Qəhrəmanlar unudulmur

Şərəfli ölümün mübarək Mübariz

Bu gün Azərbaycanın qəhrəmanlıq kəhkəşanını yeni bir ad, bir ünvan titrədir: Biləsuvar rayonu, Əliabad kəndi, 22 yaşlı milli qəhrəman Mübariz İbrahimovun doğulub boya-başa çatdığı ünvan. Elə bu qəhrəmanlıq ünvanına respublikamızın bütün regionlarından ziyarətə gələnlərin ardı-arası kəsilmir. "Lider" TV-nin "Səda +" proqramının aparıcısı Mətanət Ağamirlinin təşkilatçılığı ilə qadın jurnalistlərdən ibarət təşkil etdiyi qrup da qəhrəmanın boya-başa çatdığı kəndə baş çəkdi. Təşkil olunan bu aksiyada millət vəkili Qənirə Paşayeva ,"İctimai" TV, ATV, SİA, "Day.az" saytı, "Səs" və "Xalq qəzeti”nin nümayəndələri Şəhid Mübariz İbrahimovun doğulub boya-başa çatdığı Biləsuvar rayonunun Əliabad kəndində oldular. Kəndin girəcəyində Mübarizin yaşadığı evin üstündə Azərbaycanın üçrəngli bayrağı dalğalanırdı. Evə yaxınlaşanda həyətdə həm rayon sakinləri, həm də respublikamızın müxtəlif regionlarından ziyarətə gələn çoxlu insanlar yığışmışdı. Bizi Mübarizin atası və yaxınları qarşıladı. Şəhidin atası Ağakərim kişinin gözlərindən qəm-kədər yağırdı. Amma bu kədərin arxasından bir təmkin və qürur da boylanırdı...

Şəhidin atası Ağakərim İbrahimov bizimlə söhbəti zamanı oğlunun ölümündən qabaq yazdığı məktubu olduğu kimi söylədi: "Canım atam və anam. Məndən sarı darıxmayın. İnşallah, cənnətdə görüşəcəyik. Mənim üçün bol-bol dua edin. Vətənin dar günündə ürəyim dözmür. Allah xatirinə bunu eləməliyəm. Ən azından ürəyim sərinlik tapar. İnşallah, bu şərəfsizlərin üstünə gedəcəyəm. Şəhid olsam, ağlamayın. Əksinə, sevinin ki, o mərtəbəyə yüksəldim. Allah böyükdür. Vətən sağ olsun. Haqqınızı halal eləyin. Oğlunuz İbrahimov Mübariz".

Şəhid atası qəhrəman oğlunun şəkillərini göstərir. Onun haqqında titrək səslə danışır. Mübarizin qardaşı həyətdəki bir stulu göstərir. Orada Qarabağ sözü yazılıb. Köhnə və itmək üzrə olan cizgilərlə yazılmış yazının Mübarizə məxsus olduğunu deyirlər.

Mübarizin atası oğlunun gələcək haqqında danışdığı sözləri xatırlayır: "Hərdən "Zalımın düşməni, məzlumun dostuyam", "Ata, fəxr et ki, sənin aslan ürəkli oğlun var" kimi sözlər deyərdi. Hərbi hissədə də hamı ondan razılıq edirdi. Komandiri ondan tərif dolu məktublar yazardı.

Ağakərim kişi ağır xəbəri necə aldığından da danışdı. Nə qədər ağır olsa da: "Hadisənin səhəri günü tezdən saat 5-6 arasında mənə zəng gəldi. Soruşdular ki, oğlunuz evə gəlməyib ki? Dedim, mən oğlumu tanıyıram, sərhədə tərəf gedin. Sonra da məktubunu tapmışdılar. Danışanda da deyirəm ki, o, mənə qalib gəldi, arzusuna çatdı. Hadisədən bir gün qabaq bizə zəng vurmuşdu. Demə, ayın 17-də bunu edəcəkmiş. Sadəcə, həmin gün kağız tapa bilməyib. Daha sonra gecə saat 11-də telefonla mənə zəng vurdu. Nəsə demək istəyirdi, amma hiss edirdim ki, deyə bilmir. Soruşdum xəstələnməyibsən ki? Özünü toplayıb dedi, heç bir şey yoxdur, narahat olmayın. Səhəri günü isə kağızı tapıb və bu məktubu yazıb. Hətta bir əsgər bunun arxasınca gəlirmiş. Hara getdiyini soruşurmuş. O da əsgərin üstünə qışqıraraq, "qayıt dala, sənlik deyil", deyib. Həmin hərbi hissədə də olmuşam. Hamı Mübarizdən danışır. İrəliyə də getdim. Həmin tərəflərə baxdım. Amma..."

Mübarizin uşaqlığından danışan ata onun vətənə bağlı bir gənc olduğunu da söylədi: "1994-cü ildə Mübariz birinci sinfə gedib. Məktəbdə əlifba bayramı keçirilirdi. Mən özüm toylarda və şənliklərdə oynayan insan deyiləm. O, əsgər mahnısı çaldıraraq təkid etdi ki, mən də onunla oynayım. Əslində, bu hadisə mənim yadımda elə də qalmamışdı. Bu yaxınlarda onun müəllimləri mənə danışdı. Hər bir vəchlə vətənin bayrağını ucalığa qaldırmağı düşünürdü. Namaz qılardı. Çox tərbiyəli idi. Ən acığı gələn şey yalan və rüşvət idi. Rüşvət alıb-verən insanlara pis baxardı. İki yol seçmişdi. Deyirdi ya hərbçi olacaq, ya da idmançı. Onun daxilindəki vətən, torpaq sevgisi çox böyük idi. Bu sevgiyə qapanmışdı". Şəhid atası bunu deyir və gözləri dolur. Danışmağa çətinlik çəkirdi. Qardaşı isə Mübarizin sözlərindən sitat gətirir. Deyir ki, Mübariz "mən evlənməyəcəm, mənim yolum başqadır", kimi sözlər deyərdi. Qardaşı onu da bildirdi ki, Mübariz həmişə üstündə Azərbaycan sözü yazılmış, bayrağı həkk olunmuş paltarlar geyərmiş. Dostları da onun uşaqlığından danışır, Mübarizin mərd bir insan olduğunu deyirlər.

Qeyd edək ki, bölgədə hərəkət edən avtomaşınların üzərində qəhrəmanın şəkilləri asılıb. Gənclər paltarlarının sinələrinə Mübarizin şəkilini vuraraq rayonda yürüş keçiriblər. Hamı onun cəsədinin erməni əsgərlərinin əlində qalmağından narahatdır. Elə onun ailəsi də.

"Oğlum Mübariz İbrahimov şəhidlik zirvəsinə ucalmaqla, həm də onun bu hərəkəti Azərbaycan gənclərinə bir örnək olması ilə sevinirəm" sözlərini deyən qəhrəmanın anası Şamama İbrahimova onu da bildirdi ki, oğlum Allahını, Vətənini, xalqını sevən oğul idi. Allahdan bütün analara Mübariz kimi oğul qismət eləməyi arzu edərdim: "Fəxr edirəm ki, bu gün oğlum öz arzusuna çatıb. İnşallah, Mübariz kimi oğullarımız düşmən tapdağı altında qalan torpaqlarımızı azad edəcək və oğlumun da ruhu şad olacaq".

Millət vəkili Qənirə Paşayeva şəhidin atasına, anasına, əzizlərinə təsəlli verdi: "Bizim milli qəhrəmanımız, şəhidimiz Mübariz İbrahimov öz əməli ilə elə bir zirvəyə çatdı ki, o, dünyadan köçəndə, bu vətən, torpaq ona "halal olsun" dedi. Ən vacibi isə hər kəs onun tutduğu hərəkətdən qürur duydu, fəxr elədi. Həmçinin, Azərbaycan gəncləri üçün bir örnək də qoyub getdi". Artıq şəhidin ata yurdunu tərk edib böyük qürur hissi ilə geri qayıdırıq. Çünki bu gün hər birimizin qəlbində vətən sevgisi aşıb-daşır. Ona görə də hamı qəhrəman Mübarizdən danışır. Deməli, vətənə, torpağa bağlılıq hər bir azərbaycanlının mənəvi dünyasında özünə yer tutur. Vətənin ağır günündə düşmənə qarşı mübarizədə canını əsirgəməyən xalqımızın igid oğlanlarının adı Azərbaycanın qürur yeri, qürur mənbəyidir. Əlbəttə, Mübariz kimi igidi olan torpaq basılmazdır. Yerin behiştlik, ruhun şad olsun, Mübariz! Şərəfli ölümün mübarək! Vətən sağ olsun!

RƏFİQƏ KAMALQIZI

Səs.- 2010.- 31 iyul.- S. 7.