Azərbaycanda yüksək iqtisadi inkişaf mövcuddur

Aydın Hüseynov: "Aparılan iqtisadi siyasətin əsas məqsədi əhalinin həyat səviyyəsinin daha da yaxşılaşdırılmasına xidmət edir"

“Azərbaycan Prezidenti İlham Əliyev tərəfindən uğurla davam etdirilən siyasət nəticəsində ötən illərdə makroiqtisadi sabitlik qorunub saxlanılıb, iqtisadiyyatın diversifikasiyası, qeyri-neft sahələrinin, regionların inkişafı sürətlənib, strateji valyuta ehtiyatlarının səmərəli istifadəsi təmin olunub, milli valyutanın sabitliyi, bank sisteminin etibarlılığı artırılıb, konservativ xarici borclanma strategiyası həyata keçirilib, sahibkarlığa dövlət dəstəyi gücləndirilib, əhalinin sosial rifah göstəriciləri davamlı olaraq yaxşılaşıb" deyən YAP Siyasi Şurasının üzvü, Qaradağ rayon təşkilatının sədri, iqtisadçı Aydın Hüseynov bunun nəticəsində 2004-2008-ci illər ərzində ümumi daxili məhsulun həcmində 2,6 dəfə artım olduğunu və bunun da 1990-cı ilin səviyyəsindən 2 dəfə artıq olduğunu bildirib. Qeyd edib ki, əhalinin pul gəlirlərinin ümumi artımı inflyasiyanı 1,8 dəfə üstələyib, yoxsulluq səviyyəsi 11 faizə enib, ölkədə 840 mindən çox yeni iş yeri açılıb, xarici borcun ÜDM-ə nisbəti 7,9 faiz olub. "Neft sektorunda ümumi daxili məhsul istehsalı 14 faizdən çox, qeyri-neft sektorunda isə 3 faizdən artıq yüksəliş olub. Ölkəmizdə adambaşına düşən əlavə dəyər isə 2008-ci ildəkindən 7,9 faiz artıqdır. Sənaye müəssisələrində istehsal olunun məhsulun dəyəri ötən illə müqayisədə 8,6 faiz artıb. Ötən il əhaliyə satılmış və pullu xidmət sahələrində də artım müşahidə olunub ki, bu da ölkədə gedən davamlı iqtisadi siyasətin bariz nümunəsidir. Eyni zamanda, ticarət şəbəkəsindən satılan əmtəələrin müqayisəli qiymətlərlə dəyərində də artım müşahidə olunub. Pullu xidmətlərin həcmində də xeyli dərəcədə artım qeydə alınıbdır"- deyən A.Hüseynov ötən illərdə əldə edilən bu müsbət göstəricilərin əsası Prezident İlham Əliyevin dediyi kimi, düzgün düşünülmüş sosial-iqtisadi islahatların uğurla reallaşdırılması ilə bağlı olduğunu bildirdi. "Bütün bunlarla yanaşı, ölkəmizin qarşısında duran bütün vəzifələri həll etmək üçün Azərbaycanda hər cür imkan vardır" deyən təşkilat sədri iqtisadi sahə ilə yanaşı, siyasətdə də əldə edilən uğurların məhz bu yüksək iqtisadi göstəricilərə böyük təsirinin olduğunu bildirdi. Vurğuladı ki, bu gün ölkəmizdə sahibkarlıq iqtisadiyyatın aparıcı qüvvəsinə çevrilib, özəl sektorun ÜDM-də xüsusi çəkisi artıb. "Yaradılan əlverişli biznes mühiti nəticəsində iqtisadiyyata qoyulmuş investisiyaların həcmi 70 milyard dolları ötüb ki, bunun da yarısı yerli investisiyaların payına düşür. Xüsusilə, son dövrlərdə dünyada gedən qlobal proseslər ölkəmizin dayanıqlığını və onun regional güc mərkəzi kimi formalaşdığını bir daha sübut edir. Dünyanın aparıcı ölkələrində gedən kəskin iqtisadi böhrana baxmayaraq, Azərbaycan Prezidenti İlham Əliyev tərəfindən aparılan uğurlu siyasət nəticəsində Azərbaycanda makroiqtisadi sabitlik, iqtisadi artım, yoxsulluq səviyyəsinin azalması və əhalinin maddi rifah halının yüksəlməsi də davam edir" - deyən YAP Siyasi Şurasının üzvü Azərbaycanın uğurlarının nüfuzlu beynəlxalq iqtisadi-siyasi təşkilatların hesabatlarında da öz əksini tapdığını qeyd edib. "Təsadüfi deyil ki, Dünya Bankı və Beynəlxalq Maliyyə Korporasiyası tərəfindən hazırlanan "Doing Business 2009" hesabatında Azərbaycan biznes mühitinin yaxşılaşdırılması sahəsində ən islahatçı ölkə elan edilib deyən" A.Hüseynov "Doing Business 2010" hesabatında da ölkəmizin öz mövqelərini qoruyub saxladığını bildirdi. 2009-2010-cu illər üçün hazırlanmış "Qlobal Rəqabətlilik Hesabatı"nda da Azərbaycan 18 pillə irəliləyərək, 133 ölkə arasında 51-ci yerə, MDB ölkələri arasında isə 1-ci yerə yüksəldiyini bildirən iqtisadçı, bütövlükdə, Azərbaycan iqtisadiyyatının gələcək inkişafı ilə bağlı beynəlxalq təşkilatların proqnozlarının nikbin olduğunu bildirib. "İqtisadiyyatımızın bugünkü vəziyyətinin keçid proqramının əsas məqsədlərinə həm forma, həm də məzmun etibarilə nail olunduğunu və keçid dövrünün başa çatdığını təsdiqləyir" deyən A.Hüseynov ölkəmizdə bazar iqtisadiyyatı üçün səciyyəvi qanunvericilik bazasının yaradıldığını da dilə gətirib. "İqtisadiyyatda mülkiyyətin çoxnövlülüyünün təmin olunması dövlət mülkiyyətinin özəlləşdirilməsinin həyata keçirilməsi və dövlət, özəl və bələdiyyə mülkiyyətinin fəaliyyəti üçün rəqabətin yaranmasına imkan verir. Özəl sektorun xüsusi çəkisinin sənayedə artması, tikintidə, kənd təsərrüfatında, ticarətdə, nəqliyyatda, rabitədə, sosial və sair xidmətlərdə artım meyillərinin yüksəlməsinə səbəb olub. Eyni zamanda, dövlətin iqtisadiyyata müdaxiləsi minimuma endirilib, bazar institutları formalaşdırılıb və xarici iqtisadi fəaliyyət liberallaşdırılıb. Makroiqtisadi sabitliyin qorunub saxlanılması qarşıya əsas məqsəd kimi qoyulub" - deyən A.Hüseynov artıq keçid dövrünün başa çatması ilə əlaqədar sosial-iqtisadi inkişafın yeni mərhələsinin də başlanıldığını bildirib. Bu mərhələnin əsas hədəflərinin də artıq müəyyən edildiyini bildirən təşkilat sədri makroiqtisadi sabitliyin qorunub saxlanılmasının qarşıya əsas məqsəd kimi qoyulduğunu vurğulayıb. "Bütün bunlara yanaşı, ölkənin enerji, ərzaq və ekoloji təhlükəsizliyin daha da gücləndirilməsi üçün sistemli tədbirlər davam etdirilir. Eyni zamanda, iqtisadi artımın keyfiyyətinin prioritetliyinin təmin edilməsi nəzərdə tutulur. Bu məqsədlə iqtisadiyyatın diversifikasiyası genişləndirilməklə neft sektorundan asılılıq minimuma endiriləcək, innovativ iqtisadiyyata keçid təmin ediləcək. Bundan sonra isə aqrar sektorun inkişafı intensiv üsullara üstünlük verilərək və iqtisadiyyatın klasterlər üzrə inkişafına nail olmaq mümkünləşəcək" - deyən A.Hüseynov qarşıdakı müddətdə ölkədə yoxsulluğun səviyyəsinin iki dəfə azalacağına, biznes mühitinin daha da təkmilləşdirilməsinə, xüsusi iqtisadi zonaların, sənaye şəhərciklərinin, biznes-inkubatorlarının yaradılmasına, məsləhət-informasiya təminatının, sahibkarlığa dövlət dəstəyinin gücləndirilməsi və işgüzar əlaqələrin inkişaf etdirilməsi yolu ilə sahibkarlığın və regionların iqtisadi inkişafının sürətlənəcəyinə əminliyini ifadə edib. Eyni zamanda, növbəti illərdə də sosial-iqtisadi siyasətin ana xəttinin əhalinin həyat səviyyəsinin daha da yüksəldilməsinə xidmət edəcəyini bildirən A.Hüseynov Azərbaycanın malik olduğu keyfiyyətlərin bütün dünyada liderliyini təmin etməyə imkan verdiyini söyləyib.

Tapdıq QURBANLI

Səs.- 2010.- 17 mart.- S. 8.