Ölkəmizin iqtisadi göstəriciləri durmadan artmaqdadır

Nəsimi rayonunda sosial-iqtisadi yekunlar müzakirə olunub

Nazirlər Kabinetinin 2010-cu ilin birinci yarısının sosial-iqtisadi inkişafının yekunlarına həsr olunmuş iclasdan irəli gələn vəzifələr Nəsimi rayonunda şura iclasında müzkirə edilib. Nəsimi rayon icra hakimiyyətinin başçısı Nəsib Məhəməliyevin sədrliyi ilə keçirilən iclasda Azərbaycan dövlətinin çox uğurlu sosial-iqtisadi siyasət həyata keçirdiyini, yeni iş yerləri açıldığını və regionların yüksək inkişafının təmin olunduğu vurğulanıb. Regionların sosial-iqtisadi inkişafına dair Dövlət Proqramına uyğun olaraq, Azərbaycanın sosial-iqtisadi uğurlarının paytaxtla yanaşı, bütün bölgələrini əhatə etdiyini bildirən Nəsib Məhəməliyev əsası ulu öndər Heydər Əliyev tərəfindən qoyulmuş iqtisadi strategiyanın Prezident İlham Əliyev tərəfindən uğurla həyata keçirildiyini qeyd edib.

Nazirlər Kabinetinin 2010-cu ilin birinci yarısının sosial-iqtisadi inkişafının yekunlarına toxunan rayon rəhbəri Azərbaycanda 2009-cu ildə iqtisadi inkişaf baxımından çox yüksək göstəricilərin əldə olunduğunu bildirib: "2010-cu ildə davam edən iqtisadi inkişaf iqtisadiyyatımızın bütün sahələrini əhatə edir, Altı ayda iqtisadi inkişaf 3,7 faiz təşkil etmişdir. Azərbaycanda qeyri-neft sektorunun inkişafı istiqamətində atılan addımlar nəticəsində qeyri-neft sektorunun 15 faizdən çox artması Azərbaycan iqtisadiyyatının çoxşaxəli iqtisadiyyat olduğununun gösəricisidir".

Ölkəmizdə davam edən inkişaf tendensiyasının Bakının Nəsimi rayonunun sosial-iqtisadi inkişafında da özünü gösərdiyini vurğulayan icra başçısı Nəsib Məhəməliyev qeyd edib ki, 2010-ci ilin yanvar-iyun aylarında rayon sənayesində 74,3 mln. manatlıq və ya əvvəlki ilin səviyyəsindən 10,7 faiz çox sənaye məhsulu istehsal edilmiş və xidmətlər göstərilmişdir.

Şura iclasında icra başçısı diqqətə çatdırıb ki, rayon üzrə 2010-ci ilin 6 ayında istehlakçılara 50,1 mln. manatlıq və ya bütün sənaye istehsalının 102,0 faizə qədər sənaye məhsulu göndərilmişdir: "2010-cu ilin 6 ayında istehlak bazarının dinamik inkişaf etməsini, rayon əhalisinə 606,3 mln. manatlıq və əvvəlki ilin eyni dövründəkindən 35,8 faiz çox geniş çeşidli istehlak mallarının satıldığını və pullu xidmət göstərilib".

2010-cu ilin birinci yarımilliyində rayonda bütün maliyyə mənbələri hesabına 46,8 mln. manat dəyərində əsas fondlar istifadəyə verilib. Cari ilin yanvar, iyun aylarında rayonda 145,4 min kv.metr yaşayış sahələri istifadəyə verilmiş, iqtisadi və sosial sahələrin inkişafı üçün bütün maliyyə mənbələrindən əsas kapitala 63,1 mln. manat məbləğində investisiya yönəldilmişdir.

Yanvar-may aylarında rayon üzrə işçilərin orta sayı əvvəlki ilin müvafiq dövrü ilə müqayisədə 7342 nəfər artaraq, 153,693 nəfər olmuşdur. Cari ilin yanvar-may aylarında əvvəlki ilin müvafiq dövrü ilə müqayisədə işçilərin orta aylıq normal əmək haqqının səviyyəsi 9,4 faiz artaraq, 352,7 manat olmuşdur. 6 ayda rayonda 639 yeni iş yeri açılıb ki, bunun 22-i yeni yaradılan, 65-i mövcud müəssisə və təşkilatlar, 552 fiziki şəxslərdir.

Eyni zamanda, məşğulluq mərkəzi vasitəsilə işlə təmin olunanların 71,3 faizi və 293 nəfəri, peşə kurslarına cəlb olunanların 85,0 faizi və yaxud, 148 nəfəri gənclər olmuşdur. Dövr ərzində rayon üzrə işsizliyə görə 64 nəfərə müavinət verilmişdir.

Rayonun təhsil sahəsinə də toxunan rayon rəhbəri rayonun ümumtəhsil məktəblərində yeni dərs ilinə hazırlıq məqsədilə məktəblərdə cari təmir işləri aparılıb. Rayonun bir sıra məktəbəqədər müəssisələlərində orta ümumtəhsil məktəblərində zəruri olan istilik sistemləri bərpa olunub, dam örtüyü dəyişdirilib.

Bununla yanaşı, Nəsimi rayonunda böyük abadlıq-quruculuq işləri davam etdirilir, "Ekologiya ili" çərçivəsində rayon ərazisinin küçə və prospektlərində ümumilikdə 12 mindən artıq ağac və dekorativ gül kolları əkilmişdir. Rayonun bir sıra prospekt və küçələrini əhatə edən 88257 kv. metr asfalt örtüyü salınmışdır. Bu istiqamətdə rayon ərazisində nəzərdə tutulan quruculuq-abadlıq, yenidənqurma işləri davam etdirilir.

E.Hacıyev

Səs.- 2010.- 23 iyul.- S. 8.