Tarixi xilasdan başlanan yol

"Səs" qəzeti ulu öndər Heydər Əliyevin ikinci dəfə hakimiyyətə gəldiyi gün - 15 İyun Milli Qurtuluş Günü münasibəti ilə növbəti dəyirmi masa keçirdi

(Əvvəli ötən sayımızda)

Azərbaycan xalqının ulu öndəri Heydər Əliyevin 1993-cü ilin 15 iyununda ikinci dəfə xalqın təkidli tələbi ilə siyasi hakimiyyətə qayıdışı dövlətimizin və millətimizin qurtuluş tarixidir. Bu tarixi bu gün hər bir azərbaycanlı dərk edir və ondan nəticə çıxarır. Yetişməkdə olan gənc nəsil müasir Azərbaycan tarixində baş vermiş lap bu parlaq səhifəni özünün həyat amalına çevirir. Ona görə də, cəmiyyət, dövlət üçün aktual məsələlələri davamlı şəkildə hökumət, dövlət, millət vəkilləri, pedaqoji kadrlar, siyasi partiya nümayəndələri, ayrı-ayır təşkilatlar və cəmiyyətin müxtəlif təbəqələri tərəfindən müzakirəyə çıxaran "Səs" qəzeti bu dəfə keçirdiyi növbəti dəyirmi masanın da mövzusunu Milli Qurtuluş Gününə həsr edib.

Dəyirmi masada "Səs" qəzetinin baş redaktoru Bəhruz Quliyev, millət vəkili Musa Urud, YAP Siyasi Şurasının üzvü, "İki Sahil" qəzetinin baş redaktoru Vüqar Rəhimzadə, Milli Məclisin deputatı Jalə Əliyeva, YAP Siyasi Şurasının üzvü, Qaradağ rayon təşkilatının sədri Aydın Hüseynov, "Yeni Azərbaycan" qəzetinin baş redaktoru Hikmət Babaoğlu, millət vəkili Lalə Abbasova, Azad Respublikaçılar Partiyasının sədri Kamil Seyidov iştirak edirdi.

Dəyirmi masada giriş sözü ilə çıxış edən "Səs" qəzetinin baş redaktoru Bəhruz Quliyev ulu öndər Heydər Əliyevin Azərbaycan xalqı, Azərbaycan dövlətçiliyinin bugünü və gələcəyi üçün böyük və zəngin bir irs qoyduğunu bildirdi. Qeyd etdi ki, dünyanın ən görkəmli liderləri ümummilli lider Heydər Əliyev siyasətinin qarşısında böyük anlamda qibtə ediblər. "Çünki Ulu Öndər Heydər Əliyev təkcə Azərbaycan coğrafiyası daxilində deyil bütün bəşəriyyət tərəfindən qəbul olunan böyük bir şəxsiyyətdir. Azərbaycan xalqının ən böyük xoşbəxtçiliyi ondadır ki, onun ulu öndər Heydər Əliyev kimi böyük şəxsiyyəti var. Bu şəxsiyyətin böyüklüyü xalqının və millətinin xoşbəxtliyi üçün fədakarcasına görmüş olduğu işlərin əvəzi yoxdur" - deyən B.Quliyev 15 iyun 1993-cü il Azərbaycan xalqının tarixində ən əlamətdar bir tarixi hadisə kimi daxil olduğunu da dəyirmi masa iştirakçılarının diqqətinə çatdırdı. Bildirdi ki, bu tarix Azərbaycanın xilas və nicat tarixidir. Xalqın təkidli tələbi ilə hakimiyyətə gələn ümummilli lider Heydər Əliyev Azərbaycan xalqının itirilmiş inamını özünə qaytardı" deyən baş redaktor, bununla da, Azərbaycanın müstəqilliyini təmin olunduğunu dilə gətirdi. "Ulu Öndər həmişə qeyd edirdi ki, dövləti olmayan xalq ölümə məhkumdur. Biz azadlığımızın, müstəqilliyimizin yolunu gözləmişik, mübarizə aparmışıq, bu yolda minlərlə şəhid vermişik. Azadlığı, müstəqilliyi əldə etmək nə qədər çətindirsə, onu qoruyub saxlamaq bir o qədər mürəkkəbdir. 1993-cü ilin əvvəllərində, artıq Azərbaycan müstəqilliyini itirmək təhlükəsi ilə üzləşmişdi. O zaman Azərbaycan son dərəcə ağır vəziyyətdə idi. AXC-Müsavat iqtidarının səriştəsizliyi üzündən hərc-mərclik, başıpozuqluq, hakimiyyət uğrunda didişmə dövlətin bütün sahələrinə sirayət etmişdi. Tarixi düşmənimiz ermənilər bir-birinin ardınca rayonlarımızı işğal edib, yüz minlərlə soydaşımızı öz vətənində qaçqına çevirmişdi. Azərbaycanı parçalamaq və bir dövlət kimi məhv olmaq təhlükəsindən xilas etmək reallıqdan çox uzaq görünürdü. Bu zaman xalqın təkidli dəvətini qəbul edən Ulu Öndər Heydər Əliyev iyunun 9-da Bakıya gəldi. Bütün Azərbaycan xalqı bu gəlişi böyük ümid və sevinclə qarşıladı. Bununla da, daxili və xarici düşmənlərimizin bütün planları iflasa uğradı. Xilaskarlıq missiyasını öz üzərinə götürən ümummilli liderimiz Heydər Əliyevin Gəncəyə səfəri vətəndaş müharibəsinin qarşısını aldı. 1993-cü il iyunun 15-də Heydər Əliyev Azərbaycan Respublikası Ali Sovetinin Sədri seçildi. Bu gün tariximizə Milli Qurtuluş Günü kimi daxil oldu" deyən B.Quliyev ümummilli liderimiz Heydər Əliyevin Azərbaycana rəhbərlik etdiyi dövrdə milli-mənəvi dəyərlərimiz bərpa edildi, onun qətiyyətli, apardığı uğurlu daxili və xarici siyasət sayəsində ölkəmiz xaosdan xilas oldu, sivil demokratik inkişaf yolu ilə inamla irəliləyərək, böyük nailiyyətlər qazandığını bildirdi.

B.Quliyev 15 İyun Milli Qurtuluş Günü ətrafında fikir mübadiləsinin aparılmasının və Ulu Öndərimizin dövlət, xalq qarşısındakı tarixi xidmətlərindən bəhs etmələrinin vacibliyini təklif etdi.

Jalə Əliyeva:

- Burada məndən öncə çıxış edən qonaqlara qoşularaq "Səs" qəzetinə belə bir dəyirmi masanı təşkil etdiyinə görə minnətdarlığımı bildirirəm. Alman filosofu Tariyel Tomasın belə bir fikri var ki, dünyada elə oğullar var ki, xalqlar onların adının, şöhrətinin arxasında gəlirlər. Nadir oğullardan, nadir insanlardan biri tarixin əsrdə bir dəfə yetişdirdiyi və Tanrının nadir hallarda bəxş etdiyi bir şəxsiyyəti - Heydər Əliyevi Azərbaycan xalqı özünün ümummilli lideri olaraq qəbul etdi. Ulu Öndər Heydər Əliyev də haqlı olaraq Azərbaycan xalqının, dövlətinin himayəsinə qalxdı. Əvvəla onu qeyd edim ki, müstəqilliyi bəzən qorumaq, saxlamaq onu əldə etməkdən, qazanmaqdan çox-çox çətin olur. Bunu dünya tarixi də sübut edibdir. Özümüzün bir əsrlik tariximizdə də bunu hər birimiz açıq şəkildə görə bilirik. Azərbaycan XX əsrdə iki dəfə müstəqillik əldə etdi. Əsrin əvvəllərində əldə etdiyimiz müstəqilliyin hansı bəlalarla qarşılaşdığını və çox qısa bir ömür sürdüyünü hər birimiz bilirik. İkinci dəfə isə Azərbaycan xalqı təbii olaraq azad olmaq, müstəqil olmaq arzusu ilə çarpışırdı. Tarixi şərait yarandığı anda 70 ildən sonra bir daha xalqımız bu müstəqilliyə can atdı və yenidən öz milli müstəqilliyinə qovuşmuş oldu. O dövrün bütün tarixi proseslərini burada oturan şəxslər də öz gözləri ilə izləyirdilər. Həmin anlarda, həmin illərdə nələrin baş verdiyini biz orta nəsil şahidi olmuşuq. O dövr ölkə tamamilə dağılmaq təhlükəsi ilə üzləşmişdi. Onu da qeyd edim ki, 1988-ci ildə Azərbaycanda artıq bir oyanış hərəkatı mövcud idi. İstər daxildən, istər xaricdən Azərbaycanın başına gələn müsibətlər, bəlalar, bədnam qonşularımız tərəfindən işğalçılıq siyasəti, rus qoşunlarının bu işğalçılıq əməllərinə yardım göstərmələri torpaqlarımızın 20 faizinin itirilməsi, 1 milyondan artıq vətəndaşımızın öz ölkəsində qaçqın və məcburi köçkünə çevrilməsi ilə nəticələndi. Eyni zamanda, Azərbaycanda qısa müddətdə bir-birinin ardınca hakimiyyət dəyişikliklərinin baş verməsi və bu dəyişikliklərin də hər biri Azərbaycanı parçalanmağa, yox olmağa, xalqı bəlalara sürükləyən proseslərin yaranmasına rəvac vermiş oldu. 1993-cü ildə artıq Ulu Öndər Heydər Əliyevin xalqın təkidli tələbi ilə hakimiyyətə qayıdışı ərəfəsində də ölkədə baş verən proseslər, xalqın ağır durumu hər kəsin yaddaşındadır. O zaman baş vermiş olan Gəncə hadisələri, Şimal zonasındakı hadisələr, eyni zamanda, Cənubda baş verən "Talış-Muğan Respublikası", digər bir tərəfdən, Ermənistan tərəfindən elan edilməmiş müharibə, bir tərəfdən, tamamilə talan edilmiş dövlət büdcəsi Azərbaycanın bir dövlət kimi məhvini stimullaşdıran proseslər idi. Bütün bunların isə qarşısını almaq və hər bir prosesi ayrı-ayrılıqda dəyərləndirərək, qaydasına salmaq isə, həqiqətən də, böyük bir hünər, tarixin yetişdirdiyi böyük bir şəxsiyyət nümunəsi istəyirdi. Bir faktı da qeyd edim ki, o dövrlər biz ictimai nəqliyyatda və digər ictimai yerlərdə olarkən, Azərbaycan xalqının nümayəndələri Ulu Öndər Heydər Əliyevi nə dərəcədə böyük sevgi və məhəbbətlə arzuladıqlarının şahidi olurduq. Sadə xalq göz önündə bu cür hadisələri gördükcə, açıq şəkildə bildirirdilər ki, bizə Ulu Öndər Heydər Əliyev lazımdır. Çünki onlar bildirirdilər ki, dahi şəxsiyyət Heydər Əliyev paytaxta vaxtında gəlməsinə şərait yaradılsaydı, bu cür hadisələr xalqın başına gətirilməzdi. Məhz bu ictimai sifariş və xalqın dəstəyi ilə Ulu Öndər Heydər Əliyev, təbii ki, ikinci dəfə siyasi hakimiyyətə qayıtdı. Beləliklə də, Azərbaycanın yeni müstəqillik tarixinin başlanğıcı oldu. Biz böyük tariximizi unutmayaraq, eyni zamanda, əsil müstəqilliyimizə, bizi bu günümüzə qovuşduran Ulu Öndər Heydər Əliyevə borcluyuq. Bu gün hər birimiz azad nəfəs aldığımız, öz fikirlərimiz, ideyalarımız üçün də ulu Heydər Əliyev müdrikliyi qarşısında baş əyirik.

Lalə Abbasova:

- Bu gün hər birimiz ölkəmizdə böyük quruculuq-abadlıq işlərinin yenidənqurma proseslərinin böyük uğurla və sürətlə davam etdirildiyini müşahidə edirik. Məhz təməli Ulu Öndər Heydər Əliyev tərəfindən qoyulan bu böyük işlər bu gün cənab Prezident İlham Əliyev tərəfindən davam etdirilir. Çox təəssüflər olsun ki, Azərbaycan torpaqları müəyyən bir düşmənlərin təcavüzünə məruz qalıb. Onlar hər zaman çalışırdılar ki, Azərbaycan xalqını parçalasınlar və xalqımızı pərən-pərən salsınlar. Nəhayətdə isə, Ulu Öndər Heydər Əliyev yenidən öz xalqının arzusuna uyğun olaraq qayıtdı və dövlətimizi parçalanmadan, çətin vəziyyətdən xilas etdi. 1993-2003-cü ilə qədər olan müddətdə Ulu Öndər Heydər Əliyev Azərbaycan xalqının gələcək inkişafı və dövlətimizin qüdrətlənməsi üçün ən zəruri addımları atmış oldu. Ümummilli lider Heydər Əliyev siyasətdə və iqtisadiyyatda atmış olduğu böyük uğurlar bu gün də öz bəhrəsini göstərməkdədir. Məhz bu möhkəm təməllərə söykənən Azərbaycan bu gün uğurla addımlayır və öz mövqelərini günü-gündən möhkəmləndirir. Ulu öndər Heydər Əliyevin ən layiqli davamçısı olan cənab Prezident İlham Əliyev bu gün Azərbaycan xalqının və dövlətinin maraqlarını təmin etmək üçün ən prinsipial addımlar atmaqdadır. Eyni zamanda, möhtərəm Prezidentimiz İlham Əliyev bütün dünyaya sübut edir ki, Ermənistan tərəfindən işğal olunan torpaqlar, həqiqətən də, Azərbaycan torpaqlarıdır.

Biz bu gün bir millət kimi yetişməkdə olan gənclərə, ailələrimizdə Ulu Öndərin zəngin irsi barəsində təbliğat aparmalıyıq ki, gələcəkdə də xalqımız ümummilli liderin ideyaları ilə tam əhatə olunsun.

Musa Urud:

- Burada belə bir fikir səsləndi ki, o dövr hakimiyyətdə olanlar ya gənc idilər və başqa cür düşünürdülər. Amma nə tarix, nə də ki, siyasətdə bunu qəbul etmir. Siyasi gücü, siyasi iradəsi, xalqın dəstəyinə arxalanmayan və siyasi peşəkarlığı olmayan adamlar heç vaxt hakimiyyətə gəlməməlidirlər. Bu, ən pis presidentdir ki, o adamlar siyasətlə məşğul olublar. Ən ağrılı hal isə ondan ibarətdir ki, onlar bu gün də bu işlə məşğul olurlar. Eyni zamanda, bunu təsdiq etdi ki, siyasətlə ən yüksək peşəkarlıq səviyyəsində məşğul olmaq lazımdır. Siyasətlə xalqa xidmət etməyi bacaran insanlar məşğul olmalıdır və xalqın dəstəyini qazanan insanlar siyasətə gəlməlidirlər. Yəni, 1992-1993-cü illərin presidenti, bir daha onu göstərmiş oldu ki, xalqın dəstəyinə arxalanmayan heç bir qüvvə hakimiyyətə gələ bilməz. Əgər onlar hansısa bir yolla hakimiyyətə gəlsə, hakimiyyətdə qala bilməzlər. Xüsusən də, keçid dövrü hakimiyyətində səriştəli peşəkar qanunçuluğa riayət edən və xalqını ürəkdən sevən adamlar olmalıdır.

Kamil Seyidov:

- Bu tədbirdə mən ani olaraq o vaxtlar "Səs" qəzetinin Riyaziyyat İnstitutunda yerləşən kiçik bir redaksiyasını xatırladım. Həmin dövrlər Yeni Azərbaycan Partiyası yeni yaradılırdı. Bu proseslər çox çətin bir dövrdə baş verirdi. Aprel ayının 2-də o vaxtkı prezident Əbülfəz Elçibəy tərəfindən fövqəladə vəziyyət elan olunmuşdu. Əslində, bu vəziyyət ancaq həmin ərazidə yaradılmalı idi. Amma təəssüf olsun ki, bu fövqəladə vəziyyət bütün respublikaya şamil edilmişdi. Beləliklə də, bütün ölkə üzrə idarəetmə sırf polis idarələrinin nəzarətinə keçmiş oldu. Yəni, o dövrlər rayonlardan gəlmək və hər hansı bir proselərdə iştirak etmək çox böyük problemlər bahasına başa gəlirdi. 27 apreldə YAP fəallarına qarşı İsgəndər Həmidov başda olmaqla bir sıra qaragüruhçular tərəfindən müəyyən addımlar atıldı. Mən həmin gün "Əlincə" Xeyriyyə Cəmiyyətinin qərargahında idim. Həmin vaxt isə bura cəbhəçilər tərəfindən hərtərəfli nəzarətə götürülmüşdü. Biz oraya daxil olmaq üçün bir sıra çətinliklərlə üzləşməli olurduq. Ona görə də, o dövrün çətinliklərindən Azərbaycan xalqının Ulu Öndəri Heydər Əliyevin böyük şücaəti və səriştəsi naminə qurtularaq, biz bu gün işıqlı gələcəyimizə və firavan həyatımıza qovuşmalı olduq. Həmin dövrlərlə bağlı burada bir sıra fikirlər səsləndirildi və çətinliklər, mövcud problemlər ətraflı sadalandı. Ona görə də, həmin dövrlə bağlı səslənən fikirlərin hər biri nə qədər sadə görünsə də, biz o dövrlərdə bu problemlərin, proseslərin içində olan şəxslər kimi Azərbaycan xalqının nə qədər ağrılı və acılı günlər yaşadığını görmüşük. Həmin dövr müxalifətdə olan Yeni Azərbaycan Partiyasına qarşı AXC-Müsavat iqtidarı tərəfindən böyük təzyiqlər və təpkilər göstərilirdi. Çünki YAP və xalqın böyük əksəriyyəti həmin hakimiyyətin qanunazidd hərəkətlərinə qarşı çıxır və həmin hakimiyyətin eybəcərliklərini ictimaiyyətə bəlli edirdi. Bu baxımdan da, o dövrlər AXC idarə heyətinin üzvləri onların bütün eybəcərliklərini açıqlayan insanlara qarşı çox amansızlıqla yanaşı, bunu dövlətçiliyə qarşı bir hadisə kimi qiymətləndirməyə çalışırdılar.

1993-cü ilin 15 iyunundan sonra Ali Məclisin Sədri seçilən Heydər Əliyev şahmat dəqiqliyi ilə situasiyanı dəyərləndirərək idarə edirdi. Həmin dövrlər ölkə iqtisadiyyatı, demək olar ki, tamamilə dağılmışdı. Dövlətçilikdən heç bir əsər-əlamət qalmamışdı. Müxtəlif qruplara məxsus olan silahlı dəstələr ölkədə hegemonluq edirdilər. Eyni zamanda, AXC və Müsavat cütlüyünün tərkibində olan milli qüvvələrlə yanaşı, antimilli qüvvələr də mövcud idi. Bu qüvvələr isə çalışırdılar ki, Azərbaycan, ümumiyyətlə, bir dövlət olaraq siyasi arenadan silinsin. Onu da qeyd edim ki, 24 iyunda Ali Məclisin sessiyasında o dövr ölkəyə rəhbərlik etmiş Əbülfəz Elçibəyin gizli şəkildə Naxçıvanın Kələki kəndinə qaçması geniş şəkildə müzakirə edildi. Həmin demokratik proseslər də elə buradan başladı ki, prezidentin səlahiyyətlərinin bir qismi alınaraq, Ali Məclisin Sədri Heydər Əliyevə verildi. Çünki Heydər Əliyev o vaxt kifayət qədər xalqın istəyi ilə əhatə olunmuşdu. Sonrakı proseslərdə avqust ayının 29-da ümumxalq referendumu keçirildi və burada da xalqın böyük əksəriyyəti o vaxtkı prezident Ə.Elçibəyi qəbul etmədiyini açıq şəkildə bildirdi. Amma bunun qanuni forması həmin referendumla, yəni 95,2 faiz səslə xalq AXC-Müsavat hakimiyyətinə yox dedi. Bundan sonra, ilk dəfə olaraq, qanuni şəkildə 1993-cü il oktyabr ayının 3-də keçirilən prezident seçkilərində xalq öz Prezidentini seçdi. Onu da qeyd edək ki, müstəqilliyin ilk illərində prezident seçkiləri keçirilirdi. Məhz 1993-cü ildən sonra bu proses ölkə Konstitusiyasına və qanunlarına uyğun olaraq, vaxtında və demokratik şəkildə keçirilməyə başladı. Bundan sonra isə 1995-ci il oktyabrın 12-də ölkə Konstitusiyası qəbul edildi. Heydər Əliyev bununla yanaşı, digər beynəlxalq strukturlu təsisatların Azərbaycanda bərqərar olmasına şərait yaratdı.

Musa Quliyev:

- Burada bir fikir də səsləndi ki, o vaxtlar dövlət çevrilişi nəticəsində hakimiyyət dəyişikliyi baş verdi. Maraqlısı isə budur ki, necə dövlət çevrilişi ola bilərdi ki, 1993-cü ilə qədər Dağlıq Qarabağ prosesləri ilə bağlı bir milyon adam meydana yığışırdı. 1993-cü ilin iyun ayında Ə.Elçibəy öz hakimiyyətini qorumaq üçün xalqa müraciət etdi, lakin 200 nəfər adam tapa bilmədilər ki, Prezident Aparatının ətrafına yığsınlar. Hətta AXC üzvləri belə bu çağırışa reaksiya vermədilər. İkinci bir tərəfdən isə, cəbhə hakimiyyətində təmsil olunan nazirlərin özləri bir-bir qərar verirdilər ki, biz fəaliyyətimizi dondururuq. Eyni zamanda, Ə.Elçibəyin özü Ulu Öndər Heydər Əliyevə telefonla zəng edərək və adamlar göndərərək, xahiş etdi ki, biz bu dövləti idarə edə bilmirik. Məhz bundan sonra xalqın böyük təkidi ilə Bakıya gələn və bütün təhlükələrə baxmayaraq, dövlətin suverenliyi naminə addımlar atan Ulu Öndər Heydər Əliyev Azərbaycanın tam sabit bir durumda idarə edilməsinə nail oldu.

Kamil Seyidov:

- Həmin vaxt hakimiyyətdə təmsil olunan yarıtmaz insanlar bu gün də siyasətlə məşğul olurlar. Onların yerinə səviyyəli bir insan olsaydı, siyasətdən gedərdi.

Musa Quliyev:

- Bu gün isə yeni müstəqil Azərbaycandan danışırıqsa, yeni müstəqil Azərbaycanın da yeni bazar iqtisadiyyatına əsaslanan əhalinin sosial rifahını prioritet tutan bir siyasət mövcud idi. Bu siyasət də ümummilli liderin Azərbaycana rəhbərliyə başladığı gündən elan edilmiş bir siyasət idi. O dövrdən bu dövrə qədər olan proseslərə nəzər salsaq, Azərbaycanın dövlət büdcəsinin həmişə sosialyönümlü büdcə olduğunu müşahidə etmək olur. Heç vaxt mümkün olmayıb ki, Azərbaycanda sosial xərclərə 30 faizdən aşağı pul ayrılsın. Ümumdünya böhranı bütün dünya ölkələrini silkələdiyi dövrdə, yenə də Azərbaycanda sosial xərclər bir qəpik də belə azaldılmadı. Əksinə isə, bu sahədə ayrı-ayrı vaxtlarda artımlar oldu.

Jalə Əliyeva:

- Bu gün müstəqil və güclü Azərbaycan dövləti Ulu Öndər Heydər Əliyev zəkası sayəsində Prezident İlham Əliyevin rəhbərliyi altında günü-gündən öz liderlik mövqelərini gücləndirməkdədir. Artıq istənilən regional və beynəlxalq əhəmiyyətli tədbir və layihələrdə Azərbaycanın mövqeyi olmadan heç bir addım atılmır. Bu da, onu göstərir ki, Ulu Öndərin daim böyük əzmlə yaratdığı qüdrətli Azərbaycan dövləti artıq bütün dünyada öz sözünü deməkdədir.

Lalə Abbasova:

- Prezident İlham Əliyevin rəhbərliyi altında milli-mənəvi dəyərlərimiz, sosial problemlərimiz, demək olar ki, tam həllini tapıb. Bu gün ölkəmizin idman, mədəniyyət, incəsənət, siyasət meydanında özünün layiqli mövqeyi mövcuddur. Çünki dərin köklərə və zəngin idarəçilik prinsiplərinə əsaslanan Ulu Öndər Heydər Əliyev ideyaları çiçəklənən Azərbaycanın gələcək yüzilliklər boyu inkişafını təmin edəcək.

Aydın Hüseynov:

- Ölkəmizin iqtisadi resurslarının güclənməsi, makroiqtisadi göstəricilərin günü-gündən yüksəlməsi, dünyada baş verən bir sıra böhran və təhlükələrə baxmayaraq, Azərbaycan öz inkişafının ən yüksək zirvəsindədir.

TAPDIQ QURBANLI

Səs.- 2010.- 13 iyun.- S. 8-9.