Milli dövlətçilik təfəkkürünün başlanğıcı

Ulu öndər Heydər Əliyevin Azərbaycanda rəhbərliyə gəlməsindən ötən 41 ilin ölkəmizin inkişafında, beynəlxalq aləmdə imicinin daha da möhkəmlənməsində, xalqın sosial-rifah halının yaxşılaşdırılmasında və dövlətimizin gələcək strategiyasının müəyyənləşdirilməsində rolu ilə bağlı ziyalılarımız bildirdilər ki, 14 iyul 1969-cu il Azərbaycan xalqının Heydər Əliyev müdrikliyinin işığında birləşdiyi əlamətdar gündür.

Məzahir Bayramov: "14 iyul 1969-cu il Azərbaycan xalqının Heydər Əliyev müdrikliyinin işığında birləşdiyi əlamətdar gündür

YAP Tovuz rayon təşkilatının sədri Məzahir Bayramov ulu öndər Heydər Əliyevin 41 il bundan əvvəl Azərbaycana rəhbər seçilməsi hərtərəfli inkişafa zəmin yaratdığını söylədi:

- 1969-cu il 14 iyul. Bu tarix xalqımızın yaddaşında ən yaddaqalan, mübarizə və islahatların, yüksəliş və tərəqqinin əsası qoyulduğu gün kimi yaşayır. Məhz 1969-cu il iyulun 14-ü Azərbaycanın bütün tarixi boyunca ən böyük ictimai-siyasi xadim, görkəmli dövlət başçısı, ümummilli liderimiz Heydər Əliyev Azərbaycanın rəhbəri vəzifəsinə gəldi. Xalqın ən ağır günündə rəhbər seçilən Heydər Əliyev ölkəmizdə hər şeyi yeniləşdirmək, saflaşdırmaq, dirçəltmək, inkişaf etdirmək uğurunda fəaliyyətə, mübarizəyə başladı. Həmin tarixdən 41 il keçməsinə baxmayaraq, xalqımız ulu öndərimizin uzaqgörən, elmi-iqtisadi cəhətdən əsaslandırılmış siyasətinin bəhrəsini görür, bu məktəbin layiqli davamçısı, ölkə Prezidenti İlham Əliyevin şəxsində Azərbaycanın firavan gələcəyinə zəmin yaradan siyasəti dəstəkləyir. Həmin dövrdən bəri nəsillər dəyişsə də, ulu öndərimizin qoyduğu siyasi-iqtisadi və ideoloji kurs xalqın bütün təbəqələri tərəfindən dəstəklənir. Çünki Azərbaycan xalqının taleyində 14 iyul 1969-cu il şərəfli, tarixi bir gündür. 41 il öncə bu hadisənin şahidi olanlar Azərbaycanın yeni tarixində hansı epoxanın başlandığının fərqində deyildilər. Bu da təbii idi. Azərbaycanın gələcəyi və fundamental inkişafı üçün tarixi önəm kəsb edən Heydər Əliyev epoxası yenicə başlayırdı. Bu epoxanın mahiyyətini və Azərbaycanın inkişaf tarixindəki yerini təsəvvür etmək üçün onu yaşamaq, bu dövrün Azərbaycanın siyasi, sosial-iqtisadi, milli-vətənpərvərlik həyatındakı önəmini dərk etmək lazım idi. Bu da faktdır ki, hər şeyin gerçək dəyər və əhəmiyyəti müqayisədə aşkarlanır. Bu gün birmənalı şəkildə qeyd etmək olar ki, ümummilli liderimiz Heydər Əliyevin Azərbaycana rəhbərlik etdiyi dövr bütün parametrlərinə, statistik və qeyri-göstəricilərinə, nəhayət, Azərbaycan xalqının canlı yaddaşındakı yerinə görə bütün müqayisələrdən yüksəkdir.

41 il öncə başlanan yol ulu öndərimiz Heydər Əliyevin xalqı, milləti ilə bütünləşməsi, bütövləşməsi yolu olub. Bu illərin heç birində O, xalqından ayrı, kənarda olmayıb. Və ən əsası odur ki, xalq, millət bu illər ərzində heç vaxt özünü ümummilli liderimiz Heydər Əliyevdən, Onun böyük və müdrik rəhbər dühasından ayrı görməyib. Məhz bu səbəbdəndir ki, Azərbaycan xalqı bu illərdə özünü tənha, arxasız və güvənsiz hiss etməyib. Bütün hallarda Azərbaycan xalqı üz tutacağı, müdrikliyinə istinad edib köməyə çağıracağı rəhbəri görüb və Ona güvənib.

Təsadüfi deyil ki, başabəla liderlərin, bivec hakimiyyətlərin "idarəçiliyinə" altı il tab gətirən Azərbaycan xalqı 1993-cü ilin yayında müstəqil dövlətçiliyimiz, milli gələcəyimiz uçurumun kənarında dayananda, Azərbaycanı vətəndaş qarşıdurması, zülmət və parçalanma gözləyəndə yenə öz gerçək liderinə - ümummilli liderimiz Heydər Əliyevin müdrikliyinə üz tutdu. Bu, xalqın liderinin xalqın çağırışına səs verib, Onun hüzuruna qayıdışı idi. Bu, eyni zamanda, xalqın artıq qəribsədiyi güvənli, təhlükəsiz və arxayın həyata qayıdışı, sabaha inam və etimadının bərpası idi...

Məlumdur ki, tarix şəxsiyyəti yaradır. Ulu öndərimiz Heydər Əliyevin ömrü elə yaşadığımız Azərbaycanın tarixidir. O, Allahın qüdrəti və verdiyi ömür sayəsində bu dövlətin uğurları, bu xalqının sabahı naminə hələ çox iş görmək əzmindədir. Ümummilli liderimiz Heydər Əliyev zirvəsindən Azərbaycanın dünəni və bugünü ilə yanaşı, gələcəyi, rifahlı sabahı da aydın görünür.

Möhübbət Bədəlov: "Ümummilli liderimiz Heydər Əliyev siyasəti Azərbaycanın bugününün və gələcəyinin təminatıdır"

YAP Naftalan rayon təşkilatının sədri Möhübbət Bədəlov ümummilli liderimiz Heydər Əliyev siyasətinin Azərbaycanın bugününün və gələcəyinin təminatı olduğunu vurğuladı:

- Azərbaycan 1969-cu ildə ulu öndər Heydər Əliyev hakimiyyətə gələndə keçmiş ittifaqın ən geridə qalmış respublikası idi. 1971-ci ildə Azərbaycan inkişafın tempinə və sürətinə görə keçmiş sovetlər birliyində ən qabaqcıl respublikaya çevrildi. Çox qısa zamanda ölkənin mənəvi-psixoloji iqlimini, insanların ölkəyə və rəhbərliyə münasbətini dəyişmədən bu kimi yenilikləri əldə etmək mümkün olmazdı. Ulu öndər Heydər Əliyevin 41 il bundan əvvəl Azərbaycana rəhbər seçilməsi hərtərəfli inkişafına zəmin yaratdı. Həmişə zaman böyük tarixi şəxsiyyətlərə ehtiyac duyub. Azərbaycanın ulu öndər Heydər Əliyevə ehtiyacı olanda ümummilli lider o tələbə uyğun olaraq tarixi çağırışa cavab verərək, hakimiyyiətə gəldi. Ulu öndər Heydər Əliyevin hakimiyyətinin hər iki dövründə xalqın bu ehtiyacı özünü qabarıq şəkildə büruzə verib. Hələ ümummilli liderin hakimiyyətinin birinci dövründə görülən işlərin ondan sonra baş verəcək dəyişikliklər üçün nə dərəcədə zərurət olduğu aydın idi. Azərbaycan 1990-cı illərin əvvllərində fəlakət astanasında olanda yenə də xalqın çağırışına səs verən ulu öndər Heydər Əliyev tarixi missiyasını yerinə yetirmiş oldu. 1969-cu ildə əsası qoyulan yol, konsepsiya, müəyyənləşdirilən siyasət Azərbaycana xidmət edir. Ötən bu dövrdə dünya da dəyişib. Sovetlər birliyi dağılıb, tamamilə başqa bir cəmiyyət qurulub. Bu cəmiyyətə uyğun olaraq Azərbaycan sürətlə inkişaf edir. Azərbaycanın yüksəlişində, inkişafında ifadə olunan Heydər Əliyev siyasətinin əsas xətti qalmaqdadır. 41 il ərzində bu siyasət yürüdülüb, Azərbaycana xeyir gətirib. Ölkəmizdə bu gün ümummilli liderimiz Heydər Əliyev siyasəti uğurla davam etdirilir.

Bu 41 ildə Azərbaycan keçmiş sovetlər birliyinin ən dinamik inkişaf edən respublikası imicini qazandı. Bu gün isə məmnunluq hissi ilə qeyd etmək lazımdır ki, ulu öndərimiz Heydər Əliyevin yaratdığı müasir, müstəqil Azərbaycan dövləti bütün dünyada ən dinamik iqtisadiyyatı olan, böyük sürətlə inkişaf edən dövlət adını qazanıb. Bu, onu göstərir ki, Heydər Əliyevin müəyyənləşdirdiyi yol bütün ideoloji çərçivələrdə əhmiyyətli dəyişikliklərin baş verməsinə baxmayaraq xalqa və dövlətə xidmət edir.

Ümummilli liderimiz Heydər Əliyev şəxsiyyəti vasitəsilə Azərbaycan xalqı özünün tarixini, mədəniyyətini, layiq olduğu yeri bir daha cəmiyyətə göstərə bildi. Onun fəaliyyətində, ilk növbədə, azərbayacançılıq çox qabarıq surətdə özünü göstərməyə başladı. Doğrudur, dövr bir çox məhdudiyyətlərlə bağlı idi. Açıq şəkildə bir çox məsələləri demək olmurdu. Ancaq bununla belə, ümummilli liderimiz Heydər Əliyev həmin məhdudiyyətlər içərisində azərbaycançılığı gücləndirə bildi. İmkanlardan istifadə edərək, Azərbaycanda iqtisadiyyatın, kənd təsərrüfatının inkişafına güclü təkan verirdi. Qısa bir müddətdə ölkəmiz aqrar sənaye böləgəsindən sənaye aqrar bölgəsinə çevrildi. Bu illər ərzində Azərbaycanda 250 yeni müəssisə tikildi. Hər müəssisədə 300-500 nəfər işlə təmin edildi. Kənd təsərrüfatı mexanikləşdirildi. Ən yeni texnikalar gətirildi. Kənd yerlərində əhalinin güzəranı yüksəlməyə başladı. Elmin və mədəniyyətin inkişafına çox böyük diqqət yetirildi. Ümummilli liderimiz Heydər Əliyevin dövründə bir neçə ali məktəb açıldı. Mövcud ali məktəblərin maddi-texniki bazası və onun potenisialı möhkəmləndi. Onun apardığı məqsədyönlü siyasət nəticəsində gənclərimiz ölkəmizdən kənardakı ali məktəblərdə təhsil almağa başladılar. İlk Azərbaycan diasporunun əsası, məhz həmin dövrlərdə qoyuldu.

Ümummilli liderimizin həyatı bunu tam deməyə əsas verir ki, Heydər Əliyev deyəndə Azərbaycan, Azərbaycan deyəndə Heydər Əliyev başa düşək.

RƏFİQƏ KAMALQIZI

Səs.- 2010.- 10 iyul.- S. 3.