Xocalı soyqırımı - ənənəvi erməni siyasəti

İ.Əbilov adına Mədəniyyət Mərkəzində Xocalı faciəsinin 18-ci ildönümünə həsr olunmuş anma mərasimi keçirildi. Tədbirdə ilk olaraq Azərbaycan Himni səsləndirildi.

Tədbiri giriş sözü ilə açan mərkəzin bədii rəhbəri Mirəhməd Əsgərov 1992-ci il fevralın 25-dən 26-na keçən gecə Ermənistanın işğalçı ordusunun Azərbaycanın qədim Xocalı şəhərinə təcavüz etməsi, yüzlərlə günahsız insanın qətlə yetirilməsi haqqında danışdı. O, xalqımızın ən böyük faciələrindən biri olan Xocalı soyqırımını xarakterizə edib, 1992-ci il fevralın 25-dən 26-na keçən gecənin dəhşətlərindən danışdı. Qeyd etdi ki, Xocalı faciəsi XX əsrdə ermənilər tərəfindən xalqımıza qarşı törədilmiş növbəti kütləvi qırğın olmaqla bərabər, həm də Azərbaycanın ərazi bütövlüyünə və dövlət müstəqilliyinə qarşı yönəlmiş ənənəvi terror siyasətinin əyani təzahürüdür.

Mərkəzin direktoru qeyd etdi ki, Xocalı faciəsi, Xocalı soyqırımı işğalçı Ermənistanın Azərbaycana qarşı hərbi təcavüzünün əsil mahiyyətini və erməni vəhşiliyinin dəhşətlərini bütün çılpaqlığı ilə üzə çıxardı:"Bu dəhşətli hadisə həm də Azərbaycanın Qarabağ müharibəsində aldığı ən böyük zərbə idi. Bu ağır zərbənin və hərbi uğursuzluğun ən böyük səbəbləri isə, təbii ki, həmin dövrdə Azərbaycanın rəhbərliyində təmsil olunan şəxslərin məsuliyyətsizliyi, səriştəsizliyi və ən başlıcası isə, xalqımızın milli maraqlarına xəyanət etmələri olmuşdur. Xocalının erməni hərbi birləşmələri tərəfindən mühasirəsi, faktiki olaraq, 1991-ci ilin oktyabrından başlanmışdı."

Tədbirdə çıxış edən respublikanın əməkdar müəllimi Məlahət Həsənova Xocalı faciəsinin dünya ictimaiyyətinə çatdırılmasında, ona verilən siyasi qiymətdən danışdı. O bildirdi ki, "Genosid cinayətlərinin qarşısının alınması və cəzalandırılması haqqında" Konvensiyasının şərtlərinə görə Xocalı faciəsini məhz soyqırımı adlandırmağa imkan yaradırdı. Belə ki, həmin sənəddə milli, etnik, yaxud dini qrupun tam və ya qismən məhv edilməsilə törədilən bir sıra hərəkətlər genosid cinayətinin mahiyyətini təşkil edir. Xocalıda ermənilər tərəfindən vəhşicəsinə törədilmiş hərəkətlər bu faciənin genosid olmasını sübut etmək üçün kifayət qədər əsas verirdi.

Tədbirdə Ü.Hacıbəylinin ev-muzeyinin direktoru, əməkdar incəsənət xadimi Sərdar Fərəcov bəstəkarlarımızın Xocalı faciəsinə həsr olunmuş əsərlərindən söz açdı. Şair Sevinc Nuruqızı bu mövzuda şeirlərini oxudu.

Tədbirdə çıxış edənlər Xocalı soyqırımından, onun törətdiyi dəhşətlərdən söz açdılar. Qeyd olundu ki, bu soyqırımı bəşəriyyətə və insanlığa qarşı yönəlmiş ən qəddar cinayətlərdən biridir. Beynəlxalq hüququn norma və prinsiplərinə əsla məhəl qoyulmadan həyata keçirilmiş bu soyqırımı aktı xalqımızın azadlıq və müstəqillik istəyini məhv etməyə yönəldilmişdi. Çıxış edənlər bir daha Xocalı faciəsi zamanı, eləcə də, Azərbaycanın ərazi bütövlüyü və dövlət müstəqilliyi uğrunda şəhid olmuş bütün soydaşlarımıza "Allah rəhmət eləsin!" deyərək, onların ailə üzvlərinə, doğmalarına və yaxınlarına səbr və dözüm dilədilər.

Sonda mərkəzin nəzdindəki "Mədəniyyət inciləri" uşaq teatrının ifasında Racu Şıxlının "366-cı" əsəri əsasında hazırlanmış birhissəli, eyniadlı tamaşa göstərildi.

Murad İSMAYILZADƏ

Səs.- 2010.- 27 fevral.- S. 13.