Milli qurtuluşdan başlanan yol Azərbaycanı firəvan gələcəyə doğru aparır

Dünən Daşkəsən rayon icra hakimiyyəti ilə YAP Daşkəsən rayon təşkilatının "15 İyun Milli Qurtuluş Günü" adlı mövzuya həsr olunmuş birgə tədbiri keçirildi. Tədbir iştirakçıları ilk öncə rayonun mərkəzində ucaldılan ümummilli liderimiz Heydər Əliyevin abidəsi önünə tər çiçək dəstələri qoydular.

Heydər Əliyev adına Muzeydə davam etdirilən tədbiri giriş sözü ilə Daşkəsən rayon icra hakimiyyətinin başçısı Tahir Kərimov açaraq, bu möhtəşəm bayram günü münasibətilə iştirakçıları təbrik etdi. O, 1993-cü ilin may-iyun aylarında yaşanmış Azərbaycan tarixinin ən ağır günlərini xatırladaraq, ilk növbədə, Qarabağ müharibəsində böyük itkilərdən, hərbi uğursuzluqlardan, iqtisadi tənəzzüldən və dövlət rəhbərliyindəki çəkişmələrdən danışdı: "Azərbaycan xalqının və Azərbaycan Respublikasının tarixinə Milli Qurtuluş Günü kimi daxil olmuş 1993-cü ilin 15 iyun günü onu qiymətləndirənlər, dərindən dərk edənlər üçün çox əzizdir. Vətənini, xalqını sevən, həmin çətin, ağrılı günlərin dəhşətlərini yaşayan, hadisələri gözləri ilə görən insanlar üçün 15 iyun əsil qurtuluş tarixi, Azərbaycanda ölüm-dirim mübarizəsinin tarixidir. Bu tarixi yaradan isə yenə də Azərbaycanın inkişafında, müstəqilliyində, gələcəyində müstəsna rol oynayan, daim xalqına arxalanan və xalqa arxa olan bir insan - ulu öndərimiz Heydər Əliyev oldu".

T.Kərimov onu da vurğuladı ki, bütün çətinliklərə baxmayaraq, ümummilli lider Heydər Əliyevin xidməti nəticəsində xalqımızın və tariximizin qarşısında kəskin ziddiyyətlər aradan qaldırıldı. Ümummilli liderimiz Heydər Əliyev demişdir ki, Azərbaycanın dövlət müstəqilliyi "əbədidir, sarsılmazdır, dönməzdir."

Tədbirdə YAP Daşkəsən rayon təşkilatının sədri Meydanəli Yolçuyev çıxış edərək, bildirdi ki, Milli Qurtuluş Gününü rayon təşkilatını təmsil edən ilk partiya təşkilatları da görüşlər keçirərək təntənə ilə qeyd edirlər. M.Yolçuyev o dövrkü iqtidarın səbatsızlığı ucbatından xalqın milli arzularının puça çıxmaq təhlükəsi ilə üz-üzə qaldığını söylədi. Bildirdi ki, o dövrdə ölkədə vətəndaş müharibəsinin başlanması və respublikanın parçalanması təhlükəsinin artması xalqın və müstəqil Azərbaycan dövlətinin gələcəyini sual altına qoymuşdu. Bu çıxılmaz vəziyyətdə Azərbaycan xalqının gözü Naxçıvana, yeganə ümid yeri olan Heydər Əliyevə dikilmişdi. Ölkənin hər yerində izdihamlı mitinqlər keçirilir, Heydər Əliyevin təcili olaraq Azərbaycan Respublikasında rəhbərliyə gətirilməsi tələb olunurdu. 1993-cü il iyun ayının 15-də Heydər Əliyev Azərbaycan Respublikasının Ali Sovetinin sədri vəzifəsinə seçildi. Onun hakimiyyətə qayıdışı ilə hadisələrin gedişində həlledici dönüş baş verdi. Müdrik dövlət xadimi bir neçə siyasi gedişdən sonra vətəndaş müharibəsi təhlükəsini aradan qaldırdı. Bu qurtuluş savaşında qələbəyə doğru dönüş başlandı. Azadlıq, müstəqillik həm ayrıca hər bir vətəndaş üçün, həm bütöv xalqlar, millətlər üçün ən müqəddəs, ən şirin nemətdir. Azadlığı, müstəqilliyi əldə etmək nə qədər çətindirsə, onu qoruyub saxlamaq bir o qədər mürəkkəb və ağır məsələdir. Dövlətimizin qorunub-saxlanması azadlığımızın qorunub saxlanması-qurtuluş deməkdir! Müstəqil Azərbaycan dövlətinin və Yeni Azərbaycan Partiyasının banisi, ulu öndərin ideyalarının daşıyıcısı olan Yeni Azərbaycan Partiyasını təmsil edən hər bir üzvü bu partiyanın sıralarında olmaqdan həmişə qürur duyurlar".

Tədbirin sonunda 40 nəfər Yeni Azərbaycan Partiyasının sıralarına qəbul olundular. Bir qrup YAP fəalına hədiyyə və mükafatlar təqdim edildi.

RƏFİQƏ KAMALQIZI

Səs.- 2010.- 12 iyun.- S. 10.