Xalqın nicat günü

Dünən Goranboy rayon icra hakimiyyəti ilə Yeni Azərbaycan Partiyası Goranboy rayon təşkilatının birgə təşkilatçılığı ilə 15 İyun Milli Qurtuluş Gününün 17-ci ildönümü qeyd olundu. YAP rayon təşkilatının sədr müavini Əzra Həşimova çıxış edərək, bildirdi ki, 15 iyun 1993-cü il müstəqillik tariximizə mühüm mərhələ və dönüş anı kimi daxil olub: "Müstəqil dövlətimizin timsalında ötən illəri təhlil edərkən, bir daha əminliklə söyləmək olar ki, həqiqətən də, tarixin millətə verdiyi şansı yalnız görkəmli tarixi şəxsiyyətlərin iştirakı ilə reallaşdırmaq mümkündür. Bu şərəfli tarixi missiyanı məhz millət atası Heydər Əliyev yerinə yetirdi. 1993-cü ilin keşməkeşli iyun günlərində xalqın xahişi ilə yenidən hakimiyyətə qayıdan Ulu Öndərimiz Gəncədə alovlanan vətəndaş müharibəsinin alovlarını söndürdü, qardaş qırğınının qarşısını aldı və millətini bütün bəlalardan hifz edib qorudu".

Ə.Həşimova onu da vurğuladı ki, dövlət o vaxt güclü və yenilməz olur ki, onun xalqının birliyi, yekdilliyi təmin edilsin: "Məhz "Heydər-Xalq" birliyi və yekdilliyi sayəsində Azərbayanda sabitlik, əmin-amanlıq bərqərar oldu, dövlət çevrilişi cəhdlərinin qarşısı qətiyyətlə alındı, hakimiyyətə silah gücünə gəlmək kimi təhlükəli ənənəyə birdəfəlik son qoyuldu. Bu gün ümummilli liderimizin siyasi kursu, Onun layiqli siyasi varisi, Azərbaycanın və regionumuzun yeni parlaq lideri, Prezident İlham Əliyev Ulu Öndərimizin bizə miras qoyduğu müstəqil Azərbaycanı daha da inkişaf etdirir".

Tədbirdə çıxış edən Goranboy rayon icra hakimiyyəti başçısının müavini Elçin İsmayılov bildirdi ki, müasir tariximizə Milli Qurtuluş Günü kimi yazılan 15 iyun 1993-cü il tariximizdə və taleyimizdə oynadığı ən yaddaqalan ildir: "17 il tarix üçün bəlkə də bir ana bərabərdir, çoxəsrlik salnamənin bir səhifəsidir. Lakin bu səhifənin hər bir sətri böyük mübarizələrdən, talatümlərdən, ağrı-acılı və sevincli anlardan, xalqımızın müdrik oğlu Heydər Əliyevin titanik fəaliyyətindən xəbər verir".

Tədbirdə çıxış edən Müşfiq Sadıqov, Tural Cabbarov, Ziya Şükürov, Gündüz Hacıyev və başqaları bildirdilər ki, XX əsrin Azərbaycana bəxş etdiyi şəxsiyyət Heydər Əlirza oğlu Əliyev olmuşdur. Bu şəxsiyyətin gördüyü işlərin miqyasını bu gün ölçmək o qədər də asan deyil. Bu möhtəşəmliyin miqyasını isə bu gün Ulu Öndər Heydər Əliyev siyasi kursunun layiqli davamçısı Prezident İlham Əliyev uğurla davam etdirir.

RƏFİQƏ HÜSEYNOVA

Səs.- 2010.- 13 iyun.- S. 13.