Azərabaycanda müstəqil mətbuat formalaşıb

Ulu öndər Heydər Əliyevin mətbuatın inkişafında yaratdığı və gördüyü işlər əvəzsizdir

Mətbuatın yubleyinin 135 illiyi ilə əlaqədar ölkə ərazisində bir çox tədbirlər keçirilir. Mətbuatın hazırkı vəziyyəti və dəyəri haqqında mətbuatla sıx əməkdaşlıq edən millət vəkillərinin eləcə də, baş redaktorların dəyərli fikirlərini öyrəndik.

Millət vəkili Jalə Əliyeva :

- Azərbaycan Prezidenti İlham Əliyev tərəfindən mətbuatın 135 illiyi ilə əlaqədar verdiyi Sərəncam, təbii ki, mətbuat üçün çox önəmli bir proses olmuşdur. Yaxın tariximizi səhifələsək, görərik ki, mətbuatın inkişafında ulu öndər Heydər Əliyevin böyük rolu olmuşdur. Bu gün Azərbaycan mətbuatı müstəqil, liberal, senzuradan uzaq, demokratik bir ölkəyə yaraşan səviyyədədirsə, bu, məhz ulu öndər Heydər Əliyevin sayəsində yaranmışdır. Ulu öndər Heydər Əliyevin mətbuat üçün gördüyü işlər əvəzsizdir. Məhz ulu öndərin hakimiyyətə gəlişindən sonra, kütləvi informasiya vasitələrinə xüsusi diqqət ayrılmışdır. Bildiyimiz kimi o dövrlərdə mətbuat sahəsinə ciddi dəstək verildikdən sonra, mətbuat vasitələri vergilərdən azad edilmişdi. Qəzetlərin "Azərbaycan" nəşriyyatına olan borcları ləğv edilmiş, mətbuata tətbiq edilən senzura aradan qaldırılmışdır. Bu da ulu öndərimizin mətbuata olan qayğısının bariz nümunəsidir. Xatırlayaq ki, ulu öndər tez-tez mətbuat işçilərinin vəziyyəti ilə maraqlanırdı. Hətta vaxt tapdıqca onlarla görüşlər keçirirdi. Təbii ki, bu diqqət ulu öndər Heydər Əliyevin mətbuata olan qiymətli hədiyyəsi idi. Onu da qeyd edim ki, ulu öndərin layiqli davamçısı olan cənab Prezident İlham Əliyev mətbuata qayğısını yüksək səviyyədə davam etdirməkdədir. 135 illiyini qeyd etdiyimiz Azərbaycan mətbuatı yaxın gələcəkdə daha da inkişaf edəcək və güclənəcəkdir.

"Olaylar" qəzetinin baş redaktoru Yunus Oğuz :

- Cənab Prezidentin mətbuatın inkişafına dəstəyi, təbii ki, xoş hadisədir. İmzalanan Sərəncamın mətbuatın inkişaf prosesini daha da sürətləndirəcəyinə heç bir şübhə yoxdur və ola da bilməz. Milli mətbuat gününü mətbuat işçilərinin bayramı da hesab etmək olar. Təəssüf ki, bu gün mətbuatımz bir neçə sahəyə bölünüb. Hətta iqtidar ilə barışmaz mövqe seçən bir neçə qəzetin demokratiya pərdəsi altında məqsədyönlü fəaliyyəti dövrümüzün reallığıdır. Lakin buna baxmayaraq, cənab Prezidentin yaratdığı Fond və Mətbuat Şurası tam obyektiv şəkildə işini davam etdirir. Təbii ki, hazırda Azərbaycan mətbuatının inkişafı üçün ideal bir şərait vardır. Bu səbəbdən biz "Olaylar" qəzeti olaraq, inanırıq ki, mətbuatın 135 illiyi lazımi səviyyədə keçiriləcəkdir.

"Reytinq" qəzetinin baş redaktoru Afiq Mirzəbəyli :

- Cənab Prezidentin bu Sərəncamı mətbuat sahəsinin inkişafına çox müsbət təsir göstərəcəkdir. Əlbəttə, hazırda mətbuatımızın vəziyyəti superdövlətlərlə ayaqlaşacaq dərəcədə güclü olmasa da, yaxın gələcəkdə onlardan qat-qat güclü olmaq ehtimalı var. Çünkü cənab Prezidentin Sərəncamı bu inkişaf prosesini, sözün əsil mənasında, gücləndirəcəkdir. Bildiyimiz kimi, mətbuat günü ilə əlaqədar müəyyən müsabiqələr keçirilir. Təbii ki, bu müsabiqələr bir çox mətbuat işçilərinin fəaliyyətinə müsbət təsirini göstərəcəkdir. Onu da qeyd edək ki, Prezident yanında KİV-lərin İnkişafına Dövlət Dəstəyi Fondunun yaranmasını da böyük nailiyyət kimi dəyərləndirmək olar. Bu fond bir çox mətbuat orqanlarına dəstək vermişdir. Bütün bu tədbirlərin keçirilməsi, ümumilikdə, mətbuat sahəsinin inkişafını təmin edəcəkdir.

Bəxtiyar

Səs.- 2010.- 19 iyun.- S. 8.