2009-cu il Səbail rayonu üçün uğurlu keçdi

Dünən Səbail rayon icra hakimiyyətinin akt zalında 2009-cu ilin yekunları ilə bağlı tədbir keçirildi. Tədbirdə Səbail rayonunda 2009-cu ildə sosial-iqtisadi inkişaf istiqamətində görülən işlərə yekun vurularaq, 2010-cu il üçün qarşıda duran vəzifələr müzakirə olundu. Hesabat yığıncağında məruzə ilə çıxış edən Səbail rayon icra hakimiyyətinin başçısı Asif Əsgərov ötən il Azərbaycan Respublikasının Prezidenti cənab İlham Əliyevin rəhbərliyi altında respublikanın sosial-iqtisadi inkişafı sahəsində əldə olunan nailiyyətlər barədə məlumat verdi. A.Əsgərov 2009-cu il ərzində rayonda görülən işləri təhlil edərək, həlli vacib olan problemlərin aradan qaldırılması yollarından danışdı.

Natiq qeyd edərək, bildirdi ki, ötən il Səbail rayonunda ilin yekunlarına görə sənaye müəssisələri üzrə 370,3 milyon manatlıq məhsul istehsal edilib, istehlakçılara 368,3 milyon manatlıq məhsul göndərilibdir. Nəqliyyat sektorunda fəaliyyət göstərən müəssisələr tərəfindən 372,8 milyon manatlıq və ya əvvəlki ilin müvafiq dövrünə nisbətən 1,8 faiz çox nəqliyyat xidməti göstərilibdir: "2009-cu ilin yanvar-noyabr ayları üzrə Səbail rayonunda çalışan işçilərin sayı 85462 nəfər, orta aylıq əmək haqqının məbləği isə 6519 manat olubdur ki, bu da əvvəlki illə müqayisədə 8 manat və ya 1,2 faiz çoxdur".

A.Əsgərov onu da söylədi ki, ötən il ərzində rayonda 2214 daimi iş yeri açılıbdır: "Ümumiyyətlə, 2003-cü ilin noyabrından 2010-cu ilin yanvar ayının 1-dək 31576 iş yeri açılıbdır ki, bunlardan 30920 iş yeri daimidir. Beş il ərzində Bakı şəhərində açılan daimi iş yerlərinin 18,3 faizi Səbail rayonunun payına düşür. Bakı şəhəri üzrə Səbail rayonu birincilər sırasındadır". Rayonda aparılan abadlıq işləri ilə bağlı məlumat verən Səbail rayon icra hakimiyyətinin başçısı bildirdi ki, Bibiheybət buxtasında neftlə çirklənmiş, əhali üçün təhlükə mənbəyinə çevrilən torpaqların təmizlənməsi ilə bağlı işlər davam etdirilir. Həmçinin, ötən il ərzində Səbail rayonu ərazisində olan MTN Mədəniyyət Mərkəzi, Nizami Gəncəvi adına Azərbaycan Ədəbiyyatı Muzeyi, Dövlət Gənc Tamaşaçılar Teatrı, Azərbaycan Bəstəkarlar İttifaqının binaları, Azərbaycan Dövlət İncəsənət Muzeyi, Rabitə və İnformasiya Texnologiyaları Nazirliyi, Teleradio İstehsalat Birliyinin Teleqüllə kompleksi, Azərbaycan prospekti, Daxili İşlər Nazirliyinin binası qarşısındakı yeraltı piyada keçidində aparılan əsaslı təmir-yenidənqurma işləri başa çatdırılıb. Mərkəzi Klinik Xəstəxananın ambulatoriyası, Milli Məclisin yeni korpusu, Azərbaycan Respublikası Hesablama Palatasının yeni binası istifadəyə verilib, "Dalğa Plaza" İş Mərkəzi və Urologiya Xəstəxanasında əsaslı təmir və yenidənqurma işləri başa çatdırılıbdır. Eləcə də şəhərimizin çoxsaylı qonaqlarının sevimli istirahət yerlərindən olan "Sahil" və "Filarmoniya" bağları istifadəyə verilibdir. Natiq onu da bildirdi ki, Yeni Azərbaycan Partyasının yaranış günü - noyabr ayının 21-də xüsusi layihə əsasında Yeni Azərbaycan Partiyası Səbail rayon təşkilatı üçün 3 mərtəbəli yeni binanın təməli qoyulub.

Məruzə ətrafında çıxış edən Milli Məclisin İqtisadi Siyasət Daimi Komitəsinin sədri Ziyad Səmədzadə, Azərbaycan Respublikası Prezident Administrasiyasının məsul işçisi Tağı Tağıyev və digər natiqlər Səbail rayonunun hesabatını uğurlu hesab etdilər. Tədbirin sonunda bu il yubileyləri keçiriləcək bir qrup ziyalıya və 2009-cu ildə müxtəlif müsabiqə və yarışlarda iştirak edib yüksək nəticələr əldə etmiş 10 nəfər orta məktəb şagirdinə rayon icra hakimiyyəti tərəfindən qiymətli hədiyyələr təqdim olunub. Yığıncağın sonunda iştirakçılar adından ölkə başçısı cənab İlham Əliyevə müraciət qəbul olunub.

RƏFİQƏ KAMALQIZI

Səs.-2010.-11 fevral.- S.10.