Azərbaycan qadınlarının ictimai-siyasi proseslərdə fəallığı daha da güclənməkdədir

Yeni Azərbaycan Partiyasının Qadınlar Şurasının sədri, partiyanın Siyasi Şurasının üzvü, Dövlət Pedaqoji Kollecinin direktoru Nurlana Əliyevanın yap.orq. az-a müsahibəsi

- Nurlana xanım, bu yaxınlarda Yeni Azərbaycan Partiyasının İdarə Heyətinin iclası keçirildi və iclasda ötən ilin yekunları da müzakirə olundu. İstərdik ki, 2009-cu ilin YAP Qadınlar Şurası üçün hansı nəticələrlə yadda qalması ilə bağlı sizin fikirlərinizi öyrənək.

- Bu gün Yeni Azərbaycan Partiyası cəmiyyətin siyasi avanqardı, respublikamızın ən nüfuzlu siyasi qüvvəsidir. Bunun əsas səbəbi qazanılmış uğurlar və YAP-ın sıralarındakı on minlərlə məsləkli, əqidəli insanlardır. Bizim, doğrudan da, geniş potensialımız var. Bəlkə elə buna görə də yaşadığı zamanın və məkanın xarakterindən asılı olmayaraq, Azərbaycan qadını gələcək taleyini daim inandığı, etimad bəslədiyi siyasi qüvvəyə etibar etmək istəyib.

Öz fəaliyyəti dövründə partiyamızın qurucusu, Ulu Öndər Heydər Əliyev Azərbaycan qadınına böyük hörmətlə yanaşmaqla yanaşı, onun cəmiyyətdə layiqli yer tutmasına çalışıb, bu zərif zümrənin YAP-ın həyatında da fəal iştirakını təmin edib. Qadınların hər zaman aparıcı qüvvə olduğunu bildirən Ümummilli Liderimiz onların milli xüsüsiyyətlərini olduqca yüksək dəyərləndirib: "Azərbaycan qadını tarix boyu öz ağlı, zəkası, namusu, qeyrəti, isməti, fədakarlığı, çalışqanlığı, mərdliyi, vətənpərvərliyi ilə millətinə, torpağına olan hədsiz məhəbbəti və gözəlliyi, Azərbaycan xalqının milli xüsusiyyətlərinə sadiqliyi ilə tanınmışdır. Qadın ailə saxlayan bir insandır. Ona görə də, bütün qadınlar bizim cəmiyyətdə çox əhəmiyyətli rol oynayırlar. Mən bunları deyərək, qadınların bizim üçün nə qədər əziz olduğunu bir daha bəyan etmək istəyirəm".

Azərbaycanda milli mənafe və dövlətçilik maraqlarının təmsilçisi olmaq kimi müqəddəs amalı özünün siyasi idealı, əsas fəaliyyəti hesab edən qadınlarımız öz mövqelərinə sadiqdirlər və ictimai-siyasi prosesin fəal iştirakçısıdırlar. Xatırladım ki, YAP-ın Qadınlar Şurası 1995-ci ildə yaradıldı. Partiyamızın sıralarında ilk olaraq ziyalı fəal qadınlar qoşuldular. Daha sonra ildən-ilə Qadınlar Şurasının sıraları xeyli genişlənməkdədir. Bu baxımdan, 2009-cu ildə də böyük uğurlar əldə edilib. Ötən il partiya sıralarına qoşulanlar arasında qadınlar da üstünlük təşkil edib. Statistik məlumata görə, 2009-ci ildə partiyaya 29 777 nəfər üzv qəbul olunub. Bütövlükdə, partiya üzvlərinin 39,3 faizini, yəni 196 340 nəfərini gənclər, 43,5 faizini, yəni 217 243 nəfərini isə qadınlar təşkil edib.

Bilirsiniz ki, bu günlərdə partiyamızın 500 mininci üzvü cəmiyyətə təqdim edildi. Yeri gəlmişkən, deməliyəm ki, partiyamızın həm 400 mininci, həm 450 mininci, həm də 500 mininci üzvü xanımlardır. Hesab edirəm ki, bu fakt da bizim üçün çox əhəmiyyətlidir. Bu, onu göstərir ki, qadınlar partiyamızın həyatında fəal rol oynayır. Son bələdiyyə seçkilərində də qadınların aktivliyi bir daha onların siyasi proseslərdəki rolunu təsdiqləyir.

- Qadınların son bələdiyyə seçkilərində iştirakına toxundunuz. Məlum oluğu kimi, YAP bu seçkilərdə qadınların da namizədliyinə böyük üstünlük verdi. Necə hesab edirsiniz, seçkinin nəticələrini qadınlar üçün uğurlu saymaq olarmı?

- Əlbəttə. Ötən 10 ilin səviyyəsi ilə müqayisə edəndə, 2009-cu il seçkilərində qadınların təmsilçiliyi əhəmiyyətli dərəcədə artıb. Bilirsiniz ki, əvvəllər bələdiyyələrdə qadınların təmsilçiliyi 3-4 faiz idi. Son seçkilərdə isə bələdiyyə üzvü seçilənlərin təxminən 30 faizini qadınlar təşkil edir. Hətta bəzi yerlərdə bələdiyyə sədrləri də qadınlar seçilib. Bu, çox müsbət haldır. Nəzərə alsaq ki, onların mütləq əksəriyyəti YAP-ın üzvləridir, onda bu, bizim üçün ikiqat uğurludur.

- Sizcə, bələdiyyələrə seçilən qadınlar onlara göstərilən etimadı doğrulda biləcəklərmi?

- Etimad məsələsinə gəlincə, mən burada cinsi ayrıseçkiliyin fərqləndirilməsinin tərəfdarı deyiləm. Çünki hər bir insanın məsuliyyəti, vicdanı, zəhmətsevərliyi, bacarığı cinsdən asılı olmayan fərdi xüsusiyyətlərdir. Son illər ölkəmizin həyatında, dövlətçiliyimizin möhkəmləndirilməsində qadınlarımızın fəaliyyətinə nəzər yetirəndə, belə bir təəssürat yaranır ki, ümumiyyətlə, qadınlarımız çox fəallaşıblar. İstər cəmiyyətimizin tərəqqisində, ayrı-ayrı sahələrdə uğurların əldə olunmasında, bələdiyyə seçkilərində ciddi nəticələrin qazanılması göstərir ki, qadınlar ictimai-siyasi proseslərin önündə gedən təbəqələrdəndir. Mənə elə gəlir ki, bələdiyyə seçkilərində uğur qazanan qadınlarımız da mənəvi imkanlarını, öz bacarıqlarını götür-qoy edəndən sonra bələdiyyə üzvlüyünə namizədliyini irəli sürmüşdülər. Çox böyük inam var ki, bələdiyyələrə seçilən qadınlarımız seçicilərinin etimadını doğrultmaq əzmindədir və yerli özünüidarəetmə orqanlarında böyük uğurlar əldə olunmasında mühüm rol oynayacaqlar.

- Nurlana xanım, ümumiyyətlə, Azərbaycanda gender siyasəti haqqında nə deyə bilərsiniz? Bu siyasət hansı nəticələr verməkdədir?

- Azərbaycanda bilikli və savadlı qadınlar həmişə ön sıralarda olublar, öz fəaliyyətlərində ciddi uğurlar qazanıblar. Onların sırasında alimlərimizdən, müxtəlif sahələrin ziyalılarından tutmuş, sadə peşə adamlarına qədər var. Amma xüsusilə qeyd etməliyəm ki, Azərbaycanda qadınların fəliyyəti Ümummilli Liderimiz Heydər Əliyevin ikinci dəfə hakimiyyətə qayıdışından sonra çox intensivləşib. Ümumiyyətlə, Ulu Öndər Heydər Əliyevə qədər Azərbaycan qadınını böyük cahanşümul işlərə pərvazlandıran, ruhlandıran, onları dövlət idarəçiliyinə cəlb edən ikinci dövlət başçısı olmayıb. Bilirsiniz ki, dövlət qadın siyasətinin müəllifi də Ulu Öndər Heydər Əliyevdir. Biz çox şadıq ki, Prezident İlham Əliyev bu gün Ulu Öndərimizin bu siyasətini uğurla davam etdirir. Hazırda Azərbaycan qadını beynəlxalq müstəvidə ölkəmizi, xalqımızı layiqincə təmsil edir. Xüsusilə, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın fəaliyyəti bu baxımdan hər bir Azərbaycan qadını üçün bir örnəkdir.

Hesab edirəm ki, qadınların ictimai-siyasi fəallığı ildən-ilə daha da artır, onlar həm ölkə daxilində, həm də beynəlxalq miqyasda keçirilən tədbirlərdə böyük nailiyyətlər qazanırlar. Eyni zamanda, vurğulamaq istəyirəm ki, gənclərin sağlam ruhda tərbiyə olunmasında, milli-mənəvi dəyərlərimizin qorunmasında və bütövlükdə, cəmiyyətimizin tərəqqisində qadınlar mühüm rol oynayır. Azərbaycanda gender siyasəti çox önəmli xarakter daşıyır. Bilirsiniz ki, bir müddət öncə, Milli Məclis tərəfindən gender məsələləri ilə əlaqədar "Qadınlara qarşı zorakılığa yox deyək!" mövzusunda mühüm tədbir keçirildi. Bu tədbirdə Azərbaycanın ən fəal, ziyalı qadınları iştirak edirdilər. Fikrimcə, bu tədbir zərif cinsin nümayəndələrinin inkişafı, cəmiyyətdə rolunun daha da artırılması baxımından əhəmiyyətlidir. Gələcəkdə də belə tədbirlərin keçirilməsi ümumi işimizə böyük fayda verə bilər.

- Siz, eyni zamanda, elm-təhsil adamısınız. Ölkəmizdə təhsilin inkişafını necə dəyərləndirirsiniz?

- Bu gün təhsil cəmiyyətin prioritet sahələrindəndir. Bilirsiniz ki, digər sahələrin inkişafı da, məhz təhsildən asılıdır. Bütövlükdə, təhsil hər bir millətin gələcəyidir. Bu gün Azərbaycanda təhsilin inkişafı və dünya təhsil sisteminə inteqrasiyası yönündə ciddi addımlar atılır, proqramlar icra olunur. Nəzərinizə çatdırım ki, hazırda təhsillə bağlı 20-ə yaxın Dövlət Proqramı icra olunmaqdadır. Bu fakt, dövlətimizin təhsilin inkişafına nə dərəcə önəm verməsinin göstəricisidir. Sevindirici haldır ki, ötən il "Təhsil haqqında" qanun qəbul olundu. Bu qanun özündə ən mütərəqqi dəyərləri birləşdirir və ölkəmizdə tədris işləri bu sənədin tələbləri əsasında həyata keçirilir.

Hesab edirəm ki, Azərbaycan təhsili dünya təhsil sisteminə fəal şəkildə inteqrasiya edir və bunun uğurlu nəticələrini görməkdəyik. Artıq təhsilimiz öz inkişafının yeni mərhələsinə qədəm qoyub.

Yeri gəlmişkən, qeyd etmək istəyirəm ki, qadınlarımızın da müasir biliklərə yiyələnməsi vacib amildir. Bələdiyyə seçkiləri ərəfəsində bütün rayonlara səfər etdik, yerlərdə problemlərlə tanış olduq. Fikrimcə, ucqar yerlərdə gənc xanımların təhsilə diqqətlərinin artırılmasına ehtiyac var. Bu baxımdan, fəal qadınlar həmin yerlərdə aktiv iş aparmalıdırlar. Ümumiyyətlə, qadınların gələcək fəaliyyətinə böyük inamla yanaşıram. Ana kimi onlar övladlarının gələcəyində, təhsilində, milli-mənəvi dəyərlərimizin qorunmasında oynadıqları rolu bundan sonra da uğurla davam etdirəcəklər.

Nurlana Əliyeva

Səs.-2010.-11 fevral.- S.4.