeyri-neft sektorunun davamlı inkişafının, sahibkarlıq mühitinin daha da yaxşılaşmasının, iqtisadiyyata investisiya qoyuluşlarının artmasının, əhalinin məşğulluq səviyyəsinin yüksəlməsinin, yoxsulluğun azalmasının şahidi oluruq. Nəzərə almaq lazımdır ki, respublikamızda yoxsulluğun səviyyəsi 11 faizədək azalıb. Məlum olduğu kimi, Prezident İlham Əliyevin tərəfindən "2008-2015-ci illərdə Azərbaycan Respublikasında yoxsulluğun azalması və davamlı inkişaf Dövlət Proqramı" təsdiq edilib. Bu, əslində, müharibə şəraitində yaşayan bir ölkə üçün uğurlu bir nəticədir. İnkişaf və tərəqqi edən respublikamızda sahibkarlığın inkişafı da başlıca amillərdəndir. Bütün bunları nəzərə alan ölkə rəhbərliyi sahibkarlığın, özəl sektorun inkişafına böyük diqqət və qayğı göstərir. Azərbaycan Respublikası Prezidentinin "Sahibkarlığın fəaliyyətinin "bir pəncərə" prinsipi üzrə təşkilinin təmin edilməsi haqqında" Sərəncamı ölkədə sahibkarlıq fəaliyyətinin inkişafının sürətlənməsinə səbəb olub. Azərbaycanda sahibkarlığın inkişafı nəticəsində ötən il ÜDM-də özəl sektorun payı 86,4 faizdən artıq olub. Respublikamızda mövcud istehsal müəssisələrinin fəaliyyəti bərpa olunub, həmçinin, yeni müəssisələr yaradılıb ki, bu, həm sahibkarlığın inkişafına, həm də əhalinin işsizlik probleminin həllinə səbəb olub. Bütün bu nailiyyətlər, onu deməyə əsas verir ki, Prezident İlham Əliyevin uğurlu siyasətinin nəticəsi olaraq, ölkəmizin inkişafı davam edəcək. Davamlı inkişaf nəticəsində Azərbaycan daha da qüdrətlənəcək, əhalinin sosial vəziyyəti daha da yaxşılaşacaq.

"Rəqabət məcəlləsi haqqında" qanun layihəsi sahibkarlığın inkişafına öz müsbət təsirini gösətərcək. Faktdır ki, müəyyən sahələrdə monopoliya var. Ancaq onu da qeyd edib ki, monopoliyadan qorxmaq lazım deyil. Bu, dünyanın hər bir yerində var. Güclü şirkətlər çox zaman özündən kiçik şirkətləri bazarda sıxışdırır. Burada əsas məsələ haqsız rəqabətin getməməsindən gedir. Bu mənada, adıçəkilən qanun layihəsinin qəbul edilməsi mövcud problemlərin həllinə müsbət təsir edəcək. İnanıram ki, bu sahədə hüquqi baza yaradılacaq. Onu da qeyd edib ki, istehlak bazarında bəzən keyfiyyətsiz məhsullara rast gəlinir. Xüsusilə, ərzaq məhsullarının istehlakı ilə bağlı məsələlər çox xarakter alıbdır. Keyfiyyətsiz ərzaq məhsulları insanların sağlamlığına təhlükə yaradır. Hesab edirəm ki, bu kimi məsələlər də öz həllini tapacaq. Çünki əhalinin keyfiyyətli ərzaqla təminatı dövlətin başlıca məsələlərindəndir. Əvvəldə də, qeyd etdiyim kimi, bu gün ölkəmizdə çoxlu sayda müəssisələr yaradılıb fəaliyyət göstərir. Bütün istehsalçıların borcudur ki, əhaliyə keyfiyyətli məhsul təqdim etsinlər. Əminəm ki, bu cür problemlər öz həllini tapacaq.

ANAR MƏCİDZADƏ

Səs.-2010.-10 fevral.-S.7.