Azərbaycan xalqı qüdrətli orduya malikdir

Azərbaycan Respublikası Silahlı Qüvvələrinin yaradılmasının 92-ci ildönümü münasibətilə YAP Gənclər Birliyinin tədbiri keçirildi

Dünən Nəsimi rayon təşkilatında Azərbaycan Respublikası Silahlı Qüvvələrinin yaradılmasının 92-ci ildönümü münasibətilə YAP Gənclər Birliyinin tədbiri keçirildi.

Tədbiri giriş sözü ilə açan YAP Gənclər Birliyini sədr müavini Zəfər Quliyev gəncləri ordu günü münasibəti ilə təbrik edərək, bildirdi ki, bu gün ölkəmizdə əsası ümummilli lider Heydər Əliyev tərəfindən qoyulan ordu quruculuğu prosesi Azərbaycan Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə uğurla və sürətlə davam etdirilir. Orduya qayğı, silahlı qüvvlərlə xalqın əlaqəsi daim diqqət mərkəzindədir. Ordu quruculuğu ilə bağlı strateji xəttin dövlət siyasətinin prioritet istiqamətlərindən biri olduğunu vurğulayan natiq qeyd etdi ki, orduda islahatların aparılması və hərbi hissələrin maddi-texniki bazasının möhkəmləndirilməsi dövlətimizin başçısının daim diqqət mərkəzindədir.

Tədbirdə çıxış edən YAP Gənclər Birliyinin sədr müavini Bəxtiyar Əsgərov bildirdi ki, torpaqlarımızın 20 faizindən çoxu erməni separatçılarının işğalı altındadır: Bu gün Azərbaycan Ordusu gündən-günə güclənir. Azərbaycanda ordu quruculuğu prosesi çox uğurla gedir ki, bu da hərbi gücümüzü artırmağa şərait yaradır. Ordu quruculuğu hər bir ölkə üçün çox önəmli məsələdir. Xüsusilə, müharibə şəraitində yaşayan ölkə üçün bu, prioritet olmalıdır". Azərbaycanda ordu quruculuğu ən prioritet məsələlərdən biri olduğunu vurğulayan B.Əsgərov qeyd etdi ki, uzun illərdir ki, torpaqlarımız işğal altındadır. Azərbaycan gəncliyi hər an torpaqlarımızı düşmən tapdağından azad etməyə hazırdır. Çünki dövlətimiz güclü orduya malikdir. Bu gün Azərbaycan Ordusunun səviyyəsi çox yüksəkdir.

B.Əsgərov onu da bildirdi ki, iyunun 24-də Azərbaycan Respublikası Silahlı Qüvvələrinin yaradılmasının 92-ci ildönümü münasibətilə Müdafiə Nazirliyinin, Dövlət Sərhəd Xidmətinin və Daxili İşlər Nazirliyinin Daxili Qoşunlarının birləşmə və hissələrinin irimiqyaslı birgə əməliyyat-taktiki təlimi keçirilmişdi. Azərbaycan Prezidenti, Silahlı Qüvvələrin Ali Baş Komandanı İlham Əliyev bölmələrin, hissələrin və silah sistemlərinin taktiki döyüş tətbiqini əhatə edən təlimin əsas mərhələsini izləmişdi. Prezident İlham Əliyev xüsusi təyinatlıların döyüş fəaliyyətinin nümayişinə baxmış, sonra dövlətimizin başçısı hərbi texnika və silah nümunələri ilə tanış olmuşdu. Bütün bunlar orduya olan dövlət qayğısının təzahürüdür.

YAP Gənclər Birliyi İdarə Heyətinin üzvü Emin Həsənli, YAP Gənclər Birliyinin sədr müavini Samirə Quliyeva, YAP Nərimanov rayon təşkilatı Gənclər Birliyinin sədri Yusif Babanlı və başqaları çıxış edərək, Azərbaycan Respublikası Silahlı Qüvvələrinin yaradılmasının 92-ci ildönümü münasibətilə gəncləri təbrik edərək, onlara uğurlar arzuladı. Qeyd olundu ki, bu gün 2010-cu ilin bütün hərbi xərcləri Azərbaycanda 2 milyard 150 milyon dollara bərabərdir ki, bu da Ermənistanın bütün dövlət büdcəsindən çoxdur.

YAP Nəsimi rayon təşkilatının sədri, partiyanın Siyasi Şurasının üzvü, Milli Məclisin deputatı Məlahət Həsənova çıxış edərək bu ərəfədə bir neçə hərbi qulluğa çağırılmış gənclərə öz tövsiyələrini verərək, onlara hərbi xidmətdə uğurlar arzuladı. Onlara əsil vətənpərvər olmağı və Vətənin keşiyində layiqincə durmağı tövsiyə etdi.

Tədbirin sonunda YAP Gənclər Birliyi adından Azərbaycan Respublikasının Prezidenti, Silahlı Qüvvələrinin Ali Baş Komandanı, Zati-Aliləri cənab İlham Əliyevə müraciət qəbul olundu.

ZÜMRÜD

Səs.- 2010.- 26 iyun.- S. 8.