“Uşaqlar hər birimizin sevincidir"

Dünən Yeni Azərbaycan Partiyasının Sabunçu rayon təşkilatı və Sabunçu rayon icra hakimiyyəti Uşaqların Beynəlxalq Müdafiəsi Gününə həsr olunmuş tədbir keçirib. Sabunçu rayon Maştağa qəsəbəsində yerləşən 21 saylı "Təbəssüm" Uşaq Sanatoriyasında keçirilən tədbirdə giriş sözü ilə çıxış edən Sabunçu rayon icra hakimiyyəti başçısının müavini Cəmilə Ramazanova ulu öndər Heydər Əliyevin həmişə uşaqlara böyük sevgi və qayğı ilə yanaşdığını bildirdi. Qeyd etdi ki, ulu öndər Heydər Əliyev uşaqlarla mütəmadi görüşərək, onların çöhrəsindəki təbəssümün bizim hər birimizin sevinci olduğunu bildirdi. Bu gün Azərbaycan xalqının ümummilli lideri Heydər Əliyev siyasətinin ən layiqli davamçısı olan Prezident İlham Əliyevin də uşaqlara dərin və tükənməz sevgi ilə yanaşdığını bildirən C.Ramazanova Heydər Əliyev Fondunun prezidenti YUNESKO və İSESKO-nun xoşməramlı səfiri Mehriban xanım Əliyevanın ölkəmizdə uşaqların sağlamlığının və onların yüksək səviyyədə elm, təhsil əldə etməsi üçün mühüm addımlar atdığını bildirdi.

YAP Sabunçu rayon təşkilatının sədri Mehriban Abasquliyeva da uşaq sanatoriyasının balaca sakinlərini salamlayaraq, onları Uşaqların Beynəlxalq Müdafiəsi Günü münasibəti ilə səmimi qəlbdən təbrik etdi. Təşkilat sədri bildirdi ki, ulu öndərimiz Heydər Əliyev bütün uşaqlara həmişə böyük sevgi ilə yanaşıb. "Azərbaycanda gələcəyimiz olan uşaqların sağlam tərbiyəsi, yüksək səviyyədə təhsil almaları, intellektli kadrlar kimi yetişməsi üçün dövlətimiz tərəfindən ən zəruri addımlar atılır. Ölkə Prezidenti İlham Əliyev tərəfindən ötən ilin Uşaq İli elan edilməsi də, vətənimizdə uşaqlara diqqət və qayğının ən yüksək səviyyədə olmasından xəbər verir. Heydər Əliyev Fondunun prezidenti, millət vəkili Mehriban xanım Əliyeva tərəfindən uşaqlar üçün inşa edilən yeni uşaq sanatoriyaları, məktəblər, bağçalar ölkəmizdə uşaq siyasətinin zənginliyini bir daha təsdiqləmiş olur" -deyən M.Abasquliyeva uşaqların ölkəmizin gələcəyində və sağlam və intellektli kadrlar kimi yetişməsində atılan addımların təqdirəlayiq olduğunu bildirdi.

"Təbəssüm" Uşaq Sanatoriyasının baş həkimi Məleykə Behbudova çıxışında ölkəmizdə uşaqlara göstərilən diqqət və qayğının yüksək səviyyədə olduğunu bildidi. Rəhbərlik etdiyi sanatoriyanın Heydər Əliyev Fondu tərəfindən yüksək standartlara cavab verən formada təmir edildiyini bildirən M.Behbudova burada uşaqların rahatlığı, müalicəsi və istirahəti üçün hər bir şəraitin yaradıldığını söylədi. Baş həkim Beynəlxalq Uşaq Günü münasibəti ilə keçirilən bu cür tədbirlərin də əhəmiyyətinin böyük olduğunu və bunun uşaqların həyatında ən əziz xatirəyə çevrildiyini söylədi.

Tədbirdə, həmçinin, uşaqlar üçün maraqlı teatr nümunələri nümayiş etdirildi və onların ifasında şən mahnılar səsləndirildi.

Tapdıq Qurbanlı

Səs.- 2010.- 2 iyun.- S. 11.