Müstəqil mətbuatın formalaşması ulu öndər Heydər Əliyevin adı idə bağlıdır

Milli mətbuatın 135 illik yubileyi ilə bağlı Nizami rayon icra hakimiyyətində tədbir keçirildi

Dünən Nizami rayon icra hakimiyyətinin inzibati binasında Azərbaycan milli mətbuatının 135 illik yubileyi ilə bağlı mətbuat və rayon ictimaiyyətinin nümayəndələrinin iştirakı ilə tədbir keçirildi. Tədbirdə giriş sözü ilə çıxış edən Nizami rayon icra hakimiyyətinin başçısı Tahir Budaqov 1875-ci il iyulun 22-də böyük mütəfəkkir Həsən bəy Zərdabi tərəfindən "Əkinçi" qəzetinin çap edilməsi ilə Azərbaycanda ilk mətbuatın əsasının qoyulduğunu bildirdi.

Qeyd etdi ki, H.Zərdabi o dövrdə bütün çətinliklərə və maneələrə baxmayaraq, nəhayət, özünün böyük ideyalarını ifadə edən "Əkinçi" qəzetinin çap olunmasına nail oldu. Azərbaycan mətbuat tarixinin ən şanlı səhifəsinin əsasının qoyulduğunu diqqətə çatdıran T.Budaqov mətbuatın tarixindən, keçdiyi şərəfli yoldan, bugünkü inkişafından və perspektivlərindən bəhs etdi. Milli mətbuatımızın inkişafının məhz ulu öndər Heydər Əliyevin birbaşa adı ilə bağlı olduğunu söyləyən icra başçısı möhtərəm cənab Prezident İlham Əliyevin diqqət və qayğısı ilə Azərbaycan mətbuatının daha böyük uğurlara imza atdığını bildirdi.

KİV-in İnkişafına Dövlət Dəstəyi Fondunun icraçı direktoru, Mətbuat Şurasının idarə heyətinin üzvü Vüqar Səfərli də çıxışında artıq bir aydan çoxdur ki, ölkəmizin bir sıra bölgələrində milli mətbuatın 135 illiyi ilə bağlı bir sıra tədbirlərin keçirildiyini bildirdi. V.Səfərli əsası H.Zərdabi tərəfindən qoyulan Azərbaycan milli mətbuatının böyük bir şərəfli yol keçdiyini və bu illər ərzində bir çox çətinliklərlə, ağır sınaqlarla üzləşdiyini vurğuladı. "Azərbaycan milli mətbuatının tarixinə nəzər salarkən, onun inkişaf və keçdiyi yolu dörd hissəyə bölmək olar. Birincisi, Azərbaycan Xalq Cümhuriyyətinin yaranmasına qədər mövcud olan mətbuat, ikincisi, cümhuriyyət dövrü mətbuatı, üçüncüsü, sovet dövründə fəaliyyət göstərən mətbuat, dördüncüsü isə, müstəqillik dövründə fəaliyyət göstərən mətbuatı nümunə göstərmək olar. Mətbuatın keçmiş olduğu yola nəzər salarkən, açıq-aydın görünür ki, ölkədə azad sözün və müstəqil mətbuatın inkişafı və tərəqqisi ulu öndər Heydər Əliyevin adı ilə bağlıdır. Məhz ümummilli liderimiz Heydər Əliyev ikinci dəfə siyasi hakimiyyətə qayıtdıqdan sonra Azərbaycanda hər bir sahənin inkişafında olduğu kimi, mətbuatın da inkişafı daim diqqət mərkəzində saxlanılmışdır" - deyən V.Səfərli bu gün möhtərəm Prezidentimiz İlham Əliyevin rəhbərliyi ilə ölkəmizin hər bir sahəsində yüksək inkişafın olması mətbuatın da tərəqqisinə və böyük mənada sıçrayışına səbəb olduğunu bildirdi. O, qeyd etdi ki, cənab Prezident İlham Əliyevin Sərəncamı ilə 135 illiyi qeyd olunan Azərbaycan mətbuatı bu gün özünün maddi-texniki və digər zəruri ehtiyaclarını təmin etməkdədir.

YAP Siyasi Şurasının üzvü, "İki Sahil" qəzetinin baş redaktoru Vüqar Rəhimzadə Azərbaycan milli mətbuatının yaradılmasının 135 illiyi ilə bağlı keçirilən tədbirlərin hər birinin böyük əhəmiyyət kəsb etdiyini qeyd etdi. Bildirdi ki, Azərbaycan milli mətbuatı yarandığı gündən böyük çətinliklər və maneələrlə qarşılaşmasına baxmayaraq, bu gün özünün müstəqil fəaliyyəti ilə diqqət mərkəzindədir. Mətbuatın inkişafının ümummilli lider Heydər Əliyevin diqqət və qayğısı ilə daha da sürətləndiyini qeyd edən V.Rəhimzadə ölkəmizdə söz və mətbuat azadlığının tam təmin olunduğunu tədbir iştirakçılarının diqqətinə çatdırdı. "1990-cı illərin əvvəllərində Azərbaycan mətbuatı böyük çətinliklərlə, sərt maneələrlə üzləşmişdir. Ölkədə söz və mətbuat azadlığının təmin edilməsi üçün heç bir baza, hüquqi prinsip mövcud deyildi. Məhz belə bir şəraitdə mətbuatın faəliyyət göstərməsi də böyük sual altında idi. 1993-cü ildə xalqın təkidli tələbi ilə ikinci dəfə siyasi hakimiyyətə qayıdan Azərbaycan xalqının ümummilli lideri Heydər Əliyev hər bir sahənin inkişafı ilə yanaşı, mətbuatın da tərəqqisinə, yüksəlişinə xüsusi diqqət göstərirdi. Məhz bunun bariz nümunəsi olaraq, mətbuat nümayəndələrinə və qəzet redaksiyalarına yardımların edilməsi, redaksiyaların "Azərbaycan" Nəşriyyatına olan borclarının donduralaraq, sonradan ləğv edilməsi ölkədə azad sözə, mətbuatın inkişafına verilən böyük qiymət idi. Ulu öndər Heydər Əliyevin ən layiqli davamçısı olan möhtərəm Prezidentimiz İlham Əliyev də bu missiyanı böyük həvəslə davam etdirərək, ölkədə mətbuatın sərbəst, maneəsiz formada inkişafı üçün ən zəruri addımları atdı" - deyən V.Rəhimzadə mətbuatın inkişafına dair fondun yaradılması və qəzet redaksiyalarına kütləvi informasiya agentliklərinə birdəfəlik yardımların edilməsinin mətbuat nümayəndələri tərəfindən böyük ruh yüksəkliyi ilə qarşılandığını bildirdi.

"Səs" qəzetinin baş redaktoru Bəhruz Quliyev də mətbuatın 135 illiyinə həsr olunmuş tədbirin keçirilməsinin yüksək əhəmiyyət kəsb etdiyini bildirdi. Qeyd etdi ki, 1875-ci ildə Həsən bəy Zərdabinin "Əkinçi" qəzeti ilə əsası qoyulan Azərbaycan milli mətbuatı bu gün 135 illik tarixi bir yol keçərək, öz inkişafının mühüm bir mərhələsinə qədəm qoyub. Ölkəmizdə söz və mətbuat azadlığının birmənalı şəkildə tam təmin olunduğunu qeyd edən B.Quliyev bu gün mətbuatın müstəqil formada özünü təsdiq etdiyini diqqətə çatdırdı. "Azərbaycan milli mətbuatı 135 illik tarixi yol keçməsinə və bir sıra böyük maneələrlə üzləşməsinə baxmayaraq, onun ən yüksək inkişaf mərhələsi məhz 1993-cü il ulu öndər Heydər Əliyevin ikinci dəfə siyasi hakimiyyətə qayıdışından sonra başlamışdır. Çünki ümummilli lider Heydər Əliyev həmişə mətbuata, mətbuat işçilərinə xüsusi diqqət və qayğı ilə yanaşmışdır. Məhz bunun bariz nümunəsi olaraq, dəfələrlə ölkənin aparıcı mətbuat nümayəndələrinin ulu öndər Heydər Əliyev tərəfindən qəbul edilməsi, onların qarşısına çıxan problemlərin yoluna qoyulması bir daha onu təsdiqləyir ki, Azərbaycan dövləti mətbuatın inkişafında maraqlı olub. Dəfələrlə qəzetlərin "Azərbaycan" Nəşriyyatına olan borclarının dondurulması və sonradan ləğv edilməsi, redaksiyalara davamlı şəkildə yardımların edilməsi Azərbaycan mətbuatının bugünkü inkişafını və gələcək perspektivlərini müəyyənləşdirmiş olub. Ulu öndər Heydər Əliyevin ən layiqli davamçısı olan cənab Prezident İlham Əliyev tərəfindən də Azərbaycanda söz və mətbuat azadlığının ən yüksək səviyyədə təmin olunması üçün vacib addımlar atılıb. Azərbaycan jurnalistlərinin fəxri adlarla təltif edilməsi, mətbuatın inkişafına dair fondun yaradılması, fəxri jurnalist yazı müsabiqələrinin keçirilməsi, redaksiyaların maddi-texniki bazasının möhkəmləndirilməsi istiqamətində atılan addımlar onu göstərir ki, dövlətimiz ölkədə demokratik mətbuatın fəaliyyət göstərməsində və onun inkişafında çox maraqlıdır" - deyən B.Quliyev milli mətbuatın 135 illik yubileyi ilə əlaqədar olaraq bütün mətbuat işçilərinə, ölkə ictimaiyyətinə öz təbriklərini çatdırdı.

Tədbirin sonunda Nizami rayon icra hakimiyyətinin rəhbərliyi tərəfindən mətbuat nümayəndələrinə hədiyyələr təqdim edildi.

Tapdıq QURBANLI

Səs.- 2010.- 21 iyul.- S. 9.