"Xocalıya qayıdacağıq" adlı anım tədbiri keçirildi

Dünən 23 saylı məktəbin akt zalında YAP Nəsimi rayon təşkilatı və Nəsimi rayon icra hakimiyyətinin birgə təşəbbüsü ilə Xocalı faciəsini gənclər arasında təbliğini gücləndirmək məqsədilə "Xocalıya qayıdacağıq" adlı anım tədbiri keçirildi. İlk öncə, Xocalı şəhidlərinin ruhu bir dəqiqəlik sükutla yad edildi.

Tədbirdə çıxış edən YAP Nəsimi rayon təşkilatının sədri, millət vəkili Məlahət İbrahimqızı bildirdi ki, Azərbaycan xalqına qarşı dəfələrlə törədilmiş və uzun illərdən bəri öz siyasi-hüquqi qiymətini almamış soyqırım əməlləri də tarixin açılmamış səhifələrindən biridir. O, vurğuladı ki, Azərbaycan xalqının XX əsrdə üzləşdiyi dəhşətli faciələrdən biri də Xocalı soyqırımıdır. Xocalı faciəsi Xatun, Lidisa, Oradur soyqırımı kimi insanlıq tarixinə düşmüş qanlı olaydır: "1992-ci il fevralın 25-dən 26-a keçən gecə Ermənistan silahlı qüvvələri, Azərbaycanın Dağlıq Qarabağ ərazisindəki erməni silahlı dəstələri, keçmiş SSRİ-nin Xankəndində yerləşən 366-ci motoatıcı alayının şəxsi heyətinin və texnikasının bilavasitə iştirakı ilə Xankəndi ilə Əsgəran arasında yerləşən Xocalı şəhərini zəbt etdilər. Onlar, həmçinin, Azərbaycan xalqına qarşı soyqırım siyasətini həyata keçirdilər. Qabaqcadan planlaşdırılmış kütləvi və amansız qırğın aktı həmin ərazidə yaşayan insanları, məhz azərbaycanlı olduqlarına görə, tamamilə məhv etmək niyyətilə törədilib".

Çıxış edən Nəsimi rayon icra hakimiyyətinin başçısı Nəsib Məhəməliyev bildirdi ki, son yüz ildən artıq dövrdə erməni xalqının bir neçə nəslinin müstəsnalıq, Azərbaycan xalqına qarşı düşmənçilik ruhunda tərbiyə edilməsi nəticə etibarı ilə XX əsrin sonlarında sivil dünyanın gözü qarşısında Xocalı soyqırımı kimi qanlı faciənin baş verməsinə gətirib çıxarıb. O, qeyd etdi ki, Xocalı soyqırımının günahkarları, təşkilatçıları və icraçıları layiqli cəzalarına çatmalıdır: "Cinayət cəzasız qala bilməz. Xocalı faciəsi bəşər övladına qarşı törədilmiş genosid və etnik təmizləmə hadisələri içərisində ən dəhşətlərdən olmuşdur. Hazırda, bu hadisələrdə hər hansı şəkildə iştirakçı olmuş şəxslər vaxt gələcək tarixin məhkəməsi qarşısında cavab verməli olacaqlar".

N.Məhəməliyev vurğuladı ki, doğma yurdlarından didərgin düşmüş və Azərbaycanın 48 rayonuna səpələnmiş Xocalı sakinləri Dağlıq Qarabağ münaqişəsinin ədalətli həlli, Ermənistanın Azərbaycana qarşı təcavüzünün dəf edilməsi, ölkənin ərazi bütövlüyünün bərpa edilməsi ümidi ilə yaşayır: "Biz inanırıq ki, ümumilli liderimiz Heydər Əliyevin siyasi kursunun davamçısı Prezident İlham Əliyevin apardığı uğurlu daxili və xarici siyasət nəticəsində torpaqlarımız işğaldan azad ediləcək, soydaşlarımız öz doğma yurd-yuvalarına qayıdacaq".

Tədbirdə Xocalı rayonunun sabiq icra başçısı, millət vəkili Elman Məmmədov Xocalıda baş verən hadisələrdən danışdı. Bildirdi ki, 1992-ci il fevralın 15-də axşam erməni hərbi birləşmələri keçmiş SSRİ-nin Xankəndində dislokasiya olunmuş 366-cı motoatıcı alayının ağır hərbi texnikasının dəstəyilə Xocalıya hücuma keçdilər. Artilleriya silahlarından, ağır hərbi texnikadan açılan aramsız atəşlə müşayiət olunan hücum nəticəsində Xocalı mühasirəyə düşdü, yanğınlar başlandı: "Fevralın 26-sı səhər şəhər alova bürünmüşdü. Həmin vaxt şəhərdə olan təqribən 2 min 500 nəfərə yaxın əhali məcburi şəkildə öz ev-eşiklərini ataraq Ağdama doğru hərəkət etdi. Lakin şəhəri tərk etmək hamıya nəsib olmadı. Erməni hərbi birləşmələri 366-cı alayın köməyilə dinc əhaliyə qarşı xüsusi qəddarlıqla cəza tədbirləri həyata keçirdi. Ermənilər 613 nəfər azərbaycanlını vəhşicəsinə qətlə yetirdilər. Onların 63-ü uşaq, 106-sı qadın, 70-i isə ahıl adam idi. 8 ailə bütövlükdə qətlə yetirildi. 487 nəfər yaralandı. Yaralananların 76 nəfəri uşaq idi. Girov götürülənlərin sayı 1275 nəfər təşkil edir. 150 nəfərin aqibətindən isə hələ də xəbər-ətər yoxdur. Dövlətə və vətəndaşlara külli miqdarda ziyan vuruldu. Qanlı faciə ilə bu və ya başqa cür əlaqəsi olan adamlar, hələ ki, öz vicdanları qarşısında məsuliyyət daşıyırlar. Lakin vaxt gələcək onlar cəzalarına çatacaqlar".

Tədbir məktəb şagirdlərinin "Xocalıya qayıdacağıq" adlı səhnə kompozisiyası ilə başa çatdı.

Sevinc NƏZƏROVA

Səs.-2010.-23 fevral.- S. 6.