Azərbaycan mətbuatı inkişaf etməkdədir

Bildiyiniz kimi, milli mətbuatın 135 illiyi ilə əlaqədar olaraq, tədbirlər keçirilir. Bu tədbirlərdə, redaksiya olaraq, siz necə iştirak edirsiniz? Azərbaycan mətbuatının hazırkı durumunu necə qiymətləndirirsiniz? Jurnalistlərin sosial qayğılarının həlli istiqamətində görülən işlər barəsində nə deyə bilərsiniz? Bu suallarla bağlı qəzet baş redaktorlarına müraciət etdik.

- Bildiyiniz kimi, cənab Prezidentin Milli Mətbuatın 135 illiyi ilə bağlı Sərəncamı var. Həmin Sərəncamda qeyd olunub ki, mətbuatımızın 135 illiyi dövlət səviyyəsində keçirilsin. Təbii ki, bizim redaksiyanın kollektivi də böyük məmnuniyyətlə sözügedən tədbirlərə qoşulacaq.

Azərbaycan mətbuatının hazırkı durumunu müzakirə etmək çox çətindir. Ona görə ki, beş il bundan qabaqkı mətbuatın durumu ilə indiki durum arasında tamamilə köklü fərqlər var. Yəni, 5-10 il bundan qabaq ölkə mətbuatında "reketçiliklə" məşğul olan jurnalistlərin sayı çox idisə, Mətbuat Şurasının xətti ilə demək olar ki, artıq "reket" qəzetlərinin tamamilə 70-80 fazinin sıxışdırılması prosesi gedir. Bir sözlə, mətbuatımızda durulma gedir. Yəni, Azərbaycan mətbuatında mətbuata xidmət edəcək qəzetlərin və agentliklərin sayı daha da artır. Düzdür, mətbuatımızda problemlər var. Fikrimcə, sözügedən problemlərdə Prezidentin Sərəncamı, MŞ-nin xətti ilə zaman-zaman həll edilərək, aradan qaldırılır.

Fikrimcə, sosial qayğılarının həlli məsələsi ətrafında danışmaq tezdir. Sözügedən sosial qayğılarla bağlı olaraq kompleks tədbirlər olmalıdır. Yəni, hansısa jurnalistlərin yaxşı hal olmasına baxmayaraq, fond tərəfindən 500-1000 manat və yaxud da ki, fond və Mətbuat Şurası ilə birlikdə hansısa nazirlik tərəfindən mükafatlandırılması sosial problemlərin həll olunması deyil. Burada sosial problemlər, jurnalistlərin mənzil problemindən tutmuş ailə qayğısı və onların digər problemləri haqqında olan məsələlər var ki, gələcəkdə onlar da həll olunacaq. Bir sözlə, deyə bilərəm ki, jurnalistlərimizin maddi durumu bir o qədər yüksək olmasa da, amma irələyişlər də var.

- İlk öncə, qarşıdan gələn, Milli Mətbuat Günü ilə əlaqədar bütün mətbuat nümayəndələrini təbrik edirəm. Bizim redaksiya da mətbuatımızın ildönümü ilə əlaqədar olaraq, keçirilən tədbirlərdə iştirak edəcəyik. Təbii ki, milli mətbuatımızın 135 illiyinin dövlət səviyyəsində qeyd olunması cənab Prezident İlham Əliyevin mətbuatımıza göstərdiyi qayğının bir formasıdır. Ümumiyyətlə, Azərbaycanda milli mətbuatın inkişafı üçün ulu öndər Heydər Əliyevin dövründən daim qayğı və diqqət göstərilir. Sözügedən siyasi kurs Prezident İlham Əliyevin hakimiyyəti dövründə də davam edir. Bu qayğıdan "Azad Azərbaycan" qəzeti olaraq, biz də daima bəhrələnmişik. Fikrimcə, KİV-lərin İnkişafına Dövlət Dəstəyi Fondunun yaradılması ölkə mətbuatının inkişafına yönəldilmiş addım idi.

Ölkə mətbuatının daha yaxşı inkişaf etməsi üçün dövlət tərəfindən nə lazımdırsa edilir. Bəs gəlin görək, biz mətbuatımızın inkişafı üçün, bir mətbuat işçisi olaraq nə edirik? Mən deyərdim ki, çox cüzi işlər görürük. Bir sözlə, biz bu gün mətbuatın inkişafından danışırıqsa, burada olan bəzi problemləri özümüz həll etməyə çalışmalıyıq.

Bildiyiniz kimi, jurnalistlərin problemləri çoxdur. Bir sözlə, jurnalistikada olan insanların 90-95 faizini araşdırsaq, onların sosial problemlərinin ağırlığı, öndədir. İlk öncə, jurnalistlərin mənzil şəraiti ilə əlaqədar olaraq, problemləri var. Yəni, sözügedən problemlərin aradan qaldırılması hesab edirəm ki, mətbuata konkret şəkildə diqqət və hansısa maliyyə imkanlarının verilməsi ilə qaynaqlanmır. Bildiyiniz kimi, bu istiqamətdə bütün mətbu orqanlar və KİV-lər reklamlarla inkişaf edir. Reklam onların, ilk növbədə, qazancıdır. Mən deyərdim ki, bu gün Azərbaycan mətbuatında televiziyaların 99 faizi reklam bazarını alıb. Demək olar ki, yalnız reklamların 1 faizi qəzetlərdə təşkil olunur. Fikrimcə, qəzetlərin və jurnalistlərin sosial vəziyyətinin yaxşılaşdırılması üçün qəzetlərin maliyyə imkanlarını artırmaq vacibdir. Bu da, ilk növbədə, reklam bazarına qəzetlərin proqramlı şəkildə salınması, yəni qəzetləri də bu reklam bazarına cəlb etmək daha vacibdir. Bu istiqamətdə jurnalistin sosial həyat şəraitinin yaxşılaşdırılması üçün müəyyən işlər görülə bilər. Bir sözlə, jurnalistlərin sosial problemlərinin həll olunması istiqamətində, ümidvaram ki, dövlət öz köməkliyini göstərəcək.

Gülyanə

Səs.- 2010.- 15 iyul.- S. 10.