Səbail rayonunda Azərbaycan Milli Mətbuatının 135 illik yubileyi qeyd olundu

Dünən Səbail rayon icra hakimiyyətində milli mətbuatımızın 135 illik yubileyinə həsr olunmuş tədbir keçirildi. Çoxsaylı mətbuat nümayəndələrinin iştirakı ilə keçən tədbiri giriş sözü ilə açan Səbail rayon icra hakimiyyətinin başçısı Asif Əsgərov bildirib ki, 135 illiyini qeyd etdiyimiz Azərbaycan milli mətbuatı böyük və şərəfli inkişaf yolu keçib, bütün dövrlərdə qabaqcıl ideyaların carçısı olub. Tarixə ekskurs edən icra başçısı A.Əsgərov onu da vurğuladı ki, mətbuatımız mütərəqqi ənənələri formalaşdıraraq cəmiyyət qarşısında üzərinə götürdüyü missiyanı layiqincə yerinə yetirib.

Səbail rayon icra başçısı söylədi ki, 1993-cü ildə xalqın təkidli tələbi ilə yenidən hakimiyyətə qayıdan ümummilli lider Heydər Əliyevin siyasi iradəsi nəticəsində plüralizm, söz və mətbuat azadlığını məhdudlaşdıran süni maneələr aradan qaldırılıb: "KİV-lərin fəaliyyətini tənzimləyən qanunvericilik bazası formalaşıb, onun maddi-texniki bazasının inkişafı istiqamətində addımlar atılıb. Ölkə Prezidentinin müvafiq Fərmanı ilə senzura ləğv edilib, qəzetlərin nəşriyyata olan borcları əvvəlcə dondurulub, sonradan birdəfəlik ləğv edilib".

A.Əsgərov onu da söylədi ki, əsası ulu öndər Heydər Əliyev tərəfindən qoyulmuş KİV-in maddi-texniki bazasının möhkəmləndirilməsi, jurnalistlərin sosial müdafiəsinin gücləndirilməsi xətti bu gün Prezident İlham Əliyev tərəfindən ardıcıl şəkildə davam etdirilir. Dövlətimizin başçısının dərindən düşünülmüş, müdrik siyasəti sayəsində dünyanın ən sürətlə inkişaf edən ölkəsinə çevrilən Azərbaycanda bu gün medianın inkişafı üçün də hər cür şəraitin yaradıldığı vurğulandı.

Tədbirdə Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli milli mətbuatımızın 135 il ərzində keçdiyi keşməkəşli və şərəfli yola nəzər salaraq, XX əsrin sonlarında müstəqilliyini bərpa etmiş Azərbaycanda ümummilli lider Heydər Əliyevin medianın inkişafına göstərdiyi böyük diqqət və qayğıdan danışdı. V.Səfərli onu da vurğuladı ki, Azərbaycan Milli Mətbuatının bünövrəsi 1875-ci il iyulun 22-də, Həsən bəy Zərdabi tərəfindən təsis edilmiş "Əkinçi" qəzetinin nəşrə başlaması ilə qoyulub: "Lakin onun ömrü çox olmayıb, iki illik fəaliyyəti dövründə qəzetin cəmi 56 nömrəsi çıxıb. Ancaq bu iki ildə qəzet ictimaiyyət arasında tanınıb və böyük nüfuz qazanıb. "Əkinçi" qəzeti maliyyə çətinliyi ucbatından nəşrini dayandırmasına baxmayaraq, onun ideyaları həmişə yaşayıb, səpdiyi toxumlar cücərib. Məhz o ideyalarla Azərbaycanda yeni-yeni nəşrlər yaranmağa başlayıb".

V.Səfərlinin sözlərinə görə, müstəqilliyini bərpa etdikdən sonra Azərbaycanda milli mətbuatın inkişafı və formalaşmasında ulu öndər Heydər Əliyevin əvəzsiz rolu olub: "Ümummilli lider mətbuatın problemlərini yaxından öyrənmək məqsədi ilə müntəzəm olaraq KİV rəhbərləri ilə görüşlər keçirib və problemlərin aradan qaldırılması üçün lazımi göstərişlər verib. Söz və fikir azadlığını təmin etmək məqsədi ilə 1998-ci ildə ulu öndər tərəfindən mətbuat üzərindən senzura götürülüb. "Azərbaycan" nəşriyyatına olan borclar müəyyən müddətə dondurulub və sonralar Prezident İlham Əliyev tərəfindən ləğv edilib".

V.Səfərli mətbuatımızın keçdiyi 135 illik yolu 4 mərhələyə ayıraraq hər bir mərhələnin özünəməxsus cəhətlərini təhlil etdi. Ulu öndər Heydər Əliyevin xalqın təkidli tələbindən sonra ikinci dəfə hakimiyyətə gəlməsi ilə milli mətbuatımızın dirçəldiyini, yeni nəfəs verildiyini bildirən icraçı direktor qeyd etdi ki, bu gün Azərbaycan mətbuatı özünün inkişaf dövrünü yaşayır. Milli mətbuatın inkişafına şərait yaratmaq üçün qəzet və jurnalların qeydiyyatının sadələşdirildiyini söyləyən V.Səfərli bunun nəticəsi kimi indi respublikamızda mətbu orqanların sayının 4200-ü keçdiyini qeyd etdi.

Tədbirdə çıxış edən "İki sahil" qəzetinin baş redaktoru Vüqar Rəhimzadə 135 yaşlı mətbuatımızın yubileyi münasibəti ilə toplantı iştirakçılarını təbrik etdi, onlara şərəfli peşələrində uğurlar arzuladı. Mətbuatımızın keçdiyi yolu təhlil edən baş redaktor V.Rəhimzadə ulu öndər Heydər Əliyevin bu sahəyə göstərdiyi diqqət və qayğısından, Onun layiqli davamçısı Prezident İlham Əliyevin hər sahədə olduğu kimi, mətbuat işçilərinə də diqqət və qayğısını əsirgəmədiyindən, jurnalistlərin sosial problemlərinin həll edilməsi istiqamətində attığı addımlardan, imzaladığı sərəncamlardan danışdı və dövlət başçısına bütün mətbuat nümayəndələri adından minnətdarlığını bildirdi: "Möhtərəm Prezident İlham Əliyevin Milli Mətbuatın 135 illik yubileyinin keçirilməsi ilə bağlı Sərəncamı ölkədə azad sözə, müstəqil media ənənələrinə diqqət və qayğının növbəti bariz nümunəsidir. Sərəncamda da göstərildiyi kimi, milli mətbuatımızın 135 il ərzində keçdiyi yola, tarixinə, müasirliyinə yeni bir baxış nümunəsi ortaya qoyulub. Bir mətbuat nümayəndəsi kimi, bütün bunlara görə, Prezident İlham Əliyevə öz dərin minnətdarlığımı bildirirəm. Sərəncamdan irəli gələn məsələlərin həllinə yönələn tədbirlərə artıq start verilib. Respublikamızın bir sıra bölgələrində yubiley tədbirləri təşkil olunub. Yevlax şəhərində və milli mətbuatımızın banisi Həsən bəy Zərdabinin yurdu Zərdab rayonunda ətraf rayonların nümayəndələrinin iştirakı ilə iki mühüm regional konfrans reallaşdırılıb".

Tədbirdə çıxış edən Səbail rayon icra hakimiyyətinin ictimai təşkilatlar və siyasi partiyalarla iş üzrə şöbəsinin müdiri İsrafil Kərimov rayonda aparılan geniş quruculuq və abadlıq işlərinin işıqlandırılmasında fəaliyyət göstərən mətbuat orqanları haqqında məlumat verdi.

Görüşdə digər çıxış edənlər milli mətbuatımızın zəngin və şərəfli yoluna nəzər saldılar və Azərbaycanın müstəqillik əldə etdikdən sonra mətbuat sahəsində böyük inkişaf yolu keçdiyini vurğuladılar.

Tədbirin sonunda müxtəlif KİV-ləri təmsil edən jurnalistlərə qiymətli hədiyyələr təqdim olundu. "Səs" qəzeti və SİA İnformasiya Agentliyinin əməkdaşları da mükafatçılar sırasında oldu.

RƏFİQƏ KAMALQIZI

Səs.- 2010.- 20 iyul.- S. 8.