Vaqif Mustafazadənin 70 illik yubileyinə həsr edilmiş konfrans keçirilib

Bakı Musiqi Akademiyasının Caz Mərkəzində əməkdar artist, dövlət mükafatı laureatı, Azərbaycan caz musiqisinin banilərindən biri Vaqif Mustafazadənin 70 illik yubileyinə həsr edilmiş konfrans keçirilib.

Konfransda Üzeyir Hacıbəyli adına Bakı Musiqi Akademiyasının prorektoru, fəlsəfə elmləri doktoru Gülnaz Abdullazadə orijinal ifaçılıq üslubuna malik olan Vaqif Mustafazadənin həyat və yaradıcılığı haqqında məlumat verib.

V.Mustafazadə 1940-cı ildə Bakıda doğulmuşdur. O, Asəf Zeynallı adına Bakı Musiqi Məktəbini bitirmişdir. Gürcüstan Dövlət Filarmoniyasında ilk "Qafqaz" caz triosunu yaratmışdır.

İstedadlı pianoçu "Tallinn-66", "Tbilisi-78" ümumittifaq caz festivallarının laureatı olmuşdur. O, "Leyli" adlı ilk qadın vokal kvartetini, "Sevil" və "Muğam" vokal instrumental ansambllarını yaratmış və onlara rəhbərlik etmişdir.

Xalq artisti Tofiq Bakıxanov, əməkdar incəsənət xadimi, sənətşünaslıq doktoru İmruz Əfəndiyeva Azərbaycan muğamlarını ənənəvi caz texnikası ilə birləşdirib muğamla cazın sintezini yaradan V.Mustafazadənin yaradıcılıq yolundan söhbət açıblar. Bildirilmişdir ki, 1978-ci ildə görkəmli musiqiçi Monakoda keçirilən VIII beynəlxalq caz müsabiqəsində birinci mükafata layiq görülmüşdür.

V.Mustafazadə yaradıcılığının məhsuldar dövründə - 1979-cu il dekabrın 16-da Daşkənddə səhnədə çıxış edərkən, 39 yaşında dünyasını dəyişmiş, Bakıda dəfn olunmuşdur.

Bildirilmişdir ki, hazırda böyük musiqiçinin yaradıcılıq yolunu onun qızı, beynəlxalq müsabiqələr laureatı, virtuoz pianoçu, vokalçı Əzizə Mustafazadə və Azərbaycan caz məktəbinin yetirmələri davam etdirirlər.

Tədbirin sonunda Rəna Talıbovanın rəhbərliyi ilə "Retro-Sevil" vokal instrumental ansamblı, Arif Cahangirovun rəhbərliyi ilə saksofonçular qrupu V.Mustafazadənin əsərlərindən parçalar ifa ediblər.

Zümrüd

Səs.- 2010.- 17 mart.- S. 12.