“Dünya birliyi ermənilərin Xocalı qətliamına hüquqi qiymət verməlidir"

Bütün Qafqazın Şeyxi dünya ölkələrinə müraciət ünvanladı

Qafqaz Müsəlmanları İdarəsinin sədri Şeyxülislam Allahşükür Paşazadə Xocalı soyqırımının 18-ci ildönümü ilə bağlı dünya xalqlarına, dövlət başçılarına, parlamentlərə və beynəlxalq təşkilatlara müraciət ünvanlayıb. QMİ-nin müraciətində deyilir ki, cahanda elə bir xalq, elə bir din ola bilməz ki, ümumbəşəri mənəvi dəyərləri inkar etsin, zor, qətl, təcavüz kimi qeyri-humanist əməllərə haqq qazandırsın, qanlı cinayətlərə bəraət versin. Bəşəriyyət insanlığa qarşı cinayətləri daima nifrətlə damğalamış, insan sifətini itirmiş qatillərin əməllərini həmişə lənətləmişdir. Müraciətdə dünya tarixinin qanlı səhifələrindən birini təşkil edən və Xatın, Lidise kimi bəşəri müsibətlərlə bir sırada duran Azərbaycanın Xocalı şəhərində törədilən soyqırımın hələ də tarixin mühakiməsinə verilməməsi təəssüf hissi ilə qeyd olunur. Bu misli görünməmiş soyqırımı faktının bugünədək öz layiqli siyasi qiymətini almadığı diqqətə çatdırılır.

Bəşəriyyətin qan yaddaşında ikili standartlar yolverilməzdir, lakin artıq on səkkiz ildir ki, barəsində aləmə car çəkdiyimiz Xocalı faciəsi bugünədək dünya səviyəsində qınaq obyektinə çevrilməmiş, onun baiskarları lənətlənməmişdir. QMİ-nin müraciətində bir sıra tarixi faktlara diqqət yönəldilir. Bildirilir ki, 1992-ci il fevralın 26-da Xocalının 10 mindən artıq dinc, silahsız, müdafiəsiz əhalisinin erməni quldurlarının amansız basqınına məruz qalması, 613 nəfərin qətlə yetirilməsi, qocalara, uşaqlara, hamilə qadınlara belə rəhm olunmaması, 1275 nəfərin əsir götürülərək ağır işgəncələrə məruz qalması, meyidlərin üzərində təhqiramiz həqarətlər edilməsi kimi vəhşiliklərə biganə qalmaq bəşəriyyətə baş ucalığı gətirə bilməz.

Bütün dünya sözdə etiraf edir ki, hər bir cinayətkar və terrorçu, milli və dini mənsubiyyətindən asılı olmayaraq, məsuliyyətə cəlb olunmalı və beynəlxalq hüquq qarşısında cavab verməlidir. Lakin acı reallıq ondan ibarətdir ki, erməni ekstremistləri törətdikləri cinayətlərə görə hələ də cəza almamış, heç bir beynəlxalq qurumun, hətta BMT-nin qətnamələrinə məhəl qoymadıqları halda, onlara qarşı heç bir sanksiya tətbiq olunmamışdır. Ermənilərin Azərbaycana qarşı zaman-zaman törətdiyi vəhşiliklərin cəzasız qaldığını vurğulayan QMİ, bu səbəbdən ərazimizin 20 faizinin onlar tərəfindən işğal edildiyini və milyonlarla azərbaycanlının doğma yurdlarından didərgin salındığını qeyd edir. Belə olan halda, erməni ekstremistləri öz təcavüzkarlıq planlarından əl çəkməmiş, qəsb etdiyi torpaqlarda vandalizm aktları həyata keçirərək mədəniyyət abidələrini, məscid və qəbiristanlıqları xarabalığa çevirmiş, maddi və mənəvi terroru gerçəkləşdirmiş, tarixi sənəd və əşyaları mənimsəyərək özününküləşdirmişdir.

Müraciətdə o da vurğulanır ki, qəsbkar siyasət yeridən erməni ekstremistləri cəzasız qalmalarından ruhlanaraq, qəsb etdikləri torpaqları işğal altında saxlayır, atəşkəsi, mütəmadi olaraq, pozmağa cəhd edir, sülh danışıqları prosesində konstruktivlik görüntüsü yaradaraq, beynəlxalq ictimai rəyi aldadır və problemin həllini bilərəkdən yubadır: "Mən, din xadimi olaraq, bütün dünya xalqlarına sülh, səadət, əmin-amanlıq və rifah diləyirəm. Üzümü dünya ölkələrinin dövlət başçılarına, parlamentlərinə, xalqlarına və beynəlxalq təşkilatlarına tutaraq, Azərbaycana qarşı erməni ekstremistlərinin təcavüzünə və vəhşiliklərinə prinsipial hüquqi qiymət verməyə, xalqımızın faciəsinə biganə qalmamağa, Xocalı müsibətini insanlığa qarşı soyqırımı aktı kimi tanımağa çağırıram".

Müraciətin sonunda qeyd olunur ki, O bir olan Allah müqəddəs dəyər olan insan həyatına edilən qəsdə göz yumulmasını heç zaman bağışlamaz. Rəbbimiz qarşısında, bəşəriyyət qarşısında vicdan naminə müqəddəs borcumuz ədalətin zəfər çalmasına nail olmaqdır.

KÜBRA ƏLİYARLI

Səs.- 2010.- 24 fevral.- S. 6.