Xocalı faciəsindən 18 il ötür

Azərbaycan xalqı bu tarixi soyqırım günü kimi qeyd edir

Xocalı soyqırımından 18 il ötür. Bu faciə ermənilərin xalqımıza qarşı törətdikləri növbəti soyqırım aktıdır. Məsələyə münasibətini öyrəndiyimiz ölkə ictimaiyyətinin nümayəndələri, partiya sədrləri qeyd etdilər ki, bu cinayətdə əli olan şəxslər mütləq cinayət məsuliyyətinə cəlb olunmalı və cəzalarını almalıdırlar.

Aydın Hüseynov,

YAP Siyasi Şurasının üzvü, partiyanın Qaradağ rayon təşkilatının sədri:

- İki əsrdən artıqdır ki, xalqımız erməni terrorundan əziyyət çəkir. Bununda nəticəsində yüzlərlə soydaşımız həlak olub, itkin düşüb, əsir alınıb. Dünyada heç bir xalq azərbaycanlılar qədər soyqırıma məruz qalmayıb. Yəni hər zaman erməni vəhşiliyini hiss etmişik. Hazırda 20 faiz torpağımız Ermənistanın işğalı altındadır. Təəssüf ki, hələ də bu işğal aradan qaldırılmayıb. Heç şübhəsiz ki, bu, işğalçı ölkə olan Ermənistanın qeyri-konustruktiv mövqeyindən irəli gəlir.

Ölkə Prezidenti İlham Əliyevin apardığı uğurlu siyasət nəticəsində ermənilərin nəzarəti altında olan Dağlıq Qarabağ işğaldan azad olunacaq. Əgər bu münaqişə sülh yolu ilə öz həllini tapmasa, biz hərbi yolla biz buna nail olacağıq. Çünki Azərbaycanın güclü ordusu var və xalqımız hər zaman düşmənə cavab verməyə hazırdır. Heç şübhəsiz ki, ermənilər layiqli cavablarını alacaqlar.

Ulu öndər Heydər Əliyevin uğurlu siyasətinin bir istiqaməti də ondan ibarət oldu ki, xaricdə yaşayan soydaşlarımız diaspora şəklində bir araya gətirildi. İndi əminliklə deyə bilərik ki, Azərbaycanın xaricdə güclü diasporası formalaşıb. Xaricdə fəaliyyət göstərən diaspora təşkilatlarımız son illər ərzində Azərbaycan həqiqətlərini dünya ictimaiyyətinin diqqətinə çatdırılması istiqamətində uğurlu işlər görməkdədir. Bu, Azərbaycan dövlətinin və bütövlükdə ölkəmizin əldə etdiyi qələbədir. Yəni biz informasiya müharibəsində erməniləri qabaqlamışıq. İstərdim ki, dünya ictimaiyyəti də Ermənistanın ədalətsiz hərəkətlərinə göz yummasın.

Kamil Seyidov,

Azad Respublikaçılar Partiyasının sədri:

- Xocalı faciəsini törədən şəxslər hələ öz cəzalarını almayıblar. Həmin şəxslərin cinayət məsuliyyətinə cəlb olunmalarının zamanı çoxdan yetişib. Müsbət haldır ki, Prezident Administrasiyasının rəhbəri, akademik Ramiz Mehdiyev tərəfindən Xocalı soyqırımının keçirilməsinə dair tədbirlər planı təsdiq edilib. Gərək ölkə gəncləri bu faciəni unutmasınlar. Ötən əsrin əvvələrində də ermənilər ölkəmizə, xalqımıza qarşı faciələr törədiblər. XX əsrin 90-ci illərində düşmənlərimiz növbəti dəfə soydaşlarımıza qarşı amansızlıq törətdilər. Sevindirici haldır ki, müasir gənclik, gənclər təşkilatı Azərbaycan xalqının başına gətirilən bu faciəni dünya ictimaiyyətinin diqqətinə çatdırılmasında uğurlu fəaliyyət göstərir. Məlumdur ki, Ermənistan tərəfindən torpaqlarımız işğal olunub. Bir milyondan artıq soydaşımız qaçqın və məcburi köçkün şəraitində yaşayır. Beynəlxalq təşkilatların, o cümlədən, BMT və AŞPA-nın bununla bağlı qətnamələri mövcuddur. Lakin dəfələrlə qeyd olunduğu kimi, beynəlxalq təşkilatlar ikili standartlardan çıxış etməkdədirlər. Hesab edirəm ki, beynəlxalq qurumlar ermənilərin Azərbaycan xalqına qarşı törətdikləri soyqırım aktlarına və işğal faktına laqeyd münasibət göstərməməlidirlər. Təcavüzkarla təcavüzə məruz qalan ölkəyə münasibət eyni olmamalıdır.

Mais Səfərli,

"Yurddaş" partiyasının sədri:

- Xocalı soyqırımı XX əsrdə dünyada baş vermiş ən dəhşətli cinayətlərdən biridir. Bu faciə ermənilərin soydaşlarımıza, bütövlükdə, türklərə qarşı apardığı soyıqırım siyasətinin bariz nümunələrindəndir. Ermənilər zaman-zaman torpaqlarımıza yiyələnib və bizim dədə-baba torpaqlarımızda öz ölkələrini qurublar. Bizim yurddaşlarımızı məhv ediblər, öz torpaqlarından didərgin salıblar. Azərbaycan dövlətinin, ölkə rəhbərliyinin apardığı siyasət nəticəsində Xocalı faciəsi ilə bağlı dünya ictimaiyyəti geniş məlumata malikdir. Son illər ərzində Xocalının soyqırım kimi tanıdılması ilə bağlı çox böyük işlər görülür. Heydər Əliyev Fonduunun Rusiya təmsilçisi Leyla Əliyevanın "Xocalıya ədalət" kampaniyası çox böyük əks-səda yaradıbdır. Düşünürəm ki, çox vaxt çəkməyəcək ki, dünya ölkələrinin parlamenti Xocalı faciəsini soyqırım kimi tanıyacaq.

Mütəllim Rəhimov,

Ədalət Partiyasının sədr müavini:

- Xocalı faciəsinin dünya ictimaiyyətinin diqqətinə yetərincə çatdıra bilsək, ermənilərin hansı əqidəyə xidmət etdiklərini göstərmiş olarıq. Son zamanlar Xocalı soyqırımının dünya ictimaiyyətinin diqqətinə çatdırılması istiqamətində tədqirəlayiq işlər görülməkdədir. Beynəlxalq ictimaiyyətin diqqətini Xocalı soyqırımına yönəldə bilmişik. Azərbaycan diasporasının bu istiqamətdə xarici ölkələrdə gördüyü işlər, onu deməyə əsas verir ki, bu məsələyə artıq xüsusi diqqət ayrılıb. Azərbaycan xalqı hər zaman bu məsələni diqqət mərkəzində saxlamalıdır. Çünki Xocalı faciəsi insanlıq əleyhinə yönəlmiş soyqırımdır. Hesab edirəm ki, bu faciəni törədənlər mütləq öz cəzalarını almalıdırlar. Çox təəssüf ki, beynəlxalq aləmdə ermənilər daha çox müdafiə olunur. Yəqin ki, bu da xristian amili ilə əlaqədardır.

Ənvər Ağayev, "Ümid" partiyasının sədr müavini:

- Xocalı soyqırımı insanlığa qarşı törədilən ən ağır cinayətlərdən biridir. Xalqımız hər zaman bu soyqırımı dərin hüznlə yad edir və çalışır ki, bu faciəni dünya ictimaiyyətinə olduğu kimi çatdırsın. Xocalı soyqırımının beynəlxalq aləmə olduğu kimi çatdırılmasında son dövrlərdə görülən işlər çox mühüm əhəmiyyət kəsb edir. Bu istiqamətdə aparılan işləri yüksək qiymətləndiririk. Dünya dövlətləri bilməlidirlər ki, ermənilər insanlıqdan, humanizmdən qətiyyən uzaq olan millətdirlər və heç bir ölkə Ermənistanın yürütdüyü bu vəhşi siyasəti dəstəkləməməlidir.

Mikayıl Rəhimov, BAXCP Ali Məclisinin sədri:

- Xocalı soyqırımı bəşər tarixində ən dəhşətli faciələrdən biridir. Bu faciənin dünya ictimaiyyətinə olduğu kimi çatdırılması hər bir kəsin vətəndaşlıq borcudur. Azərbaycanda bu istiqamətdə aparılan işlər müsbət yöndədir. Çünki beynəlxalq ictimaiyyət ermənilərin hansı vəhşilikləri törətdiklərini bilməlidir. Dünya bilməlidir ki, erməni xalqı ən qəddar və amansız bir xalqdır. Mütləq Xocalı soyqırımı törədən şəxslər öz cəzalarını almalıdırlar.

Elman Nəsirov, politoloq:

- Əslində, bu hadisənin faciə adlandırılması doğru olmazdı. Bu hadisə ermənilərin soydaşlarımıza qarşı törətdikləri növbəti soyqırım hadisəsidir. Biz 26 fevral hadisələrini dünya ictimaiyyətinin diqqətinə soyqırım kimi çatdırmalıyıq. Ermənistan işğalçı və terrorçu bir dövlətdir. Adıçəkilən ölkənin hakimiyyətdə təmsil olunan şəxsləri - prezident Serj Sarksiyan, indiki müdafiə naziri Seyran Oqanyan və digərləri soydaşlarımıza qarşı aparılan soyqırım hadisələrində əli olan şəxslərdir. Bu gün Azərbaycan həqiqətlərinin beynəlxalq ictimaiyyətin diqqətinə çatdırılmasında böyük işlər görülməkdədir. Heydər Əliyev Fondu və bu fondun Moskva nümayəndəliyinin rəhbəri Leyla xanım Əliyevanın təşəbbüsü ilə "Xocalıya ədalət" kampaniyası həyata keçirilməkdədir. Bu da, onu göstərir ki, Azərbaycan dövləti erməni vəhşiliyinin dünya ictimaiyyətnin diqqətinə çatdırılmasında uğurlu işlər görməkdədir.

Müəllif: Cahid SÜLEYMANOV,

Anar MƏCİDZADƏ

Səs.- 2010.- 26 fevral.- S. 10.