Xilas günümüz

15 İyun Milli Qurtuluş Günü dövlət müstəqilliyimizin ən böyük tarixi nailiyyətidir

1993-cü il 15 iyun - Azərbaycanın bugünü, prespektivi birbaşa Heydər Əliyevin qayıdışı ilə bağlı olan tarixi gün. Respublikamızın şəhər və rayonlarında, həmçinin, respublikamızdan kənar şəhərlərində də Milli Qurtuluş Günü geniş şəkildə qeyd edilir. 15 iyunun Azərbaycan xalqının tarixində çox mühüm hadisələrdən biri olduğunu söyləyən siyasətçilərimiz, ziyalılarımız onu da bildirirlər ki, Qurtuluşdan başlanan inkişaf, tərəqqi bu gün daha da sürətlənib.

Yeni Azərbaycan Partiyası Cəlilabad rayon təşkilatının sədri Mirsüleyman Mirxaslı:

- Xalqımızın milli bayramları arasında Milli Qurtuluş gününün ayrıca yeri var. Çünki ümummilli liderimiz Heydər Əliyevin xalqın arzusu və tələbi ilə 17 il əvvəl hakimiyyətə qayıdışı ilə əlamətdar olan 15 iyun - Milli Qurtuluş həqiqətən müstəqil dövlətimizin məhvolma təhlükəsindən xilasının əbədi tarixi günü oldu. Milli Qurtuluş Günü Azərbaycan xalqının tarixində dönüş nöqtəsi oldu. Vurğulamaq istərdim ki, hər bir ölkənin tarixində onun gələcək taleyinə bilavasitə təsir göstərən əhəmiyyətli dönüş nöqtələri olur. Azərbaycan xalqının müasir tarixinin çox əhəmiyyətli dönüş nöqtəsi də 1993-cü ildə Heydər Əliyevin tarixi qayıdışı ilə başlamış qurtuluş məfkurəsi ilə əlaqədardır. Azərbaycan xalqı, ilk növbədə, 1993-cü illərin faciələrindən xilas olmaq üçün Heydər Əliyev kimi böyük tarixi şəxsiyyətin qətiyyətinə, müdrikliyinə ehtiyac duyurdu. Qurtuluş təkcə Azərbaycanın müasir tarixinin keçmişi deyil. eyni zamanda, Azərbaycanın bu günüdür, bugünkü reallıqlarımız, ölkədə mövcud olan sabitlik, əmin-amanlıq, vətəndaşların əhvali-ruhiyyəsidir. Hamımızın yaxşı yadındadır ki, 1993-cü ilin iyun günlərində baş vermiş Gəncə hadisələri, naşı dövlət rəhbərlərinin bir ovuc silahlı quldurun qarşısında aciz qalması, ölkədə faktiki olaraq, vətəndaş müharibəsinin başlanması, erməni təcavüzünün genişlənməsi, ayrı-ayrı ölkələrdə, xüsusən, cənub rayonlarında separatçılıq meyillərinin güclənməsi Azərbaycanı fəlakətlə üz-üzə qoymuşdu, AXC-Müsavat iqtidarının cəmi bir il davam etmiş səriştəsiz rəhbərliyi cəmiyyət həyatının bütün sahələrində dərin böhranla nəticələndi. Belə bir faciəvi şəraitdə xalqın, sözün əsil mənasında, xilaskara ehtiyacı var idi və 1993-cü il iyunun 15-də ümummilli liderimiz Heydər Əliyev xalqın təkidli istəyi və tələbilə ikinci dəfə siyasi hakimiyyətə qayıtdı.

Yeni Azərbaycan Partiyası Hacıqabul rayon təşkilatının sədri Hafiz Bəşirov:

- Müstəqil Azərbaycanımızda yaşanan 15 iyun- Milli Qurtuluş günü xalqımızın fəlakətlərdən qurtulub, qüdrətli bir dövlətin bünövrəsinin qoyulduğu gündür. Bu müqəddəs günü tarixə yazan isə ümummilli liderimiz Heydər Əliyevdir. İttifaq dağılandan sonra müstəqillik uğrunda alışıb yanan müttəfiq respublikalar kimi Azərbaycanda da xalq hərəkatı vüsət almışdı. Ölkəmizdə baş verən siyasi proseslər digər respublikalardan fərqli idi. Bir yandan hiyləgər qonşularımızın ərazi iddiası ilə apardığı müharibə, digər tərəfdən naşı, səriştəsiz ölkə rəhbərliyinin hakimiyyət hərisliyi xalqı uçurum qarşısına gətirib çıxarmışdı. Belə ağır bir məqamda ölkə xaricində olan qeyri-dostlarımız ölkəmizin yeraltı və yerüstü sərvətlərinə göz dikməsi respublikanı çıxılmaz vəziyyətə salmışdı.

Belə bir məqamda xalq ümummilli liderimiz Heydər Əliyevə pənah aparıb, onu ikinci dəfə hakimiyyətə gətirdi. Taleyini bu dahi şəxsiyyətə etibar edən xalq, nəhayət, azad nəfəs aldı. Xalqın taleyinə heç zaman laqeyd qalmayan Heydər Əliyev yenə öz həyatını təhlükələrə atıb, siyasi bacarığını işə saldı. Tez bir zamanda ona etibar olunan ölkəni təhlükədən qorudu. Ölkədə yaranan sabitlik, cəbhədə əldə olunan atəşkəs respublikanın inkişaf kursunu müəyyən etdi. Yaradılan sabitlikdən istifadə edən xarici sərmayədarlar ölkəyə gəlib müxtəlif sahələrə sərmayə qoymağa başladılar. Elə bu andan başlanan inkişaf "Əsrin müqaviləsi"ni, "İpək yolu"nu imzalamağa gətirib çıxardı. Böyük inkişafa qədəm qoyan ölkəmiz dünya dövlətləri ilə bir sırada beynəlxalq təşkilatlara üzv qəbul olundu. Azərbaycan bu gün böyük dövlətlər üçün önəmli bir ölkəyə çevrilib. İqtisadi və siyasi sahədə aparıcı bir dövlətə çevrilən Azərbaycan öz müstəqilliyi yolunda mətin addımlarla irəliləyir. 15 iyun 1993-cü il tarixi an məhz Heydər Əliyev tərəfindən Azərbaycan təqviminə qızıl hərflərlə yazıldı. Xalq bu günü böyük sevinc və fərəh hissi ilə qeyd edir. Bu bayram münasibəti ilə xalqımızı təbrik edir və ən xoş arzularımızı bildiririk.

Yeni Azərbaycan Partiyası Gədəbəy rayon təşkilatının sədri Ramazan Muradov:

- Milli Qurtuluş Günü kimi daxil olmuş 1993-cü ilin 15 iyun günü onu qiymətləndirənlər, dərindən dərk edənlər üçün çox əzizdir. Vətənini, xalqını sevən həmin çətin, ağrılı günlərin dəhşətlərini yaşayan, hadisələri gözləri ilə görən insanlar üçün 15 iyun əsil qurtuluş tarixi, Azərbaycanda ölüm-dirim mübarizəsinin tarixidir. Məhz Heydər Əliyevin uzaqgörən siyasətinin nəticəsində Azərbaycan dövlətçiliyi ona qarşı yönəlmiş qəsdlərdən uğurla çıxdı. Ulu öndərin qətiyyəti nəticəsində xalqın ruh yüksəkliyi artdı, sabitlik və əmin-amanlıq bərqərar oldu, xalq öz xilaskarını tanıdı.

1993-cü ilin iyun ayına qədər Azərbaycanda yaranmış mürəkkəb ictimai-siyasi vəziyyət, kriminal situasiya ölkəni iflic hala salmış, insanlardakı kütləvi psixoz sosial həyatı alt-üst etmişdi. O zaman hakimiyyətdə olan AXC-Müsavat birliyi ölkəni idarə etməkdə səriştəsizlik, acizlik göstərirdi. Ölkəni iqtisadi böhran bürümüşdü. Təcili şəkildə hakimiyyət boşluğunu aradan qaldırmaq, əfəl və aciz, başını itirmiş iqtidarı hakimiyyətdən uzaqlaşdırmaq lazım gəlirdi. Belə bir ağır zamanda xalq öz seçimini etməli, "olum, ya ölüm" dilemmasına cavab tapmalı idi. O günlərdə Azərbaycan ziyalılarının, bütövlükdə, xalqın diqqəti özünü görkəmli dövlət xadimi kimi çoxdan təsdiq etmiş Heydər Əliyevə yönəldi. Belə bir çətin və mürəkkəb durumda Azərbaycan ziyalılarının və Azərbaycan xalqının təkidi ilə Heydər Əliyev Naxçıvandan Bakıya gəldi. 1993-cü il iyun ayının 15-də Heydər Əliyev Azərbaycan Respublikası Ali Sovetinin Sədri seçildi və beləliklə, xalq öz qurtuluş, nicat yolunu tapdı. Xalqın seçimi qısa zaman kəsiyində özünü doğrultmağa başladı.

Heydər Əliyevin Azərbaycana qayıdışı və yenidən hakimiyyətə gəlməsi millətimizin tarixinə Milli Qurtuluş günü kimi daxil oldu. Yeni siyasi kurs və inkişaf perspektivlərini müəyyən edən ulu rəhbərin həyata keçirdiyi təcili tədbirlər nəticəsində hakimiyyət boşluğu aradan qaldırıldı. Respublikanın müxtəlif bölgələrində baş qaldırmış etnik-separatçı qüvvələr qətiyyətlə zərərsizləşdirildi. Vətəndaş müharibəsi təhlükəsi aradan qaldırıldı.

Yeni Azərbaycan Partiyası Biləsuvar rayon təşkilatının sədri Kamil Mirzəyev:

- 15 iyun 1993-cü il Azərbaycan xalqının tarixində ən əlamətdar bir hadisədir. Xalqın təkidli tələbi ilə hakimiyyətə gələn ümummilli lider Heydər Əliyev Azərbaycan xalqının itirilmiş inamını özünə qaytardı, Azərbaycanın müstəqilliyini təmin etdi. Ulu öndər, həmişə qeyd edirdi ki, dövləti olmayan xalq ölümə məhkumdur. Biz azadlığımızın, müstəqilliyimizin yolunu gözləmişik, mübarizə aparmışıq, bu yolda minlərlə şəhid vermişik.Azadlığı, müstəqilliyi əldə etmək nə qədər çətindirsə, onu qoruyub saxlamaq bir o qədər mürəkkəbdir. 1993-cü ilin əvəllərində, artıq Azərbaycan müstəqilliyini itirmək təhlükəsi ilə üzləşmişdi.O zaman Azərbaycan son dərəcə ağır vəziyyətdə idi. AXC-Müsavat iqtidarının səriştəsizliyi üzündən hərc-mərclik, başıpozuqluq, hakimiyyət uğrunda didişmə dövlətin bütün sahələrinə sirayət etmişdi. Tarixi düşmənimiz ermənilər bir-birinin ardınca rayonlarımızı işğal edib,yüz minlərlə soydaşımızı öz vətənində qaçqına çevirmişdi. Azərbaycanı parçalamaq və bir dövlət kimi məhv olmaq təhlükəsindən xilas etmək reallıqdan çox uzaq görünürdü. Bu zaman xalqın təkidli dəvətini qəbul edən ulu öndər Heydər Əliyev iyunun 9-da Bakıya gəldi. Bütün Azərbaycan xalqı bu gəlişi böyük ümid və sevinclə qarşıladı. Bununla da, daxili və xarici düşmənlərimizin bütün planları iflasa uğradı. Xilaskarlıq missiyasini öz üzərinə götürən ümummilli liderimiz Heydər Əliyevin Gəncəyə səfəri vətəndaş müharibəsinin qarşısını aldı. 1993-cü il iyunun 15-də Heydər Əliyev Azərbaycan Respublikası Ali Sovetinin Sədri seçildi. Bu gün tariximizə Milli Qurtuluş Günü kimi daxil oldu. Ümummilli liderimiz Heydər Əliyevin Azərbaycana rəhbərlik etdiyi dövrdə milli-mənəvi dəyərlərimiz bərpa edildi, onun qətiyyətli, apardığı uğurlu daxili və xarici siyasət sayəsində ölkəmiz xaosdan xilas oldu, sivil demokratik inkişaf yolu ilə inamla irəliləyərək, böyük nailiyyətlər qazandı. Müasir Azərbaycanın banisi, Azərbaycanı sabitlik və inkişaf yoluna çıxarmış böyük Heydər Əliyev 2003-cü il prezident seçkiləri ərəfəsində çox böyük əminliklə Azərbaycan xalqına müraciət edirdi: "İnanıram ki, mənim axıra çatdıra bilmədiyim taleyüklü məsələləri, planları, işləri xalqın köməyi və dəstəyi ilə İlham Əliyev başa çatdıra biləcək".

Beləliklə, haqlı olaraq, Azərbaycan xalqı 2003-cü ilin oktyabrında çox böyük ruh yüksəkilyi ilə İlham Əliyevi Azərbaycan Respublikasının Prezidenti seçdi, çox böyük ümid və inamla taleyini böyük Heydər Əliyevin zəka və iradəsinin varisi İlham Əliyevə etibar etdi, tapşırdı. Bütün varlığımızla fəxr edirik ki, bu gün ümummilli liderimiz Heydər Əliyevin böyük yolunu möhtərəm Prezidentimiz İlham Əliyev cənabları şərəflə davam etdirir. Ölkə Prezidenti İlham Əliyevin yorulmaz fəaliyyəti nəticəsində Azərbaycan günü-gündən çiçəklənərək və inkişaf edərək iqtisadi inkişaf sahəsində dünyanın lider dövlətlərindən birinə çevrilmişdir.

RƏFİQƏ KAMALQIZI

Səs.- 2010.- 10 iyun.- S. 3.