Azərbaycanın müstəqillik tarixinin əsası 1969-cu ildən qoyulub

Mübariz Qurbanlı: " Azərbaycan dövlətçiliyinin söykəndiyi təməl prinsipləri Heydər Əliyev tərəfindən qoyulub"

- Mübariz müəllim, ulu öndər Heydər Əliyevin Azərbaycana rəhbərliyə gəlməsindən 41 il ötür. Bu 41 il Azərbaycanın ictimai-siyasi, mədəni, elmi və digər sahələrinin inkişafında hansı önəmli təsirlərlə əlamətdar oldu?

- Ulu öndər Heydər Əliyevin Azərbaycanda siyasi hakimiyyətə gəlişinin 41-ci ildönümünü qeyd edirik. Ulu öndərin 1969-cu il 14 iyulda Azərbaycanda rəhbərliyə gəlməsi Azərbaycanın ən yeni tarixinin dönüş mərhələsinin başlanğıcı idi. Həmin dövrdə Heydər Əliyevin siyasi rəhbərliyə gəlişinin əhəmiyyəti, Azərbaycanın sonrakı mərhələdə əldə etdiyi uğurları öncə ulu öndər Heydər Əliyevin Azərbaycana rəhbərliyə gəlişinə qədərki vəziyyətə nəzər salmaq lazımdır. Hər bir hadisədə nailiyyəti, mənanı anlamaq üçün mütləq müqayisə aparmaq lazımdır. Heydər Əliyev və müstəqil Azərbaycan. Bunlar biri-birinə bağlı olan məsələlərdir. Biz Heydər Əliyevin siyasətindən danışanda müstəqil Azərbaycanın quruculuğunu aydın şəkildə görürük. Müstəqil Azərbaycanın Konstitusiyası Heydər Əliyevin şah əsəri olaraq Azərbaycan dövlətinin iqtisadi-siyasi əsaslarının müəyyənləşdiricisidir. Azərbaycan dövlətçiliyinin söykəndiyi təməl prinsipləri Heydər Əliyev tərəfindən yaradılıbdır.

1969-cı ildə ulu öndər Heydər Əliyevin Azərbaycanda siyasi hakimiyyətə gəldiyi dövrdə həm SSRİ-i məkanında, həm Azərbaycanda sosial,iqtisadi, siyasi, mədəni və ictimai həyata nəzər salsaq, Azərbaycanın o dövrdə bir respublika kimi SSRİ-nin müttəfiq bir respublikası kimi iqtisadi baxımdan ittifaq miqyasında digər respublikalardan geri qaldığını görərik. İstər kənd təsərrüfatının istehsalı, istər sənaye məhsulu istehsalı baxımından müqayisəli şəkildə baxdıqda, Azərbaycanın inkişaf etmədiyini görürük. Azərbaycanın iqtisadi baxımdan inkişafdan geridə qalması müşahidə olunurdu. Ulu öndər Heydər Əliyevin hakimiyyətə gəlişi ilə Azərbaycan qısa zaman kəsiyində ittifaq miqyasında iqtisadi baxımdan özünü təmin etməyə qadir olan respublikalar sırasına daxil oldu. SSRİ dağılmaq ərəfəsində bir neçə müttəfiq respublika iqtisadi baxımdan özünü təmin edə bilərdi. Bunlardan biri Rusiya Federasiyası, Ukrayna, digəri isə Azərbaycan idi. Qalan respublikalar ittifaq büdcəsi hesabına yaşayırdılar,ittifaq büdcəsindən əlavə vəsaitlər alırdılar, halbuki Azərbaycan özü-özünü maliyyələşdirmək imkanına malik idi. Bütün bunlar da ulu öndər Heydər Əliyevin hakimiyyətinin birinci dövründə yaradılmış iqtisadi potensial sonrakı mərhələlərdə müstəqillik illərində Azərbaycan üçün çox əhəmiyyətli bir rol oynadı. Ulu öndər Heydər Əliyev Azərbaycanda siyasi hakimiyyətdə olduğu birinci dövrdə gələcək müstəqil Azərbaycanın iqtisadi, sosial, mənəvi və psixoloji bazasını yaratdı. Hakimiyyəti illərində ulu öndər Heydər Əliyevin həyata keçirdiyi daxili siyasət sayəsində Azərbacanda milli özünüdərk, milli özünəqayıdış,milli vətənpərvərliyin gücləndirilməsi baxımından əhəmiyyətli addımlar atıldı. Milli şüurun inkişafı, milli tarixin öyrənilməsi, milli kadrların yetişdirilməsi, o cümlədən, Azərbaycanda milli ruhun yüksəldilməsi istiqamətində keçirilmiş bir çox tədbirlər sonrakı dövrdə, bizim üçün, millətimiz üçün, dövlətimiz üçün çox ciddi rol oynadı. Ulu önədər Heydər Əliyevin gələcək müstəqil dövlətin köklü, fundamental əsaslarını hakimiyyətinin ilk dövründə yarada bilmişdi. Ulu öndər Heydər Əliyevin hakimiyyəti ilə bağlı çox əhəmiyyətli tədqiqat işləri, fundamental kitablar yazılıbdır. Ulu öndər Heydər Əliyevin hakimiyyət illəri Azərbaycanın dönüş, dirçəliş dövrü idi. Ulu öndər Heydər Əliyevin yaratdığı həmin əsaslar 1988-ci ildə Azərbaycana qarşı Ermənistanın ərazi iddialarının yenidən baş qaldırdığı bir vaxtda özünü xalqın ayağa qalxmasında büruzə verdi. Ümummilli lider Heydər Əliyevin yetişdirdiyi milli kadrlar müstəqil Azərbaycanın yaradılmasında rol oynamaqla ərazi bütövlüyünün qorunmasında ciddi iş apardılar. Dahi rəhbərimizin başladığı siyasət milli ordunun quruculuğu istiqamətində, iqtisadi-sosial həyatda atılan addımlar bizim üçün çox əhəmiyyətli bir rol oynamaqdadır. Ümummilli lider Heydər Əliyev böyük bir yolun başlanğıcını qoyubdur. 1993-1998, 1998-2003 -cü illərdə Azərbaycanın rəhbəri olduğu dövrdə başladığı müstəqil Azərbaycanın quruculuğu işlərini davamlı olaraq həyata keçirmişdir və müstəqil dövlətin quruducusu, yaradıcısı kimi Azrbaycan tarixində ümummilli lider səviyyəsində özünə yer tutmuşdur. Ulu öndər Heydər Əliyevin yaratdığı müstəqil Azərbaycan dövləti 1969-cu ildə başladığı siyasətin məntiqi davamıdır. Bu yol güclü, qüdrətli, zəngin, lider yolu deməkdir. Bu yol bütün dünya azərbaycanlıların azərbaycançılıq ideologiyası ətrafında birləşdirilməsi deməkdir. 41 il bundan əvvəl başlanan yol bundan sonra Azərbaycan üçün aparıcı yol olacaq və Azərbaycan xalqı daimi ulu öndər Heydər Əliyev yolu ilə gedəcəkdir.

- Ulu öndər Heydər Əliyevin varislik prinsipi nə dərəcədə qorunub saxlanılır və inkişaf etdirilir?

- Ümummilli lider Heydər Əliyev Azərbaycan dövlətçiliyinin fundamental prinsipini yaradıbdır. Hər bir dövlət müəyyən ideoloji, siyasi prinsiplərə söykənir. Ulu öndərimiz Azərbaycan dövlətçiliyi, Azərbaycanın inkişafı üçün altı mühüm prinsip müəyyənləşdirib. Bu prinsiplər içərisində başlıca prinsip azərbaycançılıqdır. Azərbaycançılıq, eyni zamanda, sosial ədaləti, qanunçuluğu və digər başqa prinsipləri də özündə birləşdirərək, ölkəmiz üçün əsaslı rol oynayır. Varislik prinsipi Azərbaycan siyasətində çox əhəmiyyətli yer tutur və cənab Prezident İlham Əliyev tərəfindən uğurla davam etdirilir. Azərbaycan dövlətinin söykəndiyi varislik prinsipi dövlət idarə modeli, iqtisadi model. Eyni zamanda, əldə etdiyimiz uğurların növbəti mərhələdə daha da inkişaf etdirilməsi ilə ölkəmizin irəliyə aparılmasına xidmət edir. Varislik ictimai, iqtisadi, siyasi, sosial, ideoloji baxımdan ölkənin inkişaf etdirilməsi deməkdir. Ulu öndər Heydər Əliyevin siyasi varisi cənab Prezident İlham Əliyev ölkəmizin sürətli inkişafı üçün çox ciddi addımlar atır. Cənab Prezident Azərbaycanın iqtisadi inkişaf modelini daha yüksək səviyyəyə qaldırmışdır. Bu gün dünyanı bürüyən qlobal iqtisadi böhran şəraitində Azərbaycanın əldə etdiyi uğur, inkişaf göz önündədir. Cənab Prezident Zaqatalada əhali ilə görüşərkən ölkəmizin iqtisadi inkişafının dinamik xarakter aldığını bildirdi. Bu iqtisadi uğurların sizləri, bütün Azərbaycan xalqının yaşayış durumunu daha da yaxşılaşmasına yardımçı olduğunu qeyd etdi. Azərbaycanın inkişafının əsasında dayanan fundamental prinsiplər sırasında varisliyin daha yüksək səviyyədə qorunduğunu və inkişaf etdiyini Prezident İlham Əliyevin həyata keçirdiyi daxili, xarici siyasətdə qabarıq şəkildə görürük. Bu gün ulu öndər Heydər Əliyev siyasəti cənab Prezidentimiz İlham Əliyev tərəfindən uğurla davam etdirilir və Qurtuluşdan böyük qələbəyə doğru getməkdəyik.

- YAP-ın parlament seçkilərində hər hansı bir partiyayla blok şəklində iştirak etməsi nə dərəcədə mümkündür?

- YAP 1993-cü ildən seçkilərdə fəal iştirak edir. YAP yarandığı vaxtdan prezident, parlament, bələdiyyə seçkilərinə qatılıb və ciddi uğurlar qazanıbdır. Bunun da kökündə ümummilli lider Heydər Əliyevin müəyyən etdiyi uğurlu siyasət dayanıbdır. YAP Azərbaycanda aparıcı partiyadır. YAP həmişə seçkilərə fərdi qaydada qatılıb və uğurlar qazanıbdır.

- YAP həm də Siyasi Partiyaların Məşvərət Məclisində təmsil olunur. Bu blokun parlament seçkilərində iştirakı hansı formada nəzərdə tutulur?

- Siyasi Partiyaların Məşvərət Məclisi bir sıra məsələlərə münasibət bildirmək üçün toplantılar keçirmək məqsədi daşıyan funksiyanı yerinə yetirib. Məşvərət Məclisi seçki bloku deyildir. Məşvərət Məclisinə daxil olan partiyanın hər biri fərdi qaydada seçkilərə qatılır. Biz seçki kampaniyasını fərdi qaydada keçiririk.

- YAP-ın cəmiyyətdə nüfuzu hansı mənbədən qaynaqlanır?

- YAP Azərbaycan dövlətinin çox nüfuzlu partiyasıdır. Cənab Prezidentimiz İlham Əliyevin qeyd etdiyi kimi, regionda lider partiyadır və ən güclü siyasi təşkilatdır. YAP-ın ən böyük gücü ulu öndər Heydər Əliyev ideyalarına söykənməsidir. YAP öz sıralarında Azərbaycan cəmiyyətinin say tərkibinə görə, coğrafi ərazi baxımından respublikamızda təşkilatlanmasına görə, intellektual potensiala malik kadrları öz ətrafında toplamasına görə digər partiyalardan həm kəmiyyət, həm keyfiyyət baxımından çox güclü partiyadır. Ulu öndər Heydər Əliyev ideyalarının tərənnümçüsü olan bu güclü siyasi təşkilat Azərbaycan xalqının istək və arzularının yeganə təminatçısıdır. Bu gün Azərbaycan cəmiyyəti inkişafın ən yüksək mərhələsindədir. Ölkəmizin əldə etmiş olduğu iqtisadi-siyasi potensial imkan verir ki, istənilən məsələdə ən yüksək səviyyəli nəticə əldə edilsin.

Aylana Rzayeva

Səs.- 2010.- 13 iyul.- S. 4.