Qələbəyə doğru dönüş

Dünən Yeni Azərbaycan Partiyası Qusar rayon təşkilatı 15 iyun Milli Qurtuluş günü ilə bağlı gənclərlə "Heydər Əliyev siyasi məktəbini öyrənirik" mövzusunda tədbir keçirib. Tədbirdə YAP Qusar rayon təşkilatının sədri David İbrahimxəlilov respublikamızın hər yerində 15 İyun Milli Qurtuluş Günü geniş qeyd olunduğunu söyləyib.

Natiq vurğulayıb ki, ulu öndər Heydər Əliyevin 1993-cü ildə hakimiyyətə tarixi qayıdışının ən möhtəşəm nəticəsi bugünkü Azərbaycan, onun sürətli inkişafı, hər bir kəsin həyatında baş verən müsbət dəyişikliklərdir. Milli Qurtuluş Gününün Azərbaycan xalqının tarixində çox mühüm hadisələrdən olduğunu qeyd edən YAP Qusar rayon təşkilatının sədri bildirib ki, qurtuluşdan başlanan inkişaf və tərəqqi bu gün daha da sürətlənib: "Xalqımız yeni həyatın başlanğıcını qoyan ulu öndərimiz Heydər Əliyevin ideyalarına sadiqdir, bu irsin öyrənilməsi və təbliği istiqamətində səylər göstərir".

D.İbrahimxəlilov müstəqil dövlətimizin Qurtuluşdan ötən dövr ərzində imza atdığı uğurlardan geniş bəhs edib. Bildirib ki, Azərbaycan yerləşdiyi coğrafi məkana, malik olduğu təbii resurslara görə daim dünyanın diqqət mərkəzində olub. Bu gün həmin marağın daha da artdığının şahidiyik. Böyük enerji layihələrinin mərkəzinə çevrilən Azərbaycanın dünyada iqtisadi və siyasi mövqeyi möhkəmləndiyini deyən D.İbrahimxəlilov bugünkü reallıqların əsas səbəbini açıqlayaraq, bildirib ki, bu ulu öndər Heydər Əliyevin "İqtisadiyyatı güclü olan dövlət hər şeyə qadirdir" fikrini bir daha təsdiqləyir. Belə ki, Heydər Əliyevin düşünülmüş və uzaqgörən siyasətinin ölkə Prezident İlham Əliyev cənabları tərəfindən uğurla davam etdirilməsinin nəticəsində iqtisadi cəhətdən qüdrətlənən Azərbaycan bütün sahələrdə böyük inkişafa və tərəqqiyə nail olub: "Bugünkü Azərbaycan sürətlə yeniləşən, inkişaf edən, müasirləşən Azərbaycandır. Təbii ki, Azərbaycanın inkişafı, Heydər Əliyev yolu ilə irəliləməsi, bu gün Prezident İlham Əliyevin rəhbərliyi altında həyata keçirilən siyasətin uğurlu nəticələri ulu öndərin yaratdığı və hazırda cənab İlham Əliyevin rəhbərlik etdiyi YAP-ın da güclənməsinə, sıralarının artmasına, cəmiyyətdə mövqeyinin əhəmiyyətli dərəcədə möhkəmlənməsinə səbəb olub. Bu gün partiyanın sıralarında 500 mindən artıq üzv birləşir".

Görüşdə YAP Qusar rayon təşkilatının idarə heyətinin üzvü Elman Mustafayev "Heydər Əliyev məktəblilərin gözü ilə" mövzusunda çıxış edib. Bildirib ki, bu gün bu yol, bu inkişaf, bu tərəqqi Heydər Əliyevin 1993-cü ildə Azərbaycana qayıtması qurtuluş məfkurəsinin Azərbaycanda əsasının qoyulması və qurtuluşdan sonra başlanılan Heydər Əliyevin siyasətinin bilavasitə nəticəsidir: "Ümummilli liderimiz Heydər Əliyevin bu yolu, uğurlu siyasəti Onun layiqli davamçısı, ölkə Prezidenti, Yeni Azərbaycan Partiyasının Sədri cənab İlham Əliyev layiqincə həyata keçirməkdədir".

Tədbirdə partiyanın üzvü Sərxan İsmayılov və başqaları çıxış edərək bildirdilər ki, ulu öndər Heydər Əliyevin 15 iyunda Azərbaycana ikinci dəfə siyasi hakimiyətə qayıdışı ölkəni 1991-93-cü illərin böhranından xilas etdi, bugünkü inkişafın, tərəqqinin əsasını qoydu. Azərbaycanın dövlət müstəqilliyini sarsılmaz, əbədi edən ümummilli lider Heydər Əliyev bildirirdi ki, müstəqilliyimiz tarixi nailiyyətimizdir. Bu gün qarşımızda duran əsas vəzifə onu qorumaq, daha da möhkəmləndirməkdir. Bu gün hər bir kəs ulu öndər Heydər Əliyevin ruhu qarşısında baş əyir, Ona ehtiramını bildirir.

Sonda müsabiqə qalibi Sərxan İsmayılov rayon təşkilatı tərəfindən qiymətli hədiyyə ilə mükafatlandırıldı.

RƏFİQƏ KAMALQIZI

Səs.- 2010.- 12 iyun.- S. 6.