Ulu öndər Heydər Əliyev - 87

May ayının 10-da ulu öndər Heydər Əliyevin anadan olmasının 87-ci ildönümüdür. Müstəqil Azərbaycanımızın qurucusu və xilaskarı olan dahi şəxsiyyət hər zaman Azərbaycan xalqı tərəfindən böyük məhəbbət və hörmətlə yad edilir. Çünki Onun dövlətçiliyimizin inkişafı və tərəqqisi istiqamətində atdığı addımlar təqdirəlayiqdir. O, Azərbaycanın hərtərəfli inkişafı, onun müxtəlif sahələrdə nailiyyətlər əldə etməsi üçün genişmiqyaslı islahatlar həyata keçirib. Məhz həmin islahatların nəticəsidir ki, bu gün Azərbaycan xalqı yüksək rifah halına malikdir. Qeyd edim ki, bu əlamətdar gün hər bir azərbaycanlı üçün əzizdir. "Səs" qəzetinə açıqlama verən ölkə siyasətçiləri, ziyalıları və millət vəkilləri ümummilli liderin misilsiz xidmətlərindən söhbət açdılar. Onun müstəqil Azərbaycanın təməl prinsiplərinin möhkəmlənməsi yönündə atdığı addımları yüksək qiymətləndirdilər.

"ULU ÖNDƏR HEYDƏR ƏLİYEV SİYASİ FƏALİYYƏTİ İLƏ ÖZÜNÜ İCTİMAİ YADDAŞA YAZA BİLDİ"

Yeni Azərbaycan Partiyasının (YAP) Binəqədi rayon təşkilatının sədri Nəbi Xəlilov:

- May ayının 10-da bütün ömrünü xalqına, dövlətinə həsr etmiş müasir Azərbaycan dövlətinin banisi ümummilli lider Heydər Əliyevin anadan olmasının 87-ci ildönümüdür. 1969-cu ildə ulu öndər Heydər Əliyevin Azərbaycanda ilk dəfə rəhbərliyə gəlməsinə qədər ölkədə bütün sahələrdə boşluqlar var idi. Özbaşınalıq, korrupsiya, sosial-iqtisadi gerilik ölkədə hərc-mərclik yaratmışdı. Bu baxımdan, ulu öndər Heydər Əliyevin hakimiyyətə gəlişi ilə respublikamızda mövcud olan bütün problemlər aradan qaldırıldı. Belə ki, O, rəhbərliyə gəldikdən sonra dövlət əhəmiyyətli tədbirlərdə çıxışlarını Azərbaycan dilində etməyə başladı. Bununla da ümummilli lider Heydər Əliyev Azərbaycan dilini dövlət dili səviyyəsinə qaldırmaqla, 1978-ci ildə Konstitusiyada bunun təsbit olunmasına real zəmin yaratdı. Əlbəttə ki, Onun bu addımı ölkədə yüksək əhval-ruhiyyə ilə qarşılandı.

Ümummilli lider Heydər Əliyevin böyüklüyü onda idi ki, O, vəzifəsindən istefa verdikdən sonra Azərbaycanın problemləri ilə yaxından tanış olurdu və lazımi köməklikləri göstərirdi. Hətta 1990-cı ilin qanlı yanvar faciəsi törədilərkən, Azərbaycanın Moskvadakı nümayəndəliyinə gələrək, qırğın törədənlərin cəzalandırılmasının vacibliyini bildirdi. Müstəqillik əldə edildikdən sonra da ulu öndər Heydər Əliyev Naxçıvanda Azərbaycan xalqının gələcəyi naminə vacib addımlar atdı. O zaman hakimiyyətə gələn səriştəsiz siyasətçilər yarıtmaz idarəçiliklərilə dövləti uçurum kənarına atmışdılar. Məhz həmin vaxt 91 ziyalı ulu öndər Heydər Əliyevə müraciət ünvanladı. Daha sonra ziyalılar partiya yaradılması təşəbbüsü ilə çıxış etdilər. Bu məsələ ilə bağlı Naxçıvanda ulu öndər Heydər Əliyev bir qrup ziyalını qəbul etdi. Sonradan Yeni Azərbaycan Partiyasının təsis konfransı keçirildi, ulu öndər Heydər Əliyev partiyanın Sədri seçildi.

Həmin dövrdən bu günə qədər xalqla sıx təmasda olan YAP zirvələrə - uğurlara doğru inamla addımlayır. Bir sözlə, ümummilli lider Heydər Əliyevdən əvvəl və sonra gəlmiş rəhbərlər hər hansı bir fəaliyyətilə özlərini ictimai yaddaşa yazdıra bilməmişdilər. Amma ulu öndər Heydər Əliyev siyasi fəaliyyəti ilə özünü ictimai yaddaşa yaza bildi. Bu gün isə Heydər Əliyev yolunu uğurla davam etdirən Prezident İlham Əliyev Azərbaycanı dünya dövlətləri sırasında birincilər pilləsinə yüksəldib.

"ULU ÖNDƏR HEYDƏR ƏLİYEVİN SAYƏSİNDƏ BU GÜN MÜSTƏQİL AZƏRBAYCAN YAŞAYIR, SÜRƏTLƏ İNKİŞAF EDİR"

Millət vəkili Əkrəm Abdullayev:

- Ulu öndər Heydər Əliyevin Azərbaycana rəhbərliyi dövründəki ictimai-siyasi fəaliyyəti haqqında ən yüksək sözləri söyləsək, təbii ki, bu dövrləri tam əhatə edə bilmərik. Ulu öndərin məhz bu dövrlərdə bütün sahələrdə həyata keçirdiyi tədbirlərinin, dövlət proqramlarının, əsasını qoyduğu uğurlu siyasətin nəticəsidir ki, bu gün müstəqil Azərbaycan yaşayır, sürətlə inkişaf edir. Ulu öndər Heydər Əliyevin əsasını qoyduğu siyasət, strategiya ulu öndərin layiqli davamçısı, ölkə Prezidenti İlham Əliyev tərəfindən bu gün yüksək səviyyədə həyata keçirilir. Artıq hər kəs etiraf edir ki, Azərbaycan dünyada böyük sürətlə inkişaf edən lider dövlətdir. Regionların sosial-iqtisadi inkişafı dövlət proqramları çərçivəsində həyata keçirilən tədbirlər nəticəsində Azərbaycanda şəhərlərlə kəndlər arasında olan fərq tədricən aradan qalxır. Bölgələrdə yeni-yeni müəssisələr, fabriklər açılır. Tikinti, quruculuq-abadlıq işləri sürətlə aparılır. Bütün bunlar da yeni iş yerlərinin açılmasına şərait yaradır. İnsanların sosial rifahı yaxşılaşır. Yeni Dövlət Proqramı bu inkişafa daha da təkan verəcək, ölkəmiz gözəlləşəcək və çiçəklənəcək. Bütün bunlar da ulu öndər Heydər Əliyev siyasətinin Azərbaycanda ölkə Prezidenti İlham Əliyev tərəfindən uğurla davam etdirilməsinin nəticəsidir.

"XALQ ÖZ NİCATINI ULU ÖNDƏR HEYDƏR ƏLİYEVİN QAYIDIŞINDA GÖRDÜ"

Millət vəkili Musa Quliyev:

- Müstəqilliyimizin ilk illərində baş verən siyasi-iqtisadi çətinliklər, yəqin ki, hamımızın yaddaşındadır. Anarxiya, xaos, özbaşınalıq Azərbaycanın müstəqilliyini təhlükə qarşısında qoymuşdu. Ordu hissələri ayrı-ayrı şəxslərin tabeliyində fəaliyyət göstərirdi. Bundan istifadə edən düşmənlərimiz torpaqlarımızı işğal etməkdə davam edirdi. Bu ağır günlərdə xalq öz nicatını ulu öndər Heydər Əliyevin qayıdışında gördü. Beləliklə, xalqın tələbi ilə ulu öndər Bakıya dəvət edildi. Ulu öndərin 1993-cü ildə Naxçıvandan Bakıya gəlişi hər birimizin xatirindədir. Ölkəmiz üçün çox ağır bir məqamda Heydər Əliyev Azərbaycanda ikinci dəfə hakimiyyətə gətirildi. Beləliklə, az bir müddət ərzində atəşkəsə nail olundu. Əvvəl Azərbaycan dünyanın iri dövlətləri ilə neft müqaviləsini imzaladı. "Əsrin müqaviləsi"nin imzalanması Azərbaycanın müstəqilliyinin qorunub saxlanması və möhkəmləndirilməsi yolunda əsaslı addım oldu. Bundan sonra Azərbaycan iqtisadiyyatının yüksəliş dövrü başlandı. Azərbaycan dövlətçiliyinin möhkəmlənməsi istiqamətində əsaslı islahatlar keçirildi. Azərbaycan bu dövrdə nüfuzlu beynəlxalq təşkilatlara üzv seçildi, iqtisadiyyatımıza investisiyaların qoyulması sürətləndi, ölkənin beynəlxalq əlaqələri gücləndirildi. Ulu öndərin Azərbaycanın müstəqilliyinin qorunmasındakı və möhkəmləndirilməsindəki rolu olduqca böyükdür.

2003-cü ildə ulu öndər Heydər Əliyev sıralarımızdan cismən ayrılsa da, xalqımız Onun ideyalarının yaşayacağına inanırdı. Beləliklə, ölkədə siyasi hakimiyyətə ulu öndərin ideyalarının davamçısı, Prezident İlham Əliyev gəldi. O vaxtdan Azərbaycanın siyasi, iqtisadi, sosial və mədəni həyatında baş verən sürətli inkişaf və tərəqqi hamımızın gözü qarşısındadır. Məhz dövlət başçısının sayəsində köhnə məktəblər yenidən quruldu, müasir tələblərə cavab verən rabitə xidməti binası inşa edildi. Tibb ocaqları təmir edildi və onlar sənaye müəssisələri istifadəyə verildi.

Bu gün Azərbaycanın Heydər Əliyev siyasətini uğurla davam etdirən güclü cənab İlham Əliyev kimi Prezidenti var, Onun arxasında isə güclü xalqı dayanır. Bütün bunların əsasında isə Heydər Əliyev şəxsiyyəti, onun dönməz iradəsi durur. Hesab edirəm ki, hər bir azərbaycanlı gənc, partiya mənsubiyyətindən, siyasi baxışından asılı olmayaraq, hər kəs Heydər Əliyevin banisi olduğu Azərbaycanın müstəqilliyinin möhkəmlənməsinə öz töhfəsini verməlidir.

"DAHİ LİDERİN İDEYALARINA SADİQLİK AZƏRBAYCANIN DAHA YÜKSƏK ZİRVƏLƏR FƏTH ETMƏSİNƏ ZƏRURƏT YARADACAQDIR"

Millət vəkili Məlahət İbrahimqızı:

- Ümumilli liderimiz Heydər Əliyevin müstəqil Azərbaycanı bütün bəşəriyyətə tanıtdırdıqdan sonra xalqımızın qüdrəti daha da artmağa başladı. Əsası ulu öndərimiz Heydər Əliyev tərəfindən qoyulan müstəqil dövlətimiz bu gün Onun ən layiqli davamçısı olan Prezident İlham Əliyev tərəfindən böyük əzmlə idarə olunur və yüksək səviyyədə inkişaf mərhələlərinə qədəm qoyur. Milli inkişaf strategiyamızın müəllifi olan ulu öndərimiz Azərbaycanın yüz illiklər boyu yüksəliş xəttini müəyyənləşdirmişdir. Onun müəllifi olduğu dövlətçilik ənənələri bütün bəşəriyyətə müstəqil dövlət modelinin yeni mücəssəməsi idi. Bu baxımdan da, dahi liderin ideyalarına sadiqlik Azərbaycanın daha yüksək zirvələr fəth etməsinə zərurət yaradacaqdır. Eyni zamanda, ümummilli liderimiz Heydər Əliyev məktəbinin bütün prinsiplərini mənimsəmiş Prezident İlham Əliyev bu gün Azərbaycanın gənc müstəqil bir dövlət kimi beynəlxalq arenada nüfuzunun daha da güclənməsinə nail olur. Bütün bunların arxasında isə xalqın öz liderinə olan dərin və tükənməz sevgisi dayanır. Bu gün bütün dünyada öz liderlik xüsusiyyətləri ilə öndə duran Prezident İlham Əliyevin rəhbərliyi altında müstəqil Azərbaycan xalqı dünyanın ən xoşbəxt xalqı hesab edilir. Ona görə də, YAP-ın 1993-cü ildən bu günə qədər qatılmış olduğu bütün seçki proseslərində özünün xüsusi dəsti-xətti açıq şəkildə görünür.

KÜBRA ƏLİYARLI,

SEVİNC NƏZƏROVA

Səs.- 2010.- 4 may.- S. 3.