Ombudsman həmməruzəçilərlə görüş keçirdi

Dünən Azərbaycan Respublikasının İnsan Hüquqları üzrə müvəkkili Elmira Süleymanova ölkəmizdə səfərdə olan Avropa Şurası Monitorinq Komitəsinin Azərbaycan üzrə həmməruzəçiləri Andreas Herkel və Cozef Debono Qrexi, habelə, nümayəndə heyətinin digər üzvlərilə görüşdü. Görüşdə Avropa Şurası Baş katibinin Azərbaycandakı xüsusi nümayəndəsi Veronika Kotek iştirak etdi.Müvəkkil insan hüquq və azadlıqlarının təmin edilməsinin Azərbaycanın demokratik inkişafının mühüm istiqamətlərindən olduğunu qeyd etdi. O, təsisatın fəaliyyətinin əsas məqsəd və məramının insan hüquq və azadlıqlarının təmin olunmasına, pozulmuş insan hüquqlarının bərpasına, insan hüquqlarının müdafiəsi mexanizmlərinin təkmilləşdirilməsinə, hüquq pozuntularının qarşısının alınmasına yönəldiyini vurğuladı.

Həmməruzəçilərin suallarını cavablandıran E.Süleymanova əhalinin müxtəlif qruplarının, o cümlədən, qadınların, uşaqların, ahılların, əlillərin, qaçqın və məcburi köçkünlərin, hərbi qulluqçuların, məhkumların hüquqlarının təmin edilməsinin daha da təkmilləşdirilməsi ilə bağlı, onların problemlərinin həllinə yönəldilmiş təklifləri müvafiq dövlət orqanlarına göndərildiyini, həmçinin, Konstitusiya Məhkəməsinə bir neçə sorğunun ünvanlandığını söylədi. Müvəkkil, həmçinin, milli qanunvericiliyin təkmilləşdirildiyi, ölkəmizdə İnsan Hüquqlarının Müdafiəsi üzrə Milli Fəaliyyət Planının icra vəziyyəti haqqında məlumat verdi.

Ombudsmanın seçki prosesi ilə bağlı məlumatları operativ surətdə KİV-ə, o cümlədən, MSK-nın Seçkilər İnformasiya Mərkəzi vasitəsilə ictimaiyyətə çatdırıldığı bildirildi.

E.Süleymanova seçki prosesinə müşahidənin daha da genişləndirilməsi, bu istiqamətdə qanunvericiliyə riayət olunması, seçki prosesinə qatılan hər bir kəs üçün bərabər hüquqlar və bərabər imkanlar yaradılması üzrə geniş təbliğat işlərinin aparılmasını diqqətə çatdırdı. Müvəkkil bir problem kimi məişət zorakılığına qarşı mübarizədə müvafiq dövlət qurumları, QHT-lər, vətəndaş cəmiyyəti və kütləvi informasiya vasitələri nümayəndələrinin səylərinin birləşdirilməsinin zəruriliyini qeyd etmiş, məişət zorakılığı ilə bağlı müvafiq qanun layihəsinin parlamentdə müzakirə olunduğunu, ombudsmanın bu məsələ ilə bağlı müzakirələr keçirərək, təkliflər verdiyini diqqətə çatdırdı.

İşgəncələrə qarşı Konvensiyanın Fakültativ Protokoluna qoşulmaqla bağlı Milli Preventiv Mexanizm qismində ombudsmanın müəyyən edilməsi barədə həmməruzəçilərə məlumat verildi. Qeyd olundu ki, ATƏT-in Bakı ofisinin təşkilatçılığı ilə Ombudsman Aparatının və müvəkkilin regional mərkəzlərinin, müvafiq dövlət qurumlarının əməkdaşları üçün ölkəmizdə MPM-in tətbiqi üzrə seminarlar keçirilir. Qaçqın və məcburi köçkün, imkansız, ailə himayəsindən məhrum olmuş, uşaq müəssisələrində tərbiyə alan, habelə, baxımsız olan, zorakılığa məruz qalan və digər hüququ pozulmuş uşaqların problemləri ilə bağlı müvəkkilə dərhal müraciət etmək məqsədilə ombudsman təsisatında "916" nömrəli qaynar xəttin yaradıldığı və 24 saat ərzində fəaliyyət göstərdiyi bildirildi. Müvəkkilin uşaq hüquqları üzrə ixtisaslaşdırılmış məruzəsinin Milli Məclisə təqdim edildiyi, parlamentin plenar iclasında uşaqların vəziyyətinin müzakirə olunduğu da diqqətə çatdırıldı. Ombudsmanın media hüquqlarının müdafiəsinə və təmin olunmasına da önəm verdiyi, onlara qarşı kobud rəftar hallarının diqqətdə saxlandığı, bununla əlaqədar monitorinqlərin keçirildiyi, məsələnin qanun çərçivəsində həll edilməsi üçün aidiyyəti orqanlara müraciətlər olunduğu nəzərə çatdırıldığını da söylədi.

E.Süleymanova fikir mübadiləsi şəraitində keçən görüşdə A.Herkelin məhkəmə qərarlarının icrası sahəsində problemlər, vətəndaş cəmiyyəti və QHT-lərlə əməkdaşlıq, azərbaycanlı qaçqın və məcburi köçkünlərin, habelə, müxtəlif ölkələrdən respublikamıza gəlmiş qaçqınların vəziyyəti, söz və ifadə azadlığı, habelə, digər məsələlərlə bağlı suallarını cavablandırdı.

RƏFİQƏ KAMALQIZI

Səs.-2010.-13 fevral.-S. 6.