Yeni Azərbaycan Partiyası ölkənin ən güclü partiyasıdır

Bu nüfuz partiyanın 17 ildə əldə etdiyi uğurlar sayəsində qazanılıb

Ölkənin ictimai-siyasi həyatında mühüm rol oynayan YAP-ın Masallı rayon təşkilatının yaranmasının 17-ci ildönümü ilə əlaqədar rayon icra hakimiyyətinin akt zalında tədbir keçirildi.

Tədbir iştirakçıları ilk öncə rayonun mərkəzində ucaldılan ümummilli liderimiz Heydər Əliyevin abidəsi önünə əklil qoydular. Sonra YAP Masallı rayon təşkilatının qərargahında keçirilən tədbiri rayon təşkilatının sədri Əmanət Əzizov açaraq partiyanın respublikanın çox gərgin bir dövrdə ulu öndərimiz Heydər Əliyev tərəfindən yaradıldığını və tarixi bir partiya olduğunu bildirdi. Partiyanın keçdiyi yoldan danışan Ə.Əzizov onu da vurğuladı ki, müstəqillik əldə etdikdən sonra 1990-cı illərin əvvələrində Azərbaycan çoxsaylı problemlərlə üzləşmişdir. Bu da o vaxtkı rəhbərliyin yarıtmaz fəaliyyətinin bilavasitə nəticəsi idi: "Azərbaycanı belə dəhşətli vəziyyətdən Heydər Əliyev dühası xilas etdi. Yeni Azərbaycan Partiyasının yaranması və inkişafı Azərbaycanın siyasi həyatında ümid çırağı yandırdı. Xalq əmin oldu ki, Azərbaycanı nicat yoluna çıxaracaq, möhtəşəm siyasi qüvvə artıq mövcuddur. Bu siyasi qüvvəyə görkəmli dövlət xadimi Heydər Əliyev rəhbərlik edirdi".

1992-ci il noyabr ayının 21-i tarixinin ulu öndərimiz Heydər Əliyevin xalqımıza bəxş etdiyi gün olduğunu deyən Ə.Əzizov Yeni Azərbaycan Partiyasının Naxçıvanda çox ağır şəraitdə yaradıldığını qeyd etdi. Belə bir ağır vəziyyətdə 1992-ci ilin oktyabrında 91 nəfər ziyalı "Səs" qəzeti vasitəsi ilə ulu öndərimizə müraciət etdi. Bu müraciətə cavab olaraq ümummilli liderimiz "Səs" qəzetində "91-lər"ə cavab verdi. Beləliklə, Yeni Azərbaycan Partiyası böyük əzab-əziyyətlər nəticəsində, müxtəlif təzyiqlərə məruz qalmasına baxmayaraq yaradıldı.

YAP Masallı rayon təşkilatının ilk təsis konfransını 1993-cü il fevralın 26-da keçirildiyini qeyd edən Ə.Əzizov bu gün partiyanın sırasının getdikcə sıxlaşdığını və 7 mindən çox üzvünün olduğunu vurğuladı: "Təsis konfransından keçən müddət ərzində, rayon təşkilatının üzvlərinin sayı getdikcə artdı. Bu gün 7 mindən çox partiya üzvündən 1740 nəfəri qadınlar, 1444 nəfəri isə gənclərdir".

YAP Masallı rayon təşkilatının sədri onu da bildirdi ki, bu gün ümummilli liderimiz Heydər Əliyevin qurucusu olduğu Yeni Azərbaycan Partiyası böyük sınaqlardan uğurla çıxıb, cəmiyyətin, dövlətin aparıcı siyasi qüvvəsinə çevrilib. Yeni Azərbaycan Partiyası bu gün Prezident İlham Əliyevin Sədrliyi ilə öz fəaliyyətini yüksək səviyyədə davam etdirir. Partiyamızın sıraları gündən-günə daha da genişlənir, YAP üzvlərinin sayının durmadan sürətlə artmasını və 500 mindən çox üzvünün olmasını Azərbaycanın siyasi lideri, Prezident İlham Əliyevin sosial-siyasi tərəqqi və davamlı islahatlar kursuna göstərilən böyük etimadın göstəricisi olduğundan irəli gəldiyini söylədi: "Başqa sözlə, məhz Heydər Əliyevin partiyası kimi yaranan, formalaşan, iqtidara gələn Yeni Azərbaycan Partiyası siyasi varislik prinsipinə uyğun olaraq, bu gün məhz Prezident İlham Əliyevin partiyası kimi böyük nüfuz, rəğbət qazanır, öz fəaliyyətini, nailiyyətlərini daha da genişləndirir. Bir faktı da qeyd etmək lazımdır ki, bu gün bəzi qüvvələr YAP-ın fəaliyyətinin getdikcə gücləndiyindən narahatçılıq hissi keçirsələr də, bu gün xalq dağıdıcı müxalifət partiyalarının fəaliyyətinin tamamilə dayandırılması tələbi ilə çıxış edir. Hakim partiya olan Yeni Azərbaycan Partiyası güclü iqtisadi göstəricilər nümayiş etdirməklə yanaşı, həm də güclü siyasi partiyadır. Çünki bu partiyanın yaradıcısı ümummilli liderimiz Heydər Əliyev və bu siyasətin davamçısı olan ölkə Prezidenti İlham Əliyev Yeni Azərbaycan Partiyasının Sədridir. Ulu öndərimiz Heydər Əliyevin bu fikri vətənini, xalqını, millətini sevənlərin qəlbində əbədi olaraq qalır: " Heç bir siyasi qüvvə YAP ilə rəqabət aparmaq iqtidarında deyil." Məhz bunun nəticəsidir ki, Azərbaycan xalqı, o cümlədən, Masallı rayon ictimaiyyəti Yeni Azərbaycan Partiyasına, onun siyasi qüvvəsinə, partiyanın yaradıcısı ulu öndərimiz Heydər Əliyevə və bu yolu davam etdirən ölkə Prezidenti, Yeni Azərbaycan Partiyasının Sədri İlham Əliyev cənablarına inanır və Onun ətrafında sıx birləşəcəklərini nümayiş etdirir."

Tədbirdə YAP Siyasi Şurasının üzvü Şirvan Əbilov bütün partiya üzvlərini təşkilatın 17 illik yubileyi ilə əlaqədar təbrik etdi və ən nüfuzlu, eyni zamanda, öz fəaliyyət prinsipi ilə seçilən Yeni Azərbaycan Partiyası ətrafında onların daha sıx birləşmələrini tövsiyə etdi. Qeyd etdi ki, ulu öndərimiz Heydər Əliyevin dövlətimiz üçün etdikləri əvəzsizdir. O, Azərbaycançılıq ideyasının, sözün həqiqi mənasında, təbliğatçısı olmuşdur.

Ş.Əbilov ulu öndərin apardığı siyasətin davamçısı olan ölkə Prezidenti İlham Əliyevin son illər ərzində uğurlu inkişafa nail olduğunu qeyd edərək, Onun bütün regionların inkişafına böyük diqqət yetirdiyini vurğuladı: "Bu işlər bundan sonra da davam etdiriləcəkdir. Hansı millətin lideri varsa, o dövlət basılmazdır. Məhz bu baxımdan, Azərbaycan xalqı fəxr edir ki, ümummilli liderimiz Heydər Əliyev kimi lideri və bu kursunun uğurlu davamçısı alternativi olmayan Prezidenti var. Yeni Azərbaycan Partiyasının Sədri İlham Əliyevin Azərbaycanı çiçəklənən bir ölkəyə çevirməsi və Yeni Azərbaycan Partiyasını dünyanın siyasi partiyaları cərgəsində birinci etməsi danılmaz faktdır. Çünki Yeni Azərbaycan Partiyası sınaqlardan çıxmış, böyük və şərəfli yol keçmiş, indi isə Azərbaycan cəmiyyətində özünəməxsus yol tutmuş bir partiyadır".

Tədbirdə YAP Masallı rayon təşkilatının üzvü Elman Rəhimov, Aslan İbişov, Qumru Rəhimova və başqaları çıxış edərək Yeni Azərbaycan Partiyasının üzvü olduqları üçün fəxr etdiklərini bildirdilər.

RƏFİQƏ KAMALQIZI

Səs.- 2010.- 26 fevral.- S. 4.