Azərbaycanın xilaskarlıq yolu

YAP Xızı rayon təşkilatı 15 İyun Milli Qurtuluş Günü və parlament seçkilərinə hazırlıqla bağlı tədbir keçirdi

Dünən Yeni Azərbaycan Partiyası Xızı rayon təşkilatı 15 İyun Milli Qurtuluş Günü münasibətilə keçirilən tədbirdə rayon təşkilatının sədri Fərrux Haqverdiyev çıxış edərək bildirdi ki, ulu öndər Heydər Əliyevin ikinci dəfə hakimiyyətə qayıdışı ilə Azərbaycan xaosdan, anarxiyadan xilas oldu, inkişaf, tərəqqi yoluna çıxdı. İlk növbədə, ölkədə sabitliyin yaradılmasının zəruriliyini bildirən ulu öndər, bunu bütün inkişafın əsası kimi qeyd etdi. Ölkə iqtisadiyyatı çox qısa zamanda tənəzzüldən tərəqqi yoluna çıxdı. Bütün sahələrdə inkişafın əsası qoyuldu.

F.Haqverdiyev Azərbaycanın keçdiyi inkişaf yoluna nəzər salaraq bildirdi ki, cənab İlham Əliyev 2003-cü il prezident seçkilərindən sonra andiçmə mərasimində "Azərbaycanın daha qüdrətli dövlətə çevrilməsi üçün Heydər Əliyev siyasi kursu davam etdirilməlidir" bəyan etmişdi. Son altı ildə görülən işlər, əldə olunan nəticələr cənab İlham Əliyevin bu vədinə sadiqliyini, hər bir sözünün arxasında konkret əməli işin dayandığını təsdiqləyir: "Azərbaycanı bugünkü inkişaf, tərqqi yoluna çıxaran, dünya birliyində layiqli yer tutmasına səbəb ulu öndər Heydər Əliyevin düşünülmüş və məqsədyönlü siyasəti və bu xəttin hazırda Prezident İlham Əliyev tərəfindən uğurla davam etdirilməsidir. Bu gün harada yaşamasından asılı olmayaraq hər bir Azərbaycan vətəndaşı ölkəmizin bugunkü uğurları ilə fəxr edir, böyük qürur hissi keçirir. Ulu öndər Heydər Əliyevin Azərbaycan xalqı qarşısındakı xidmətlərindən günlərlə, aylarla danışmaq olar. Onun ən böyük xidməti müasir Azərbaycandır. Ulu öndərimiz Heydər Əliyev hakimiyyətə qayıdışı ilə Azərbaycanı yenidən qurdu, dünyada tanıtdı, yeri və mövqeyini daha da möhkəmləndirdi. Ümummilli liderimiz Heydər Əliyev hakimiyyətə qayıdışı ilə xalqa bu sevinci bəxş etdi".

F.Haqverdiyev payızda keçiriləcək parlament seçkilərinə ciddi hazırlıq işlərinin davam etdirildiyini söylədi. Bildirdi ki, YAP Xızı rayon təşkilatında da, YAP-ın bütün rayonlarında olduğu kimi, parlament seçkilərinə hazırlıqla bağlı zəruri işlər görülməkdədir. Payızda keçiriləcək parlament seçkilrinə hazırlıq işlərinin davam kimi, artıq Xızı rayonu ərazisində fəaliyyət göstərən bütün dairə və məntəqə seçki komissiyalarında siyahıların dəqiqləşdirilməsi işləri aparılır. YAP İcra katibliyinin tapşırıq və tövsiyələrinə uyğun olaraq vacib addımlar atılmaqdadır. Demək olar ki, parlament seçkilərində qarşıya çıxacaq bütün problemlərin və tətbiq olunacaq yeniliklərin həlli üçün də qarşıya qoyulan məqsədlər uğurla icra olunmaqdadır. Bütün bunlarla yanaşı, Azərbaycan özünün malik olduğu demokratik seçki təcrübəsinə əsaslanaraq, bütün seçki proseslərinin azad və ədalətli formada keçirilməsinə nail olur. Bunun üçün zəruri olan prinsipial cəhətlər də mövcud olduğundan, bu prosesin keçirilməsi yüksək ictimai fəallıq nəticəsində baş tutur.

YAP Xızı rayon təşkilatı qadınlar şurasının sədri Svetlana Rüstəmova 15 iyun 1993-cü ildə müstəqil Azərbaycanın memarı və qurucusu, fenomenal tarixi şəxsiyyət Heydər Əliyevin hakimiyyətə qayıdışı tarixə Milli Qurtuluş Günü kimi daxil olduğunu söylədi. Bildirdi ki, məhz həmin gündən Azərbaycan xalqının və dövlətinin həyatında dönüş, müstəqilliyin qorunması və möhkəmləndirilməsi uğrunda şərəfli mübarizə dövrü başlandı, həmin gün xalqımızın tarixinə milli qurtuluş kimi daxil oldu. Bu, adi qurtuluş, adi xilasetmə deyildi. Bu, Azərbaycanın müstəqilliyinin qorunması və əbədiliyə çevrilməsi, dönüş və yüksəlişin təməlinin qoyulması demək idi: "15 iyun 1993-cü ildən - Milli Qurtuluş Günündən başlanan müstəqilliyin inkişaf etdirilməsi, uğurlu dövlət quruculuğu, sabit vətəndaş cəmiyyətinin yaradılması bu gün də qətiyyətlə davam etdirilir. Bu gün Prezident İlham Əliyev ümummilli lider Heydər Əliyevin daxili və xarici siyasət kursunu uğurla və dönmədən davam etdirməkdədir".

Ulu öndərin Azərbaycan xalqı qarşısında əvəzsiz xidmətlərindən bəhs edən çıxışçılar Milli Qurtuluş Gününün dövlətimizin şərəfli tarixi olduğunu söylədilər.

RƏFİQƏ KAMALQIZI

Səs.- 2010.- 11 iyun.- S. 7.