Ulu Öndər Heydər Əliyev xalqımızı bəlalardan qurtardı

15 iyun xalqımızın Qurtuluş Günüdür

Ümummilli lider Heydər Əliyev Azərbaycan xalqını, millətini və bütövlükdə, vətənimizi bəlalardan qurtardı və Azərbaycanın sürətlə inkişafı üçün hər cür şəraitləri yaratdı, həmçinin, bütün sahələrdə ölkəmizin inkişaf etməsinə nail oldu. Xalqımız Ulu Öndər Heydər Əliyevin gördüyü bu yüksək səviyyəli işlərə görə ona borcludur.

Oqtay Sultanov,

ADPU-nun tarix fakültəsinin dekanı:

- Hamıya məlumdur ki, SSRİ dağıldıqdan sonra onun tərkibində olan dövlətlər öz müstəqilliyini qazandı və müstəqilliyin ilk illərində bəzi çətinliklərlə qarşılaşdı. Azərbaycan isə, o illərdə daha ağır vəziyyətə düçar olmuşdu. Bunun səbəbi o vaxtkı hakimiyyətin səriştəsizliyi, qorxaqlığı, siyasi bacarığının olmaması ilə əlaqədar idi. Bu ağır vəziyyətdə xalqımıza Heydər Əliyev kimi dahi siyasətçi, xalqını, millətini sevən, müdrik, siyasi səriştə və böyük iradəyə malik olan insan lazım idi. Ümummilli liderimiz Heydər Əliyev də xalqını və vətənini çox sevdiyi üçün bu ağır vəziyyətdə millətinin köməyinə gəldi. Heydər Əliyev Azərbaycanın başı üstündə olan bütün qara buludları məhv etdi və ölkəmizin bütün sahələrdə inkişaf etməsinə nail oldu. Hər kəsə məlumdur ki, Heydər Əliyev Azərbaycanı çox çətinliklərdən qurtardı. Ölkəmiz elə bir ağır vəziyyətdə idi ki, bu vəziyyətdən Azərbaycanı yalnız Heydər Əliyev çıxara bilərdi. Heydər Əliyevin Azərbaycan üçün, xalqımız və millətimiz üçün etdiyi o qədər böyük, saysız-hesabsız işlər var ki, bunları saymaqla bitirmək olmaz. Ulu Öndərimizin ictimai, siyasi, mədəni və digər sahələrdə apardığı uğurlu işlər güclü, qüdrətli Azərbaycan naminə görülən işlər idi. Heydər Əliyev dünya dövlətlərinin hesablaşacağı, əməkdaşlıq etməyə səy göstərəcəyi güclü bir Azərbaycan dövləti yaratmış oldu. Bu güclü Azərbaycan dövləti bu gün də cənab Prezident İlham Əliyevin apardığı siyasət sayəsində daha da qüdrətlənir.

Xəzər Umarov,

tələbə:

- Mən bir gənc kimi deyə bilərəm ki, biz gənclər Ulu Öndərimiz Heydər Əliyevə hər zaman borcluyuq. Çünki ümummilli liderimiz bizim üçün şanlı, şöhrətli, güclü, qüdrətli Azərbaycan Respublikası yaratdı. Heydər Əliyev xalqımızı pis vəziyyətlərdən, ağır şəraitdən qurtardı. 15 iyun xalqımızın, Azərbaycanın fəlakətlərdən qurtulması günüdür. Bütün gənclər Ulu Öndərimizi hər zaman məhəbbətlə, böyük fəxrlə yad edir. Heydər Əliyev, həmçinin, Azərbaycan xalqının qürurudur. Biz gənclər xarici ölkələrdə olarkən Heydər Əliyevlə bağlı xüsusi qürur keçirir və fəxr hissləri ilə danışırıq. Bizim ümummilli liderimizi təkcə Azərbaycanda deyil bütün dünyada tanıyırlar. Azərbaycan gənclərinin yüksək səviyyədə təhsil almasına, bilikli, savadlı, ağıllı, düşüncəli, intellektual səviyyəsinin yüksək olmasına Heydər Əliyev daim diqqət və qayğı ilə yanaşırdı. Bu, Ulu Öndərimiz Heydər Əliyevin gənclərə inamından irəli gəlirdi.

Zöhrə Muradova,

filoloq:

- Heydər Əliyev bizim hər birimizin yaddaşında hər zaman ən dahi siyasətçi, millətini, xalqını sevən bir insan, müdrik şəxsiyyət kimi qalıb və qalacaq. Ulu Öndər Heydər Əliyev xalqımızın hər bir nümayəndəsinə öz diqqət və qayğısını əsirgəməyib. 15 iyun günü Azərbaycanı Heydər Əliyev dəhşətli bəlalardan qorudu və xalqımıza azadlıq bəxş etdi. O zaman Azərbaycanda mövcud olan hər bir çətin vəziyyət millətimizə bəlli idi. Lakin Heydər Əliyev hakimiyyətə qayıtmaqla Azərbaycan millətinə xoşbəxt günlər bəxş etdi. Heydər Əliyevin dahi siyasətçi olması təkcə bizim ölkəmizə, xalqımıza deyil, bütün dünyaya bəllidir. Böyük dövlətlərin başçıları, siyasi xadimləri ümummilli liderimizə ən yüksək qiyməti vermişlər. Heydər Əliyev Azərbaycanı çox çətin vəziyyətdən qurtarmış oldu. Məhz buna görə də biz ona hər zaman borcluyuq.

Buludxan Xəlilov,

ADPU-nun filologiya fakültəsinin dekanı:

- 15 iyun günü Azərbaycan xalqının tarixində ən önəmli, ən mühüm gündür. Çünki məhz bu gün Heydər Əliyev ölkəmizi, millətimizi bəlalardan qurtardı. Onun siyasi səriştəsi, müdrikliyi, güclü iradəsi, böyük əzmi və millətinə, vətəninə olan sevgisi Azərbaycanı çətin vəziyyətdən qurtardı. Bu gün Azərbaycanın sürətli inkişafının təməlini ümummilli lider Heydər Əliyev qoyub. Heydər Əliyev hakimiyyətə gəlməklə ölkədaxili qarşıdurmalara son qoydu, Azərbaycanın daxilində olan çox çətin problemlərin hamısını həll etdi və ölkəmizin xarici siyasətində, digər dövlətlərlə əlaqələr qurmasında və inkişafında yeni mərhələ yaratdı. 15 iyuna qədər ölkəmiz bütün qonşu dövlətlərlə xoşagəlməz münasibətdə idi, həmçinin, ölkə daxilində özbaşınalıq hökm sürürdü. Azərbaycan elə bərbad bir vəziyyətə düşmüşdü ki, cəmiyyətdə normal insan münasibətlərindən və heç bir sahədə inkişafdan söhbət gedə bilməzdi. Lakin Ulu Öndər Heydər Əliyev öz dahiliyi sayəsində bütün problemləri həll etdi. Xalqa azadlıq bəxş etdi. Heydər Əliyevin apardığı siyasət nəticəsində ölkəmizdə hər bir sahədə - istər siyasi, istər ictimai, istər mədəni və istərsə də digər sahələrdə yüksək səviyyəli işlər görüldü və sürətli inkişafa nail olundu. Ulu Öndərimiz Heydər Əliyevin layiqli davamçısı cənab Prezident İlham Əliyev bu gün ümummilli liderin siyasi kursunu layiqincə davam etdirməklə, ölkəmizin günü-gündən daha da çiçəklənməsinə nail olur.

Zaur Niftaliyev,

müəllim:

- Azərbaycan xalqının başı çox bəlalar çəkib. Amma Heydər Əliyev hakimiyyətə gələndən sonra xalqımıza xoşbəxt, azad günlər qismət oldu. 15 iyun xalqımızın qurtuluş günüdür. Xalqımız ağır vəziyyətlərdən, çətin həyat şəraitindən məhz Ulu Öndər Heydər Əliyevin səyləri nəticəsində qurtuldu. Ümummilli lider Heydər Əliyev öz uzaqgörənliyi ilə Azərbaycan üçün elə bir inkişaf xətti seçdi ki, bu inkişaf xətti bu gün də sürətlə davam edir. Heydər Əliyevin layiqli davamçısı cənab Prezident İlham Əliyev onun siyasi kursuna sadiq qalmaqla, Azərbaycanı daha da inkişaf etdirir. Xalqımız hər zaman Heydər Əliyev siyasi kursunu dəstəkləyib, dəstəkləyir və dəstəkləyəcək. Həmçinin, millətimiz cənab Prezident İlham Əliyevin ətrafında birləşərək, daim Ona dəstək olacaq.

Xalqın xilası və nicatı günü

Bu gün ölkəmizin hər yerində xalqımıza xilas, dövlətimizə qurtuluş bəxş edən ulu öndərimiz Heydər Əliyevin ikinci dəfə hakimiyyətə gəlməsi-15 İyun Milli Qurtuluş Günü münasibətilə geniş tədbirlər keçirilir. Xalq ulu öndərinə öz sevgi və məhəbbətinin hədsiz olduğunu bir daha nümayiş etdirmək üçün şənlik edir, bayram libasına bürünür. Söhbət etdiyimiz "Azərbaycan Fermer" qəzetinin baş redaktoru Nuhəli Kərimov 15 İyun Milli Qurtuluş Gününün xalqın xilası və nicatı günü olduğunu bildirdi: - 1993-cü il iyunun 15-i Azərbaycanın müstəqil dövlət kimi tərəqqisinin başlanğıc günü kimi tariximizə qızıl hərflərlə əbədi həkk olunmuşdur. 15 il əvvəl Azərbaycan xalqının təkidli tələbi ilə hakimiyyətə qayıdan ümummilli liderimiz Heydər Əliyev ömrünün qalan hissəsini də dövlətçiliyimizin qorunması və möhkəmlənməsinə həsr etmiş, müstəqilliyimizin əbədiliyini və dönməzliyini təmin etmişdir. Müstəqilliyimizin ilk illərində hakimiyyətdə olan səriştəsiz rəhbərlərin şəxsi ambisiyaları ucbatından ölkədə xaos, böhran və özbaşınalıq yaranmışdır. Belə bir məqamda xalqın təkidi ilə Bakıya gələn Heydər Əliyevin hakimiyyətə qayıdışından sonra müstəqilliyimizin yenidən itirilməsi təhlükəsinə birdəfəlik son qoyuldu.

Xatırlatmaq yerinə düşər ki, ötən əsrin 90-cı illərinin əvvəllərində Azərbaycan mürəkkəb və ziddiyyətli proseslərin məngənəsində sıxılırdı. Bakıda hakimiyyət uğrunda aparılan savaş cəbhədə torpaqlarımızın itirilməsi ilə nəticələnirdi. İqtisadiyyat tənəzzülə uğrayır, dövlət müstəqilliyimizin məhv olması problemi ortaya çıxırdı. Xalqın sabaha olan inamı isə tamamilə sarsılmışdır. Belə ağır və faciəli günlərdə xalqımız böyük uzaqgörənlik nümayiş etdirərək, ulu öndər Heydər Əliyevi yenidən hakimiyyətə qaytardı. Məhv olmaq həddinə çatmış dövlətçiliyimiz, vətəndaş müharibəsinə sürüklənən xalqımız ulu öndərin uzaqgörənliyi, qətiyyəti və iradəsi sayəsində ağır vəziyyətdən qurtuldu.

Milli Qurtuluş Azərbaycan xalqının xaosdan, özbaşınalıqdan qurtarması, milli dövlətçiliyimizin xilası, nadanlığa və cahilliyə son qoyulması deməkdir. Azərbaycan xalqının azadlığının, müstəqil dövlətçiliyinin müqəddəratının həll edildiyi ən ağır günlərdə ümummilli liderimiz Heydər Əliyevin öz xalqının iradəsinə tabe olaraq, ölkə rəhbərliyinə qayıtması, əslində, Onun müstəqil Azərbaycan Respublikasını, Azərbaycan xalqını, milli azadlıq hərəkatını, qazanılmış tarixi nailiyyətləri məhv olmaqdan xilas etmək kimi çox çətin və şərəfli bir missiyanı qəlbinin hökmü ilə öz üzərinə götürməsi idi. Bu, sözün əsil mənasında, "Ömrümün qalan hissəsini də xalqıma bağışlayıram" deyib meydana atılan geniş ürəkli vətən oğlunun öz xalqı, öz vətəni qarşısında misilsiz fədakarlığı idi. Ulu öndər Heydər Əliyev Azərbaycan üçün, xalqımız üçün çox işlər gördü. Son dərəcə mürəkkəb bir şəraitdə siyasi hakimiyyətə gələn Heydər Əliyev qısa müddət ərzində Azərbaycanı əmin-amanlığın hökm sürdüyü, demokratik təsisatların fəaliyyəti üçün geniş şərait yaradıldığı bir ölkəyə, hərtərəfli əməkdaşlığa hazır olan bir tərəfdaşa çevirdi. Fəlakət qarşısında olan Azərbaycan düşdüyü ağır vəziyyətdən ümummilli liderin əzmi və iradəsi ilə çıxarıldı. Ulu öndər Azərbaycanı dünyaya tanıtdı. Ona görə də, Azərbaycan xalqı öz xilaskarını sevir və onun ruhu qarşısında baş əyir. Nə qədər Azərbaycan xalqı və dövləti var, ulu öndərimiz Heydər Əliyev də yaşayacaq. Onun qurub yaratdığı müstəqil Azərbaycan dövləti dünya birliyində öz layiqli yerini tutmaqda davam edəcək.

Yeri gəlmişkən, onu da vurğulamaq istərdim ki, Azərbaycan xalqı həm də ona görə xoşbəxt xalqdır ki, Onun ümummilli liderimiz Heydər Əliyevin ideyalarını uğurla davam etdirən İlham Əliyev kimi Prezidenti var. Cənab İlham Əliyev xalqa və dövlətə xeyirli, gərəkli əməlləri ilə nəinki Cənubi Qafqazda, ümumiyyətlə, dünyada ən tanınan və qəbul edilən nüfuzlu liderlərdəndir. Birmənalı şəkildə demək olar ki, Azərbaycan xalqı ölkə Prezidenti İlham Əliyevin rəhbərliyi ilə hələ çox uğurlara, nailiyyətlərə imza atacaq. Qısası, Azərbaycan dövlətinin sabahı, bugünü kimi parlaq və uğurlu olacaq.

Cahid SÜLEYMANOV

Səs.- 2010.- 13 iyun.- S. 11.