Prezident Kitabxanasının "XX əsrin faciəsi - Xocalı soyqırımı" tammətnli elektron nəşri yenilənib

1992-ci il fevralın 26-na keçən gecə misli görünməmiş faciə törədildi. Erməni silahlı birləşmələri keçmiş SSRİ-nin Dağlıq Qarabağda yerləşən 366-cı motoatıcı alayının əsgər və zabitləri ilə birlikdə Xocalı soyqırımını törətdilər. 7 min nəfərə yaxın əhalisi olan Xocalı şəhəri topların və zirehli texnikanın köməyi ilə yerlə-yeksan edildi.

Mühasirədə olan şəhərin bütün əhalisi - körpə uşaqdan tutmuş, əlsiz-ayaqsız qocalaradək ucdantutma məhv edildi, bir çoxu isə əsir götürüldü. Günahsız, əliyalın insanlar təqib edilərək çöllərdə və meşələrdə güllələndilər. Meyitlərin dərisini soydular, bədən üzvlərini doğradılar.

Dünya mətbuatı Xocalı adlı bir şəhərin erməni vandalları tərəfindən yer üzündən silinməsi, əhalisinin soyqırıma məruz qoyulması haqqında xəbərlər və hadisə yerindən reportajlar yaydı. Çox təəssüf ki, sonradan yenə də Azərbaycan xalqının bu faciəsinə də biganəlik göstərildi, fəryadımızı özümüzdən başqa kimsə eşitmək istəmədi.

Təqdirəlayiqdir ki, son illərdə istər ölkəmizdə, istərsə də xarici ölkələrdə bir çox kitablar yazılmış, Xocalı soyqırımı qurbanlarının xatirəsinə abidələr ucaldılmış, dünya dövlətlərinə, xalqlarına və beynəlxalq təşkilatlara müraciətlər ünvanlanmış, xarici ölkələrdəki səfirliklərimizdə, nümayəndəliklərimizdə və diaspor təşkilatlarında bu dəhşətli hadisə ilə bağlı mətbuat konfransları, anma mərasimləri keçirilmiş, xarici mətbuat və teleradio kanallarında materiallar yayınlanıb.

SİA-nın məlumatna görə, Xocalı soyqırımının ildönümü ərəfəsində Azərbaycan Respublikası Prezidenti Administrasiyası rəhbərinin sərəncamı ilə təsdiqlənmiş tədbirlər planına uyğun olaraq Azərbaycan Respublikası Prezidentinin İşlər İdarəsinin Prezident Kitabxanasında 2007-ci ildə Azərbaycan, ingilis və rus dillərində hazırlanmış "XX əsrin faciəsi - Xocalı soyqırımı" adlı tammətnli elektron nəşr yeni materiallar hesabına əsaslı surətdə yenilənib.

Elektron nəşrə daxil olan materiallar 6 bölmədə qruplaşdırılıb.

"Xocalı soyqırımı" adlanan bölmədə Dağlıq Qarabağ münaqişəsinin qısa tarixçəsi, Xocalı soyqırımının miqyası haqqında istintaq materialları, zərərçəkənlərin ifadələri, tibbi ekspertiza rəyləri, xocalı şəhidlərinin ümumi siyahısı və s. materiallar toplanıb.

"Rəsmi materiallar" adlanan bölmədə Xocalı soyqırımının tanıdılması istiqamətində dövlət səviyyəsində atılan addımlar, qəbul edilən qərarlar, beynəlxalq təşkilatlara edilən müraciətlər, Xocalı faciəsinin beynəlxalq hüquq normaları baxımından soyqırım kimi tövsif edilməsi haqqında rəsmi sənədlər toplanıb.

"Xocalı soyqırımının əks-sədası" adlanan bölmədə isə bu günədək Xocalı soyqırımı ilə bağlı yerli və xarici mətbuatda dərc olunan, elektron kütləvi informasiya vasitələrində əksini tapan seçmə materiallar yerləşdirilmişdir. Bu bölmədə həmçinin Heydər Əliyev Fondunun Azərbaycan tarixinin qanlı səhifəsi olan Xocalı soyqırımının dünya ictimaiyyətinin diqqətinə çatdırılması istiqamətində həyata keçirdiyi məqsədyönlü işlər, müxtəlf dillərdə çap etdirdiyi nəşrlər haqqında məlumatlar toplanıb.

İslam Konfransı Gənclər Forumunun (İKGF) mədəniyyətlərarası dialoq üzrə baş əlaqələndiricisi və Heydər Əliyev Fondunun Rusiyadakı nümayəndəliyinin rəhbəri Leyla xanım Əliyevanın təşəbbüsü ilə 2008-ci ilin may ayından etibarən "Xocalıya ədalət" devizi altında beynəlxalq kampaniya çərçivəsində həyata keçirilən tədbirlər haqqında materiallar xronoloji ardıcıllıqla toplanaraq ayrıca bölmə şəklində istifadəçilərin diqqətinə çatdırılır.

"Elektron kitablar" bölməsində isə xalqımızın qan yaddaşına çevrilmiş bu faciədən bəhs edən seçilmiş kitabların elektron versiyaları toplanıb. Burada Həvva Məmmədovanın "Xocalı - səhidlər və şahidlər" (üç dildə), Səriyyə Müslümqızının "Ölümdən o yandakı Xocalı", "Ümid olmasa ölərəm" (ingilis dilində), Əsli Xəlilqızının "Güllələnmiş uşaqlıq" (üç dildə), Yuri Pompeyevin "Qarabağ qan içində" (Azərbaycan və rus dillərində), Feliks Sersvadzenin "Unudulmuş soyqırım" (rus dilində), Akif Aşırlının "Türkün Xocalı soyqırımı", Allahyar Xocalının "Vətən ağrısı, torpaq yanğısı", Elmira Axundovanın tərtib etdiyi "Xocalı - soyqırımın xronikası" (rus dilində) kitablarının elektron versiyaları hazırlanaraq oxucuların istifadəsinə təqdim edilir. "Xocalı soyqırımı saytlarda" bölməsində istfadəçilər mövzi ilə bağlı faydalı saytlara yönləndirilir.

Səs .- 2010.- 24 fevral.- S. 5.