Uşaqların sevimli
qəhrəmanlarının yaradıcısı
Qəhrəmanlarına - kuklalara nəfəs verib
onları canlandıran sənətkarın sənət tərcümeyi-halı
Tanrı sevgisi, istək,
həvəs sənət zirvəsində hansısa uğurun əldə
etməsinə gətirib çıxarır. Təbii ki, sənət,
səhnə zərif və həssas olduğu qədər də
çətin və mürəkkəbdir, məsuliyyətlidir.
Azərbaycan səhnəsində bu və ya digər keyfiyyətləri
özündə yaşadan simalar kifayət qədərdir. Belə
simalardan biri də Azərbaycan Dövlət Mədəniyyət
və İncəsənət Universitetinin dram və kino aktyorluğu
fakültəsinin məzunu olan və Abdulla Şaiq adına Azərbaycan
Dövlət Kukla Teatrında aktrisa kimi çalışan
Tamella Bünyadovadır. Onun ilk sənətə sevgisi elə
debütün 1976-cı ildə oynadığı
"Cırtdan" tamaşasındakı rolundan
başlanıb. Tamella xanım həyatda çox ciddi, bəzi
hallarda isə insana monoton təsir bağışlayan bir
aktrisadır. Lakin o, bu və ya digər obrazların ərsəyə
gəlməsində rəngarəng xarakterlər yaratmaq
potensialına malik aktrisadır. Demək olar ki, bu teatrın
sevilən xanımı Tamella Bünyadovanın yaradıcılığının
əsas leytmotivi sənətə həvəsi, zəhmətkeşlik
üzərində qurulmuşdur. Tamella xanım Kukla
Teatrında 33 illik şərəfli yaradıcılıq yolu
keçmiş, teatr salnaməsinə öz imzasını
atmış, özünəməxsus lirik, dramatik, zəngin,
fitri istedada malik bir sənətkardır. Bu deyilən fikirlərdən
çıxış edərək, belə qənaətə
gəlmək olar ki, uşaq yazıçılarının
böyük bir qismi öz əsərlərinin səhnə
uğruna görə Tamella xanıma minnətdar
olmalıdırlar. Çünki onların qələmə
aldıqları bir çox obrazlar aktrisanın ifasında
canlı şəkildə öz əksini tapmışdır.
Tamella xanım uşaqların maraq dairəsini bilmək,
duymaq, zövqünü düzgün istiqamətləndirmək,
onların vətən sevgisi ilə və vətənə məhəbbət
uğrunda tərbiyə edilməsi baxımından
yaradıcılıq potensialına malik sənətkardır.
Onun yaradıcılığını bir-birindən
maraqlı, rəngarəng edən yaratdığı
obrazlardır ki, onların da hər biri uşaqların məhz
düşüncəsinə uyğun bir şəkildə təqdim
olunur. Tamella xanım uzun illərdən bəri təsvir edilən
qəhrəmanlara - kuklalara öz yüksək aktyorluq sənəti
vasitəsilə nəfəs verən, onları canlandıran
yaradıcı şəxs kimi uzun illərin yolunda
özünün dəsti-xəttini yarada bilmişdir. Onun
uğurları sırasında qeyd etməliyik ki, 1988-ci ildə
Əbdürrəhim bəy Haqverdiyevin "Pəri Cadu" əsərinin
tamaşasında oynadığı Hafizə xanım
obrazı "Ən yaxşı qadın rolu"
mükafatına layiq görülüb. Aktrisa bir sıra beynəlxalq
teatr festivallarında iştirak etmiş, xarici ölkələrin
qastrol səfərlərində olmuşdur. O, demək olar ki,
teatrın repertuarındakı bütün tamaşalarda məharətlə
çıxış etmiş, tamaşaçıların
sevimli aktrisasına çevrilmişdir. Onun
yaratdığı səhnə obrazları sırasında Aytək
("Cunquş"), Şərəbanı ("Parisi
dağıdanlar"), Div xala ("Od oğlan"), Dadaş
("Sehirli güzgü") və s. rolları
yaradıcılığının əsas
güzgüsüdür. Hazırda teatrda nümayiş etdirilən
"Məlikməmməd"də Böyük qardaş, Təlxək,
Qız, Simurq quşu, "Cırtdan"da Cırtdan,
"Çippolino"da Şahzadə oğlan, Limon,
"Düməcik"də Köstəba, Qurbağa
balası, "Bremen musiqiçiləri"ndə Şahzadə
qız və s. uğurlu rollarıdır. Tamella xanımın
yaratdığı bir sıra rollar teatrın qızıl
fonduna daxil edilmişdir. Peşəkarlıq qabiliyyətini
tamaşadan-tamaşaya daha da təkmilləşdirən bir
aktrisa kimi uşaqlar tərəfindən sevilir. Tamella
Bünyadovanın yaradıcılıq axtarışları
davam edir. Eyni zamanda, o, truppa müdiri, həmkarlar təşkilatının
sədri kimi teatrın yaradıcı və ictimai həyatında
yaxından iştirak edir. 60 yaşını qeyd edən
Tamella xanımın yaradıcılıq uğurları və
axtarışları onun sənət naxışına öz
yeni səhifələrini yazacaq.
Zümrüd
Səs.- 2010.- 2 mart.- S. 12.